Hebrews 1

Ika 2018 Bible

Jump to: Chapter 2 →

1Ogẹn mbụ, Osolobuẹ gwasọnmẹ ndị nẹdi ẹnyi wẹ oku imẹrinmẹ ogẹn lẹ ụzọ rị ichẹn-ichẹn ghahanị ndị-amụma.

2Kanị, ogẹn ikpanzụụnnị, ọ gwaọlẹ ẹnyi oku ghahanị Nwa a, onyẹ hụn o yechanrịn ihiẹn ile, onyẹ hụn ọ gha ẹka a ke ụwa ile lẹ ihiẹn ile rịn'a.

3Ịya kẹ wẹ gi a hụn kẹ Osolobuẹ nọ. Ẹnya hụnn'a a hụngụọ Osolobuẹ. O gi oku-ọnụ a hụn nwọn ikẹn hi-ogbe e kwọndọn ụwa ile. Ogẹn o gi chụngụ ẹjan wẹ gi a chanchanpụ njọ, ọ nọdị alị ẹka-nni Onyẹ kachanrịnnị imẹ elu-igwee.

4Ịya ka ndị mmọn-ozi, ka wẹ ọhụnma-ọhụnma, nọkẹ k'o dọn nwan ri nzere ka nke wẹ.

5Ẹghẹẹ, elee mmọn-ozi kẹ Osolobuẹ sịtu, “Nwa m kẹ ị wụ; a ghọsịgụọ m tannị n'ị wụ nwa m.” Elee mmọn-ozi k'ọ sị, “M k'a wụ nẹdi ẹ, o k'a wụ nwa m”?

6Ogẹn Osolobuẹ gi wẹhẹ Nwa-ibuzọ a hụ imẹ ụwa, ọ sị, “Ndị mmọn-ozi Osolobuẹ ile, fe n'ẹ.”

7Nke ndị mmọn-ozi, ihiẹn Osolobuẹ ku wụ nị “Chuku e mẹ ndị mmọn-ozi ẹ e họnrin ufere; o mẹ idibo ẹ e họnrin ọkụn rị e nwunni.”

8Kanị, nke Nwa a, ihiẹn Osolobuẹ ku wụ, “Euu, Osolobuẹ! Ukpo i k'a rị jẹnrin ejẹn; ọkpọ ọkịkị kụrụ ọtọ k'i gi a kị alị-eze i.

9Ezi-omumẹ wụ ihiẹn a sụọnị ị; njọ e ze i ize. Ịya haịn Chuku hụn wụ Chuku i, gi hukpu i udẹn ịghọghọ, gi ye i ọghọ karị ibe i.”

10Osolobuẹ sịzị Nwa a, “Di-nwọnni-ẹnyi, ịyụ ke ụwanị isi mbidọn; ẹka ị mẹmẹ igwere lẹ ihiẹn ile rịn'a.

11Wẹ k'a la iwi, kanị ị k'a rị jẹnrin ejẹn; wẹ k'a fapụ nọkẹ ẹkwa.

12I k'a fụma wẹ nọkẹ ẹkwa, wepụ wẹ; gi ọzọ nọkin ẹnya wẹ, kẹ wẹ e mẹ ẹwuru. Kanị, yụ nwẹn nọkwọ kẹ ị nọ; i k'a rị jẹnrin ejẹn.”

13Elee mmọn-ozi kẹ Osolobuẹ sịtu, “Nọdị alị ẹka-nni m ebeni, d'e ru mgbe m gigụ ndị iṅẹnrẹn i mẹmẹn'i ihiẹn i gi a tụkwasị ụkụ”?

14Ẹlẹ mmọn e jẹn ozi kẹ ndị mmọn-ozi wụhụ? Ẹlẹ mmọn Osolobuẹ zihẹ d'e yeni ndị jẹnkọ d'e nwọn nzụọpụha ẹka kẹ wẹ wụ?

Jump to: Chapter 2 →