Hebrews 5

Ika 2018 Bible

← Chapter 4 Jump to: Chapter 6 →

1Wẹ a gha imẹ igunrun ịhịan a họrị onyẹ ọwụlẹ hụn jẹnkọ d'a wụ onyẹ-isi nchụn-ẹjan, e tumẹ, kẹni ọ nọkin ẹnya wẹ ebe ihiẹn Osolobuẹ rị, e ye Osolobuẹ oyiye, e gi ufiri njọ a chụn ẹjan.

2Ọ marịngụọ gi ẹka alụlụa e sọn ndị ogbori lẹ ndị-mmẹfie makẹni ọ rụnahịnzịkwọ ya nwẹn ẹ arụnahịn.

3Ịya haịn o gi mẹni o k'a gha a chụnrịrị ẹjan makẹ njọ ya lẹ enwẹn ẹ lẹ njọ ndị hụ.

4Ịhịan ara ye enwẹn ẹ ọkwanị. Osolobuẹ sụọ a kpọ ịhịan. Ẹrịra k'o dọn kpọ Ẹrọnụ.

5Ẹrịrazịkwọ, Kraịstị eyeni enwẹn ẹ ọkwa onyẹ-isi nchụn-ẹjan, Osolobuẹ tumẹ ẹ, Osolobuẹ hụn sị a, “Nwa m k'ị wụ; a ghọsịgụọ m tannị n'ị wụ nwa m.”

6Ebe ọzọ imẹ Ẹkụkwọ-nsọ, ọ sịzị, “Onyẹ nchụn-ẹjan k'ị wụ jẹnrin ejẹn — ụdị nke Mẹkizẹdẹkị.”

7Ogẹn Jizọsị gi rị elu ụwanị, o mẹ ekpere, a rịọ Osolobuẹ arịrịọ; e gi okẹn ẹkwan lẹ ẹnya-mirin a kpọku Osolobuẹ hụn k'a saẹka zụọpụha a imẹ ọnwụn, Osolobuẹ nọ nụ ekpere ẹ makẹni ọ lachanrịn enwẹn ẹ tọnị Osolobuẹ.

8Ọsụọn'a nị nwa a rọ, afụnfụn k'o gi mụrụn ihumẹ-isi.

9O gigụ a nwan ru ogo, ọ nọ wụrụ onyẹ hụn nzụọpụha itẹbitẹ gha ẹka a a bịanị onyẹ ọwụlẹ humẹn'ẹ isi —

10makẹni Osolobuẹ e tumẹgụọ a onyẹ-isi nchụn-ẹjan, ụdị nke Mẹkizẹdẹkị.

11Ẹnyi te nwọn ihiẹn bu ọda ẹnyi k'e ku imẹ ihiẹnni, kanị ọ fụka ọrụn ọkọwa, makẹni ụnụ arịzị a s'ẹka a ghọta.

12Ẹghẹẹ, ụnụ te furu nwan a kuzi ndị ọzọ, kanị ụnụ e họnrinzi ndị w'a kuzimẹzi ihiẹn ibuzọ rị oku Osolobuẹ! Ụnụ e họnrinzi ndị wẹ e ye mirin-ẹran mmaka ẹlẹ ihiẹn-oriri ndị ka ẹhụ!

13Makẹni onyẹ ọwụlẹ rị a ra ẹran wụhụ ogbori ebe oku ezi-omumẹ rị, makẹni nwata k'ọ wụ.

14Kanị ndị ka ẹhụ kẹ wẹ e ye ihiẹn-oriri ndị ka ẹhụ, ndị gigụ ihiẹn wẹ rị a mụ zụn enwẹn wẹ d'e ru ebe wẹ nọ marịn ihiẹn rị mma lẹ ihiẹn rịlẹni mma.

← Chapter 4 Jump to: Chapter 6 →