Hebrews 4

Ika 2018 Bible

← Chapter 3 Jump to: Chapter 5 →

1Nị ẹnyi gikwọ nị nwan egun e bi, hụnnị nkwa ezumikẹn o kwe kelẹni gharị, makẹ ọ gha a nahịn onyẹ ọwụlẹ imẹ ụnụ.

2Makẹni, oziọma wẹ nụ kẹ ẹnyi nwẹn nụ, kanị ozi wẹ nụ abannịnị wẹ erere, makẹni wẹ nwẹn egini okukwe nabanhan a.

3Ẹnyi hụn kwerini k'a banye d'e zu ikẹn hụ nọkẹ kẹ Osolobuẹ dọn ku imẹ Ẹkụkwọ-nsọ, sị, “Nọkẹ kẹ m dọn gi iwe kun enwẹn m, sị, ‘Abanyekọ wẹ d'e zu ikẹn ahụn m kwe nkwa a!’ ” Osolobuẹ kuzi oku ezumikẹnni, ọsụọn'a n'ọ rụnchanrịngụọ ọrụn a kete o kelẹ ụwa.

4O nwọnghọ ebe ọ nọ ku oku ụhụọhịn nke ẹsanị imẹ Ẹkụkwọ-nsọ, sị, “Hụn mẹ ẹ akpọhịn ẹsa, Osolobuẹ nọ zu ikẹn ọrụn ile ọ rụn.”

5Ya ọ nọzị nwan ku hụnnị ẹnyi rị e leban ẹnya ebeni, sị, “Abanyekọ wẹ d'e zu ikẹn ahụn m kwe nkwa a.”

6Ebe o mẹ ni oghere ịhịan e gi banye d'e zu ikẹn hụ hụzị a, bụ ndị hụ bu ụzọ nụ oziọma abanyeni makẹni wẹ nupụ isi,

7Osolobuẹ nọ kayezi ụhụọhịn ọzọ, kpọ a “ tannị.” O biegụ ọhụnma-ọhụnma, ọ nọ ku ẹ imẹ Ẹkụkwọ-nsọ ghahanị Defidi — ebẹhụ ẹnyi rụtụ ẹka n'ọ sị, “Ụnụ nụ olu ẹ tannị, akpọkinkwọlẹ ni obi ụnụ.”

8Omẹni Joshụa e te dubangụọ wẹ d'e zu ikẹn ahụn, Osolobuẹ eke kumẹzi oku ụhụọhịn ọzọ.

9Ya wụ nwan nị ezumikẹn ọrụn hụkwọ e che ndị nke Osolobuẹ,

10makẹni, onyẹ banye d'e sọn Osolobuẹ zu ikẹn, o zu ikẹn ọrụn a, nọkẹ kẹ Osolobuẹ dọn zu ikẹn ọrụn a.

11Nị ẹnyi lịlịma nị nwan, kẹni ẹnyi banye d'e zu ikẹn hụ, amamgbe ọ gha e nwọn onyẹ danpụnị yeni inupụ-isi kẹ ndị mbụ dọn nupụ isi.

12Makẹni, Oku Osolobuẹ rị ndụn; ọ rụn ọrụn; ọ tụ nkọ, tụkarị ọpịa-agha ọnụnaị ọwụlẹ: o zubanchanrịn imẹ, d'e ru umẹ-ndụn lẹ mmọn, d'e rudẹ okẹn-ẹhụ lẹ ụmị ọkpụkpụ, o rudẹ obi ịhịan d'e lele iroro ẹ lẹ ihiẹn o bu obi.

13Ẹnya Osolobuẹ, onwọnni ihiẹn zuerini. Ẹghẹẹ, ihiẹn ile gba ọtọ, rị oghe, ẹnya onyẹ hụ ẹnyi jẹnkọ d'e ye mgbakọ.

14Ebe o mẹ ni ẹnyi e nwọnghọ okẹn onyẹ-isi nchụn-ẹjan wụ Jizọsị Nwa Osolobuẹ, hụn ghafegụ elu-igwere, banye ebe Osolobuẹ rị, nị ẹnyi kwọnkẹnmẹ nwan ihiẹn ẹnyi kweri.

15Makẹni onyẹ-isi nchụn-ẹjan ẹnyi ẹlẹ hụn marịnlẹni nị ndụn arị ẹnyi, kanị hụn wẹ nwangụ ụzọ ile nọkẹ ẹnyi kanị o gin'ẹ mẹ njọ.

16Nị ẹnyi wepụ nwan egun, bịa ukpo ẹfọma Osolobuẹ, kẹni ẹnyi nwọnhẹn omikẹn, nwọnhẹnzikwọ ẹfọma k'e yeni ẹnyi ẹka ogẹn o k'a rị ẹnyi mkpa.

← Chapter 3 Jump to: Chapter 5 →