Hebrews 2

Ika 2018 Bible

← Chapter 1 Jump to: Chapter 3 →

1Ẹnyi k'e kwọnkẹnmẹrịrị ihiẹn ẹnyi nụ, amamgbe ẹnyi a kpahu.

2Makẹni, omẹni iwu mbụ wẹ gha ẹka ndị mmọn-ozi ye ndị nẹdi ẹnyi wẹ rị mkpa nke wụnị ndị ile nupụ isi okpuru ẹ mọbụ dann'a gi isi wẹ buru ihiẹn wẹ mẹ,

3nanị ẹnyi a dọn nwan wanahịn omẹni ẹnyi a jụ okẹn nzụọpụhanị nọ ẹnịna, hụn Di-nwọnni-ẹnyi lẹ enwẹn ẹ bu ụzọ zimẹ ozi ẹ; hụn ndị gha ọnụ a nụ a shịa ẹri, ghọsị ẹnyi nị ezioku rọ,

4Chuku lẹ enwẹn ẹ nọzị shịa ẹri ghahanị ihiẹn-nghọsị lẹ ọrụn atụmẹnya ichẹn-ichẹn lẹ oyiye Mmọn-nsọ o yesọnmẹ k'o dọn chọ.

5Ẹlẹ ndị mmọn-ozi kẹ Osolobuẹ tumẹ nị wẹ kị ụwa lalanị ẹnyi rị e ku oku ẹ, kaka!

6O nwọnghọdẹ ebe wẹ nọ ku ẹ imẹ Ẹkụkwọ-nsọ, sị, “Kị ịhịan wụdẹ nwan i gi e ro ẹ? Kị ịhịan mmaka wụdẹ i gi e lepụ a ẹnya?

7Y'e mẹọlẹ ndị mmọn-ozi karị a ẹkẹrẹ ogẹn; y'e mẹgụọ ọghọ lẹ mgbaye jun ẹ ẹhụ,

8bu ihiẹn ile che okpuru ụkụ a.” O mẹ nwan nị Osolobuẹ “e bugụọ ihiẹn ile che okpuru ụkụ a”, ya wụ nị onwọnni nwan ihiẹn rịlẹni okpuru ụkụ a. Kanị ẹnyi eke hụn nwan ihiẹn ile okpuru ịhịan.

9Kama, ẹnyi rị a hụn Jizọsị, onyẹ ahụn Osolobuẹ mẹ nị ndị mmọn-ozi karị a ẹkẹrẹ ogẹn, kẹni o gi ufiri ẹfọma Osolobuẹ nwụndọnni ịhịan ile ọnwụn; o kpurugụọ nwan ọghọ lẹ mgbaye nọkẹ okpu-eze makẹni ọ tagụọ afụnfụn nwụnnị ẹnyi ọnwụn.

10Osolobuẹ mẹ ihiẹn furuni, ebe o mẹ ni ẹka a kẹ ihiẹn ile gha bịa; ebe o mẹ ni ihiẹn ile wụzịkwọ nke ẹ. Makẹni ọ chọ n'ọ zụọpụha ndị bu ọda, webahan wẹ ebe ọ rị, kẹni wẹ wụrụ ụmụ a, sọn ẹ nwọn ọghọ a, ọ nọ gi afụnfụn kwademẹ onyẹ hụn o gi bidọn nzụọpụha hụ, mẹ ẹ ru ogo onyẹ-nzụọpụha.

11Kẹ onyẹ hụn e dọn wẹ nsọ wụ Jesu kẹ ndị ọ rị e dọn nsọ a wụrụgụọ nwan ụmụ onyẹ ohu. Ịya haịn ifẹnrẹn gilẹni e mẹ ẹ ịkpọ wẹ umunẹ ẹ.

12Ọ sị, “M sikọ d'a gwa umunẹ m oku ẹfan ị; m sikọ d'a ja ị mma imẹ ozuzu ẹnyi.”

13Ọ sịzị, “M k'e gi ẹ dọn ẹnya.” Ọ sịzịkwọ, “E lee mmẹ lẹ ụmụ Osolobuẹ ye m.”

14Ya wụ, ebe o mẹni ụmụ a hụ wụ ịhịan hụn nwọn ẹhụ-lẹ-ẹdeke, ya nwẹn nọ sọn wẹ wụrụ ihiẹn ohu hụ, kẹni ọ nwụnhụn, gi ọnwụn a tikpọ onyẹ hụn ọnwụn rị ẹka a, ya wụ Ekwensụ,

15gi ụzọnị tọpụ ndị hụn egun ọnwụn rị a kị kẹ igbọn kete wẹ mụlẹ wẹ.

16Makẹni, o we ẹnya nị ẹlẹ ndị mmọn-ozi k'ọ bịa d'e yeni ẹka, kanị ụmụ Ebraham.

17Ya haịn Osolobuẹ gi mẹ ẹ n'ọ rịchanrịn kẹ ẹnyi wụ umunẹ ẹ ụzọ ile, kẹni ọ hụn ụzọ wụrụ onyẹ-isi nchụn-ẹjan hụn e mẹ omikẹn lẹ hụn furu wẹ gi e dọn ẹnya imẹ ọrụn Osolobuẹ, n'ọ hụn ụzọ chụnnị ịhịan ẹjan w'e gi wepụ njọ wẹ lẹ afụnfụn njọ te k'e buhẹ.

18Makẹni ẹnya hụn a ihiẹn ogẹn wẹ gi nwan a, ọ sa nwan ẹka e yeni ndị wẹ rị a nwan ẹka.

← Chapter 1 Jump to: Chapter 3 →