Hebrews 7

Ika 2018 Bible

← Chapter 6 Jump to: Chapter 8 →

1Mẹkizẹdẹkịnị ẹnyi rị e ku wụ eze alị Salẹm; ọ wụzịkwọ onyẹ nchụn-ẹjan Osolobuẹ, Chuku Kachanrịnnị. O kunrun Ebraham kẹ Ebraham kinla ogẹn Ebraham gi mẹrigụ ndị-nze hụ imẹ agha, ọ nọ gọzi Ebraham.

2Ebraham nọ kebe ihiẹn ile ọ bulụa agha ụzọ iri, we ụzọ ohu ye Mẹkizẹdẹkị. Nke ibuzọ, ẹfannị wụ Mẹkizẹdẹkị wụ “Eze Ezi-omumẹ”. Ọzọzị, Mẹkizẹdẹkịnị wụzị eze Salẹm, ya wụ “Eze Udọn.”

3O nwọn nẹdi; o nwọn nnẹ; o nwọn ẹbozo. O nwọn mbidọn; o nwọn ọgụgụ. Ọ nọhụ kẹ nwa Osolobuẹ. Ọ wụ onyẹ nchụn-ẹjan jẹnrin ejẹn.

4Lee k'o mẹhan okẹn-ịhịan: nke wụ nị Ebraham nẹdi ẹnyi kanị lẹ enwẹn ẹ e yeghọdẹ a ụzọ ohu imẹ ụzọ iri ihiẹn ile o bulụa imẹ agha hụ!

5Lee nwan: nke ụmụ Livaị ndị nchụn-ẹjan, Iwu Mozizi sị wẹ a narịn ụmụ Izrẹlụ ibe wẹ ụzọ-ohu-imẹ-ụzọ-iri. Ya wụ, Iwu ye wẹ ikẹn ịnarịn ndị nke wẹ ụzọ-ohu-imẹ-ụzọ-iri, ọsụọn'a nị wẹ ile wụ ụmụ Ebraham.

6Kanị, okẹnnyẹni wụ Mẹkizẹdẹkị ẹlẹ onyẹ ebọn wẹ, bụ ọ narịn Ebraham ụzọ-ohu-imẹ-ụzọ-iri, gọzi ẹ, gọzidẹ onyẹ Osolobuẹ lẹ enwẹn ẹ kwegụ nkwa!

7Ịhịan ile a marịnghọ nị hụn rị a gọzini ka hụn wẹ rị a gọzi.

8Nke ụmụ Livaị, ndị hụn a narịn ụzọ-ohu-imẹ-ụzọ-iri wụ ịhịan mmaka, hụn o mẹ ni, omẹgụ a nwụnhụn wẹ. Kanị, ụdị nke Mẹkizẹdẹkị, onyẹ hụn a nanị wụ onyẹ Ẹkụkwọ-nsọ ghọsị n'ọ hụ ndụn.

9Ẹnyi k'a sadẹ nwan ẹka sị nị Livaị lẹ enwẹn ẹ hụn ụmụ a a na ụzọ ohu imẹ ụzọ iri a ghagụọ ẹka Ebraham kụ Mẹkizẹdẹkị ụzọ-ohu-imẹ-ụzọ-iri,

10makẹni Livaị rịkwọ ẹhụ nẹdi ẹ kanị wụ Ebraham kẹ Mẹkizẹdẹkị kunrun Ebraham.

11O mẹ nwan nị ụdị ịchụn-ẹjan ụmụ Livaị wẹ gi tumẹni Izrẹlụ Iwu Mozizi kẹ Osolobuẹ te gi e dọnzi ihiẹn, kị Osolobuẹ k'e tumẹmẹzini ụdị onyẹ nchụn-ẹjan ọzọ, ụdị nke Mẹkizẹdẹkị, ẹlẹzi nke Ẹrọnụ?

12Makẹni, hụn wẹ gihụ wepụ ụdị ẹjan lẹ ndị nchụn-ẹjan rịnị, webanhan ụdị ọzọ, wẹ k'e webanhanzịkwọ iwu ọhụn ya lẹ ụdị ọhụn ahụn wụ ohu.

13Onyẹ ihiẹn ndịnị rị e zin ẹka wụ onyẹ ebọn ọzọ. Onwọntuni onyẹ ebọn ẹ rụn ọrụn ukpo nchụn-ẹjan Osolobuẹ.

14Makẹni, o we ẹnya nị Onyẹ-nwọnni-ẹnyi wụ onyẹ ebọn Juda, lẹ ni Mozizi akpọnị ebọn hụ ẹfan ogẹn o gi ku oku ndị nchụn-ẹjan.

15Ihiẹn ẹnyi rị e ku wekẹnmẹdẹ ẹnya, makẹni, ezioku-ezioku, ụdị onyẹ nchụn-ẹjan ọzọ hụn nọ kẹ Mẹkizẹdẹkị a pụhagụọ nwan,

16onyẹ nchụn-ẹjan wụlẹni onyẹ ebọn Iwu ku, kanị hụn wụ onyẹ nchụn-ẹjan makẹni o nwọnghọ ikẹn o gi a rị ndụn jẹnrin ejẹn:

17makẹni Ẹkụkwọ-nsọ e kuọl'a, sị, “Ị wụ onyẹ nchụn-ẹjan jẹnrin ejẹn, ụdị nke Mẹkizẹdẹkị.”

18Ya wụ, Osolobuẹ a kagbugụọ iwu o ti mbụ, makẹni ọ sakọ ẹka rụn ọrụn lẹni ọ bannị erere

19(makẹni Iwu mbụ enwọn ihiẹn o dọnzi ru alị); Osolobuẹ e webanhangụọ nwan olilẹnya ka mma ẹnyi e gi s'ẹka nọkunmẹ Osolobuẹ.

20Osolobuẹ e kunghọ enwẹn ẹ gi biye hụnnị ẹka. O kunni ihiẹn ọwụlẹ ogẹn o gi tumẹ ndị nchụn-ẹjan mbụ hụ,

21kanị o kun enwẹn ẹ tumẹ Jizọsị onyẹ nchụn-ẹjan. Makẹni Osolobuẹ sị a, “Di-nwọnni-ẹnyi e kungụọ enwẹn ẹ, o kuhutọkọ ọnụ. Ọ sị, ‘Ị wụ onyẹ nchụn-ẹjan jẹnrin ejẹn, ụdị nke Mẹkizẹdẹkị!’ ”

22Ịya kẹ Jizọsị gi nwan wụrụ onyẹ obi gi e ru ẹnyi alị nị nkwerigbama ọhụnnị ka mma.

23Ọzọzị, ndị nchụn-ẹjan iwu Mozizi e bu ọda makẹni onwọnni hụn ọnwụn a nị a rụnsọnmẹ ọrụn hụ.

24Kanị, Jesu nkẹ awụbehikọ onyẹ nchụn-ẹjan makẹni ọ rị arị jẹnrin ejẹn.

25Ufiri ẹ, k'o gi a sa ẹka a zụọpụha ndị ghaha ẹka a d'e kunrun Osolobuẹ, a zụọpụha wẹ d'e ru isi ẹ, makẹni ọ rịsọnmẹ ndụn, a rịọdọnni wẹ Osolobuẹ.

26Onyẹ-isi nchụn-ẹjan nọ ẹnịna furu ẹnyi: onyẹ-isi nchụn-ẹjan hụn rị nsọ, nwọnlẹni njọ, nwọnlẹni ebe ọ nọ rụ, hụn ya lẹ ndị-njọ wụlẹni ohu, hụn Osolobuẹ bushigụ elu ghafedẹ igwere.

27Ẹlẹ hụn o gi chụnsọnmẹ ẹjan ụhụọhịn-ụhụọhịn nọkẹ ndị-isi nchụn-ẹjan Iwu-Mozizi, ọ chụngụ nke njọ a, ọ chụnnị ndị alị nke njọ wẹ. Makẹni, o gigụọ enwẹn ẹ chụn ẹjan mgbe ohu, chụnchanrịn.

28Ịhịan-mmaka zulẹni oke kẹ iwu Mozizi e tumẹ ndị-isi nchụn-ẹjan; kanị Osolobuẹ e gigụọ oku-ọnụ a lẹ enwẹn ẹ o kun tumẹ Nwa Osolobuẹ zu oke onyẹ-isi nchụn-ẹjan jẹnrin ejẹn. O ku oku hụ ọsụọn'a nị Iwu Mozizi a rịgụọlẹ.

← Chapter 6 Jump to: Chapter 8 →