Hebrews 8

Ika 2018 Bible

← Chapter 7 Jump to: Chapter 9 →

1Ihiẹn ẹnyi rị e ku wụ nị ẹnyi nwọn nwan onyẹ-isi nchụn-ẹjan hụn nọdị alị ẹka-nni Ukpo-eze ahụn kachanrịn ọghọ e nwọn hụn ri imẹ elu-igwee —

2onyẹ hụ rị ọrụn Ebẹhụ Kachanrịn Nsọ imẹ Ọdụ-ofufe ezigbo ẹ hụ, hụn rị elu-igwee, Ọdụ-ofufe ahụn Osolobuẹ lẹ enwẹn ẹ mẹmẹ, ẹlẹ hụn ịhịan mẹmẹ.

3Iye-oyiye lẹ ịchụn-ẹjan haịn wẹ gi e tumẹ onyẹ-isi nchụn-ẹjan. Ya wụ nị o k'e nwọnrịrị ihiẹn onyẹ nchụn-ẹjannị ẹnyi rị e ku oku ẹ e ye lẹ ẹjan ọ chụn.

4Omẹni elu-ụwa k'o te rị, o ke wụ onyẹ nchụn-ẹjan kaka, ebe o mẹ ni ndị nchụn-ẹjan hụn a chụn ẹjan kẹ Iwu Mozizi dọn ku hụ a.

5Ọrụn ịchụn-ẹjan wẹ ẹlẹ nke ezigbo ẹ, o yihụ nke ezigbo ẹ rị elu-igwee eyi. Makẹni, ogẹn Mozizi gi jẹnkọ d'a rụn Ọdụ-ofufe hụ, Osolobuẹ gwa a oku, sị a, “Hụnkwọ a nị ị rụn ihiẹn ile n'o yi hụn wẹ ghọsị ị elu-ugu.”

6Kanị nke Jesu ka nke wẹ mma, ebe o mẹ ni ya nwẹn rị a rụn ọrụn idọnzi ẹgbata imẹ nkwerigbama ka nke wẹ mma, nkwerigbama Osolobuẹ kwesọnmẹ nkwa ka mma tumẹ.

7Omẹni nkwerigbama ibuzọ hụ ete nwọn nsọngbu, oku nkwerigbama ọzọ eke rị.

8Kanị, ọ hụn nsọngbu imẹ ẹ haịn o gi sị, “Di-nwọnni-ẹnyi sị, ‘Lee ẹ, ogẹn lala, hụn m k'e gi tumẹ nkwerigbama ọhụn ẹgbata mmẹ lẹ ndị Izrẹlụ lẹ ndị Juda;

9ọ nọkọ kẹ nkwerigbama hụ rị ẹgbata mmẹ lẹ ndị nẹdi wẹ kanị, ogẹn hụ m kwọndọn wẹ ẹka gha alị Ijiptu dupụha wẹ. Makẹni edọnmẹni wẹ nkwerigbama m, ịya haịn m gi wepụ wẹ ẹnya.’ Ya kẹ Di-nwọnni-ẹnyi ku.

10‘Di-nwọnni-ẹnyi sị, ọnwan wụ nkwerigbama hụ hụn m jẹnkọ d'e tumẹ ẹgbata mmẹ lẹ ndị Izrẹlụ, o mẹgụ: m jẹnkọ d'e bu iwu m che imẹ uche wẹ, de wẹ ye imẹ obi wẹ. M k'a wụ Chuku wẹ, a wụrụ wẹ ndị nke m.

11Ẹlẹzi hụn ịhịan k'e gi kuzimẹ ibe ẹ, mọbụ gwama ibe ẹ, “Marịnkwọ Onyẹ-nwọnni-ẹnyi.” Makẹni, wẹ ile jẹnkọ d'a marịn m; gha onyẹ kachanrịn ntịn imẹ wẹ d'e ru onyẹ kachanrịnnị.

12Makẹni, m k'e mẹ omikẹn gbagharị wẹ njọ wẹ; anyanhankọzị m njọ ndị wẹ mẹ.’ ”

13O gigụọ oku nkwerigbama ọhụnnị kpọ nke ibuzọ ihiẹn-akan — ihiẹn-akan rị a kawaye ẹgẹdi e d'a la.

← Chapter 7 Jump to: Chapter 9 →