Proverbs 18

Ika 2018 Bible

← Chapter 17 Jump to: Chapter 19 →

1Onyẹ ya lẹ ndị ọzọ ghalẹni a sụọ a chọsọnmẹ nke ẹ nkẹ ẹ; ara gọndẹ ntịn ezigbo ndụnmọdụn.

2Onyẹ-nzuzu ara chọ n'ọ ghọta, ọ chọhụ nọ ku uche ẹ.

3Eje-ịhịan pụha, e lelịa w'a; onyẹ mẹ ihiẹn ifẹnrẹn, a fa w'a.

4Oku-ọnụ ịhịan nọ kẹ okẹn mirin mini; amamihiẹn nọ kẹ mirin iyi rị e huni.

5Ọrịnị mma nị wẹ nị onyẹ mẹ njọ ri eṅẹn mọbụ nị wẹ ma onyẹ mẹlẹni njọ ikpe.

6Ọnụ onyẹ-nzuzu e sehẹn'ẹ oku, ọnụ a e mẹ wẹ e gbu ẹ ili.

7Ọnụ onyẹ-nzuzu e wiwi ẹ ihiẹn, ụgb'ọnụ a wụ ọnyan hụn e gbun'ẹ.

8Oku-ọnụ onyẹ asịsị-ire nọ kẹ ihiẹn-oriri a sụọ ụsụọ mẹ kịrị-kịrị, o rudẹ ịhịan alị-ẹfọ.

9Onyẹ hụn ghalẹni a rụnshi ọrụn a ikẹn lẹ onyẹ hụn e wiwini wụ nwẹnẹ.

10Ẹfan Osolobuẹ wụ okẹn ụlọ zeni; ndị ezi-omumẹ gbaban a, a hụn wẹ isi.

11Akụ-lẹ-ụba ndị-ịdanfịn nọ wẹ kẹ obodo wẹ tụnhunmẹ mgbọn zeni, w'e ro n'ọ wụ mgbọn ịhịan ghalẹni as'ẹka e fe.

12Ịhịan pachemẹ, ọ dan kanị ịhịan welụama enwẹn ẹ alị ọghọ a bịan'a.

13Onyẹ hụn a shịarịgụ oku d'e gọnmẹ ntịn, wụ nzuzu lẹ ihiẹn-ifẹnrẹn.

14Obi ịhịan e mẹ ẹ a s'ẹka e dingbu emu, kanị ndụn gụ obi, k'o k'a sa nwan ẹka din?

15Ndị nwọn uche a s'ẹka a marịn ihiẹn — ntịn ndị marịn ihiẹn a chọpụha amamihiẹn.

16Ihiẹn onyẹ ye a gụnpụn'a ụzọ, e weban a ihun ndị okẹn-ịhịan.

17Onyẹ hụn bu ụzọ kin ikpe a nọkẹsị ya k'e ri eṅẹn d'e ru ni hụn ẹbọ a pụha, jụma a ụta.

18Wẹ e gi ịtụ-mkpọ e dọnzi oku, e gi ẹ e gbọn ndị oku wẹ zegbu enwẹn ẹ.

19Onyẹ wẹ kpasu iwe amarịn nwẹnẹ, o zenahịndẹ mgbọn zeni wẹ gi tụnhunmẹ obodo; ikpe nọ kẹ igi igwe fidọn ọnụ-mgbọn ụlọ zeni.

20Ihiẹn gha ọnụ ịhịan pụha k'o gi e rijun ẹfọ; ihiẹn ụgb'ọnụ a rụnpụha kẹ ẹfọ gi e jun ẹ.

21Ọnwụn lẹ ndụn rị ire, ndị gi ire e bi k'e ri ihiẹn o wẹhẹ.

22Onyẹ hụn nwunyẹ a hụngụọ ihiẹn rị mma, o nwọnhẹngụọ ihiẹn rị mma ẹka Osolobuẹ.

23Ogbẹnnyẹ a rịọ arịọ, kanị ọdanfịn a gan agan.

24Ịhịan nwọn ikẹn la iwi ọsụọn'a n'o nwọnghọ ndị ọwụ bu ọda — kanị o nwọnghọ ọwụ ka nwẹnẹ.

← Chapter 17 Jump to: Chapter 19 →