Proverbs 23

Ika 2018 Bible

← Chapter 22 Jump to: Chapter 24 →

1Ị nọdị alị n'i sọn onyẹ-ọkịkị ri ihiẹn-oriri, lekpọkwọ ihiẹn wẹ butọ ihun i,

2y'e kẹnmẹ ẹkpịrị ị omẹni ị wụ onyẹ okẹn ihiẹn-oriri.

3Anịkwọlẹ ezigbo ihiẹn-oriri ẹ ndị ahụn la ị ẹnya, makẹni ihiẹn-oriri ndị ahụn e dufie edufie.

4Alụgbulẹ enwẹn i n'i hi ọdanfịn — nwọnrin uche kwọndọn enwẹn i.

5I buhụ ẹnya che akụ-lẹ-ụba, a la wẹ; makẹni wẹ k'e purịrị nku, fela kẹ ugọn.

6Erikwọlẹ ihiẹn-oriri onyẹ-atịntịn, anịdẹlẹ ezigbo ihiẹn-oriri ẹ la ị ẹnya;

7makẹni onyẹ nọ ẹrịra a gbakọ egho ole ọ wụ imẹ obi ẹ. Ọ hụ a sị ị, “Ri, ra,” kanị obi ẹ arịa.

8I jẹnkọ d'a gbọpụhachanrịn ihiẹn i ri, ekele ile i kele ẹ a la iwi.

9Akagwalẹ onyẹ-nzuzu, makẹni, o k'e legberi amamihiẹn rị oku i.

10Etuzụkakwọlẹ ihiẹn wẹ zumẹ okẹn ẹdẹi mọbụ narịn ndị nẹdi wẹ nwụnhụngụ alị wẹ,

11makẹni Onyẹ Hụ e kinni wẹ ọnụ wẹ ze eze, o k'e sọn i dọ, kinni wẹ ọnụ wẹ.

12Bu obi i che ihiẹn wẹ rị a kuzi i, y'e bu ntịn ị che oku y'e gi marịn ihiẹn.

13Egikwọlẹ ẹka alụlụa zụn nwata; i gbu ẹ mkpịnsịn, ọ nwụnkọ.

14Fịan a mkpịnsịn n'ị zụọpụha umẹ-ndụn a alị-mmọn.

15Nwa m, i nwọn uche, obi jẹnkọ d'a sụọ m ụsụọ;

16M k'e gi akpak'alị obi m ghọghọ, omẹni ọnụ ị e ku ihiẹn furuni.

17Anịlẹ ni ihiẹn ndị-njọ la ị ẹnya, k'a tụ egun Osolobuẹ ogẹn ile,

18makẹni elu k'a rịrịn'ị mma ihun, okpuyekọ ị.

19Gọn ntịn nwa m, n'i nwọnrin uche, y'e bu obi i che ụzọ rị mma.

20Esọnkwọlẹ ndị manya mọbụ ndị ori-anụ,

21makẹni ogbẹnnyẹ kẹ ndị manya lẹ ndị okẹn ihiẹn-oriri a dan, okẹn-ụran e jemẹ wẹ nkanka ẹkwa.

22Gi oku nẹdi i dọn, nị ịya mụ ị; elegberikwọlẹ nnẹ i ọ kagụ ẹgẹdi.

23Ṅọnrin ezioku; erekwọl'a; ṅọnrin amamihiẹn, ọzụnzụn lẹ nghọta.

24Nẹdi onyẹ ezi-omumẹ a ghọghọ ọda-ọda; onyẹ mụ nwa nwọn uche e gi ufiri ẹ a ghọghọ.

25Nẹdi i lẹ nnẹ i wẹ ghọghọ; okpoho mụn'ị ya ghọghọ.

26Nwa m, ye m obi i; ẹnya ị ya rịsọnmẹ ụzọ m,

27makẹni ịgbaraja wụ mgbugbu mini, nwunyẹ ẹnya a rị ogbe wụ ọmị shịalẹni.

28Ọ warị e che ụzọ nọkẹ onyẹ ohin, e mẹ ikẹnnyẹ rị a latọ Osolobuẹ a barahị.

29Onyẹ kẹ ụya e gbu? Ẹghẹẹ, onyẹ kẹ ụya e ri? Onyẹ e kpe ikpe? Onyẹ e kin okinkin-okinkin? Onyẹ a rụsọnmẹ ẹhụ nwọnlẹni isi? Onyẹ kẹ ẹnya a chan?

30Ndị a ra manya, a racheni rọ — ndị e mẹ oku manya rọ.

31Anịkwọlẹ manya la ị ẹnya: k'o nwunhanlẹ kẹ ezigbo ẹ; k'o behanlẹ nwaịn-nwaịn imẹ mkpu; k'ọ ghalẹ ozigbo-ozigbo ẹkpịrị!

32Makẹni, o mẹgụ, ọ ta ịhịan kẹ agwọ, ẹdide ẹ e shi kẹ nke eje-agwọ.

33Ẹnya ị a hụnma ihiẹn ọzọ, obi i e yemẹ i ihiẹn nwọnlẹni isi;

34y'a danma ẹgẹlẹgẹ nọkẹ onyẹ rị ụran elu okẹn-ohimin, onyẹ dinẹ elu ẹkwa-ufere hụn ufere gi bukọ ụgbọ-mirin —

35a sị, “A fịan wẹ m ihiẹn, anụnị m ụfụ a! E gbu wẹ m ili, amarịndẹ m! Elee mgbe m'e tẹnhindẹ nwan — nị m chọrịzị manya ra?”

← Chapter 22 Jump to: Chapter 24 →