Proverbs 5

Ika 2018 Bible

← Chapter 4 Jump to: Chapter 6 →

1Nwa m, bu obi che amamihiẹn m, gọnkẹnmẹ ntịn nghọta m,

2kẹni i marịn gi ezigbo uche e bi, kẹni oku-ọnụ ị wụrụ nke onyẹ marịn ihiẹn.

3Makẹni oku-ọnụ okpoho hụn a zọ ụkụ e ye ọfịa a sụọ kẹ mirin-ẹnwụn, oku-ọnụ a riẹnnahịn udẹn-olivu;

4kanị o mẹgụ, okpoho nwẹn e lumẹ ilu kẹ olulu-anụ, o be kẹ ọpịa-ọnụnaị tụ nkọ.

5Ụkụ a shikọ mmọn; nzọmụkụ a pụ ili —

6hụn nkẹ o gi gha ụzọ ndụn hụn riẹnni; ụzọ rịlẹni mma k'ọ ghakọ bụ ọ marịn.

7Gọn ni m nwan ntịn, ụmụ m; alatọkwọlẹ ni ihiẹn m rị e ku.

8Gbakwọnị okpoho ughẹrẹ hụ ọsọ; anọkunmẹkwọlẹ ọnụmụzọ iwe ẹ —

9amamgbe y'e we ndụn i nwọn ye ndị ọzọ, ihiẹn i gi ogẹn i rụn a lanị onyẹ ẹfọ jọ;

10amamgbe itumunyẹ e ri ihiẹn i gi ndụn ị ile rụn, ikpụlọ onyẹ ọzọ e gi ihiẹn ile ị rụn hi ọdanfịn.

11O ru ikpanzụụn y'a sụnma udẹn, ogẹn y'e gi fiechanrịngụ ẹhụ, ẹhụ ị a lachanrịn iwi.

12Ogẹn ahụn ị sị, “Ize ọzụnzụn zeni m mẹ m ihiẹnni! Anịdẹni m wẹ jụgbọ m kaka!

13Egini m oku ndị-nkuzi m dọn mọbụ gọn ndị zụnnị m ntịn.

14Nke m e d'a gụ nwan idẹnya ịhịan ile.”

15A nọ isi-mirin i e weri mirin a ra; a nọ ọmị ị a dọrị mirin.

16N'ị nị isi-mirin i hutọsọnmẹ ọgbara-ogbe ile? N'ị nị mirin iyi i hutọ ebe ịhịan ile nọ e zu?

17Ya wụrụ nke ịyụ sụọ, yụ lẹ onyẹ ọzọ ekekwọl'a.

18Isi-mirin i ya wụrụ nwan ngọzi ẹnya ị; e nwọn anwịnrịn makẹ nwunyẹ ụtụntụn ị,

19nị onyẹnnyẹ-ele ma mma rọ, onyẹnnyẹ-ele hụn fịan mma; ẹran a ya sụọ ị ụsụọ ogẹn ile; ihiẹn-ọsụsụọ a ya a tụ ị kẹ manya ogẹn ile.

20K'ị okpoho rị a zọ ụkụ e ye ọfịa k'a tụn'ị kẹ manya, nwa m? Kị yụ lẹ okpoho ẹnya rị ogbe k'a kụkụrụmanị?

21Makẹni ụzọ hụn ịhịan a gha ezuerini ẹnya Osolobuẹ kaka, o lechan ụzọ ile hụnyẹ a gha.

22Eje-ihiẹn onyẹ-njọ e mẹ wụ ọnyan a nwụnn'a; njọ a wụ ụdọ e kẹnn'ẹ.

23O k'a nwụnhụn makẹni ọ nịnị wẹ zụn a; okẹn nzuzu ẹ k'e duhuhu ẹ.

← Chapter 4 Jump to: Chapter 6 →