Proverbs 25

Ika 2018 Bible

← Chapter 24 Jump to: Chapter 26 →

1Ndịnị wụzị itẹn Solomọnụ hụn ndị ọrụn Hezikaya eze Juda depụha:

2Ọghọ Osolobuẹ rọ n'o zuemẹ ihiẹn; ọghọ ndị-nze k'ọ wụ nị wẹ chọpụha ihiẹn.

3Kẹ igwere dọn jẹn elu, lẹ kẹ alị dọn mi — ẹrịra kẹ obi ndị-nze jẹn elu, mi — w'a ra s'ẹka ghọta a.

4Iwepụ unyin ya lẹ siliva wị, ọkpụ-siliva a hụn siliva kpụ;

5iwepụ ndị eje-omumẹ e sọn eze a rụn ọrụn, ukpo ẹ e turu makẹ ezi-omumẹ.

6Ebushilẹ enwẹn i elu ihun eze, ejẹnlẹ d'a nọdị ebe ndị okẹn-ịhịan rị;

7ọ ka mma n'ọ sị ị, “Bịa elu ebeni d'a nọdị,” karị n'ọ nọ idẹnya onyẹ-isi fa ị — ihiẹn i gigụ ẹnya ị hụn k'o mẹ onyẹ ọzọ.

8Ahụhụkwọlẹ kpọ ịhịan ikpe, kịnị k'i jẹnkọ d'e mẹ omẹni ibe i e kingụ, ifẹnrẹn e mẹ i?

9Yụ lẹ ibe i dọ oku ụnụ rị a dọ, ebupụhalẹ oku onyẹ ọzọ gwa ị nzuzue.

10Makẹni ịhịan nụ a, o gbe ifẹnrẹn ye i ihun, eje-ẹfan a tọ ị isi.

11Oku wẹ tụye ọhụnma nọ kẹ mkpụrụ-osisi a la ẹnya wẹ gi goru kpụ, dọnyesọnmẹ elu ihiẹn siliva.

12Onyẹ marịn ihiẹn jụgbọ onyẹ a nụ ihiẹn, ọ nọ kẹ onyẹ wẹ yimẹ ihiẹn-ntịn goru mọbụ ihiẹn ọzọ wẹ gi ezigbo goru mẹmẹ.

13Kẹ mirin jụ oyi a rị ịhịan ẹhụ ogẹn uwowo wẹ gi a ghọ ihiẹn-ugbo, ẹrịra kẹ ụkọ wẹ gi e dọn ẹnya a rị ebe onyẹ zin'ẹ rị; makẹni ọ gba ndị nwọnn'ẹ umẹ.

14Onyẹ ghalẹni e ye ihiẹn o kwe nkwa a nọ kẹ orukpu lẹ ufere ghalẹni e zue mirin.

15Ndidin kẹ wẹ gi a s'ẹka a gwa onyẹ-ọkịkị oku, o gi ẹ dọn; ọnụ-ọma k'a sadẹ ẹka kpagi ọkpụkpụ.

16Ị hụn mirin-ẹnwụn, rahụ hụn k'e jun i ẹfọ — amamgbe y'a rakarị enwẹn i, gbọpụ a.

17Ejẹnkẹlẹ iwe ibe i — amamgbe ndụn ị a gụ a, ize i a ban a.

18Onyẹ hụn e buokin ibe ẹ ọnụ nọ kẹ ẹgbe mọbụ ọpịa mọbụ ọbara-ụta tụ nkọ.

19Igi onyẹ furulẹni w'e gi dọn ẹnya dọn ẹnya ogẹn nsọngbu nọhụ kẹ eze mọbụ ụkụ rị a tụrụ ịhịan.

20Onyẹ rị a bụyeni obi rị a kwannị ẹbụ nọ kẹ onyẹ gbụpụ ịhịan ẹwuru ụhụọhịn-oyi mọbụ ebe wẹ nọ bu nnu che ẹtẹ.

21Omẹni ẹgụn rị a gụn eṅẹnrẹn i, ye ẹ ihiẹn-oriri, omẹni ẹgụn mirin rị a gụn a, ye ẹ mirin ra.

22Ị gha e mẹ ẹrịra, ị rị a bụọ ikeke-ọkụn e ye ẹ isi, Osolobuẹ k'a kụ ị ụgwọ-ọrụn.

23Kẹ ufere ẹbamịn-ugu dọn e buhẹ mirin e zueni, ẹrịra kẹ ire ọghẹlẹ dọn e buhẹ iwe.

24Ọ ka mma nị ịhịan bi ụsụọ ohu elu ụlọ, karị nị ya lẹ nwunyẹ hụn e mẹ oku bi imẹ ụlọ.

25Ozi rị mma gha alị teni bịa nọ kẹ mirin jụ oyi wẹ raye ẹkpịrị kpọ nkụn.

26Ebe onyẹ ezi-omumẹ nọ kweyeni onyẹ eje-omumẹ, nọ kẹ ebe isi-mirin nọ gberụrụ mọbụ ebe eje-ihiẹn nọ ban imẹ ọmị.

27Ọrịnị mma nị ịhịan raghafe mirin-ẹnwụn okẹn, mọbụ nị ịhịan a chọsọnmẹ onyẹ k'e yen'ẹ ọghọ.

28Onyẹ ghalẹni as'ẹka e kwọndọn enwẹn ẹ nọhụ kẹ obodo mgbọn ẹ dankpọ.

← Chapter 24 Jump to: Chapter 26 →