Proverbs 24

Ika 2018 Bible

← Chapter 23 Jump to: Chapter 25 →

1Ẹnya afụkwọlẹ i nị ihiẹn ghanị ndị eje-omumẹ, achọkwọlẹ nị ịyụ lẹ wẹ kpa;

2makẹni eje-ihiẹn kẹ obi wẹ e ro, oku kẹ wẹ gi ọnụ wẹ a chọ.

3Amamihiẹn kẹ wẹ gi a tụn ụlọ, nghọta k'o gi e turu;

4ịmarịn-ihiẹn kẹ ihiẹn w'a chọ achọ lẹ ihiẹn rị mma gi e jun mmughẹ rịsọnmẹn'ẹ.

5Onyẹ nwọn uche nwọn ikẹn, onyẹ hụn nwọn amamihiẹn rị e nwọnwaye ikẹn;

6makẹni agha chọ ezigbo ndụnmọdụn, mmẹri chọ ndị ndụnmọdụn bu ọda.

7Amamihiẹn e tekẹ ebe onyẹ-nzuzu rị; wẹ zudẹ imẹ ọgwa, ara shịapụ ọnụ a.

8Onyẹ e romẹni ịhịan eje-ihiẹn, eje-ịhịan wụ ẹfan a.

9Ihiẹn hụn onyẹ-ẹwobi romẹ wụ njọ; onyẹ hụn e lelịanị e ze ịhịan ize.

10Ndụn gụ ị ogẹn nsọngbu, ya wụ nị ndụn ị mẹ ẹkẹrẹ.

11Zụọpụha ndị wẹ wekọ d'e gbu; kwọndọnkwọ ndị wẹ wekọ d'e gbu dangbukọnị.

12Ị sị, “Ẹnya m erukwọnị!” Onyẹ Hụn marịn obi ịhịan amarịnzị ezioku ra? Onyẹ hụn e dọnmẹ i ndụn amarịn? Ọ kụkọ onyẹ-onyẹ ụgwọ k'o dọn rụn?

13Nwa m, ra mirin-ẹnwụn, makẹni ihiẹn rị mma rọ; mirin-ẹnwụn gha ọgba-ẹnwụn a tantu a sụọ ụsụọ ọnụ:

14marịnzịkwọ nị ẹrịra kẹ amamihiẹn a sụọ umẹ-ndụn ị ụsụọ; ị hụn a, o k'a masịn'ị ihun, o kpuyekọ ị.

15Awarịlẹ kẹ ndị-ejẹ ni i mẹ ụlọ onyẹ ezi-omumẹ ihiẹn, amayelẹ ikp'ụlọ wẹ;

16makẹni ọsụọn'a mgbe ẹsa kẹ onyẹ ezi-omumẹ dan, n'o lihighọkwọ, kanị eje-ihiẹn bịanị onyẹ eje-omumẹ, ọ dan.

17Aghọghọkwọlẹ nị eṅẹnrẹn i dan adan; ọ kpọgburu, anịkwọlẹ obi sụọ ị ụsụọ,

18makẹni Osolobuẹ hụn a nị ị rị a ghọghọ, ẹfọ asụọkọ a ụsụọ, olulu o gi e sọn hụnyẹ a rọ.

19Agbakakwọlẹ obi makẹ eje-ịhịan; ẹnya afụkwọlẹ i makẹ aghamihun eje-ịhịan,

20makẹni ọ masịkọnị eje-ịhịan ihun; ukpẹ ndị eje-omumẹ k'e tinyụn.

21Nwa m, ka a tụkwọ egun Osolobuẹ lẹ eze esọnkwọlẹ ndị nnupụ-isi,

22makẹni wẹ ẹbụbụọ nwọn ikẹn wẹ gi e zihẹ okẹn eje-ihiẹn idẹnmizi: onyẹ ma ihiẹn wẹ k'e mẹ?

23Ndịnị wụzịkwọ ihiẹn ndị nwọn amamihiẹn ku: Igbeyeni ịhịan arị mma:

24Onyẹ sị onyẹ ikpe ma, “Ịyụ ri eṅẹn”, wẹ k'a bụ a ọnụ, ndị alị ichẹn-ichẹn k'e kuja oku ẹ.

25Kanị o k'a rịnị onyẹ ndị jụgbọ onyẹ mẹ njọ mma, ezigbo ngọzi k'a bịanị wẹ.

26Wẹ shịapụ ẹfọ shịarị ịhịan oku, ọ nọ kẹ ebe wẹ nọ susu ịhịan ọnụ ụgb'ọnụ.

27Rụnpụ ọrụn ị rị ogbe, y'e dọnzi ugbo i ọhụnma, i kebe tụn ụlọ ị.

28Ashịagbulẹ ibe i ẹri mmaka, mọbụ tụ ntụ.

29Asịlẹ, “M jẹnkọ d'e mẹ ẹ ihiẹn o mẹ m; m jẹnkọ d'e mẹgwarị a ihiẹn o mẹ m!”

30A ghafeghọ m ugbo onyẹ-nzụnzụn, Anị-vaịnị onyẹ nwọnlẹni uche —

31e lee ogun rujun ebe ile, ẹfịfịa e rujun alị; mgbọn ẹ wẹ gi ọmụma tụn a dankpọgụọ.

32E rokpọ m ihiẹn m hụn, m nọ gi ihiẹn m hụn mụnrụn ihiẹn:

33Ẹkẹrẹ ụran, ẹkẹrẹ irue ụran, ịkụma ẹka zu ikẹn ẹkẹrẹ —

34y'a dan ogbẹnnyẹ idẹnmizi kẹ ohin dọn e kunrun ịhịan idẹnmizi, ihiẹn-ụkọ e kunrun i nọkẹ ndị e chekin ịhịan ụzọ.

← Chapter 23 Jump to: Chapter 25 →