Proverbs 9

Ika 2018 Bible

← Chapter 8 Jump to: Chapter 10 →

1Amamihiẹn a tụngụọ ụnọ a; o gbegụọn'a adansụn ẹsa k'e kwọndọnn'ẹ.

2O shitọgụọ anụ, butọ manya sụọnị; o bupụhagụọ ihiẹn-oriri.

3O zipụgụọ idibo ẹ ikpoho d'a kpọ ịhịan; ebe kachanrịn elu e jẹn imẹ obodo k'ọ gha a hị:

4“Ndị ile nwọnlẹni hụn wẹ marịn wẹ kụye ebeni!” Ọ sị ndị nwọnlẹni nghọta,

5“Bịa nị d'e ri ihiẹn-oriri m shi, ra manya a sụọnị hụn m butọ

6Hapụ nị nzuzu ụnụ kẹni ọnụ rị ndụn; ghama nị ụzọ nghọta.

7Onyẹ rị a jụgbọ onyẹ-nlelịa chọkọ mkpari; onyẹ hụn jụgbọ eje-ịhịan k'e nwọnhẹnrịrị eje-oku.

8Ị jụgbọkwọ onyẹ-nlelịa, ize i a ban a; ka jụgbọ onyẹ nwọn uche, ihiẹn i a sụọma a.

9Kuzi onyẹ marịn ihiẹn, ọ marịnwaye; kuzi onyẹ ezi-omumẹ, ọ mụcheni.

10Ịtụ egun Osolobuẹ wụ isi mbidọn amamihiẹn, ịmarịn Onyẹ Hụ Rị Nsọ, ịya wụ nghọta.

11Mmẹ wụ amamihiẹn k'e mẹ i tọ, bezi ahụa bu ọda cheni i.

12Omẹni i nwọn uche, ịyụ k'o k'a bannị erere; omẹni ị wụ onyẹ-nlelịa, ịyụ sụọ k'a ta afụnfụn rịn'a.”

13Nzuzu rị kẹ okpoho hụn e mẹ obolo-obolo, azụnnị w'a, onwọnni ihiẹn ọ marịn.

14Ọ pụhasọnmẹ d'a nọdị alị ọnụmụzọ iwe ẹ, ọ nọdịdẹ alị ebe kachanrịn elu e jẹn imẹ obodo,

15a kpọcheni ndị rị ụzọ ghafekọnị, ndị jẹnkọ nke wẹ,

16a sị, “Kụye ni ebeni, ụnụ ile nwọnlẹni hụn ụnụ marịn!” Ọ hụ a sị ndị nwọnlẹni nghọta,

17“Mirin wẹ zu ezu a sụọ asụọ; ihiẹn-oriri wẹ ri nzuzue asụọka!”

18Kanị amarịn wẹ nị wẹ burukọ ndị nwụnnị ebahụn, nị ndị a bịa oriri ọ kpọ a la mmọn.

← Chapter 8 Jump to: Chapter 10 →