Romans 2

Ika 2018 Bible

← Chapter 1 Jump to: Chapter 3 →

1Onwọnni nwan ihiẹn yụ nwẹn k'e kin, onyẹ hụn rị a ma ikpe! Makẹni, ebe ị nọ ma ndị ọzọ ikpe k'ị nọ ma enwẹn i ikpe. Makẹni, yụ nwẹn rị a ma wẹ ikpe rịzị e mẹ ihiẹn ị rị a manị wẹ ikpe.

2Ẹnyi a marịnghọ nị Osolobuẹ wụ onyẹ ezioku ebe ọ nọ ma ndị e mẹ ihiẹn ndị nọ ẹrịra ikpe.

3Ịyụ nwẹn hụn e mẹzi ihiẹn ndị hụ i gi a hangbu ndị ọzọ eṅẹn, i ro ni Osolobuẹ ekinkọ ị ikpe?

4Ra ị rị e lelịa okẹn ẹfọma a lẹ nkịtịn ọ rị a gba ị lẹ ndidin ẹ? Y'a marịn nị Osolobuẹ rị e mẹni i ẹfọmanị kẹni i hụn ụzọ rogharị?

5Kanị, ebe ị nọ a kpọkin obi i, a jụ nị y'e rogharịkọ, ị rị e kpọn afụnfụn e cheni afụnfụn hụn wẹ jẹnkọ d'e ye i Ụhụọhịn iwe-lẹ-ọnụma, ụhụọhịn ahụn Osolobuẹ k'e gi han eṅẹn ahụn zinrinni.

6Osolobuẹ k'a kụ onyẹ-onyẹ ụgwọ ihiẹn o mẹ.

7Nke ndị e mẹsọnmẹ mma makẹni wẹ rị a chọ nị Osolobuẹ ye wẹ ọghọ lẹ mgbaye lẹ ndụn nwọnlẹni ọgụgụ, Osolobuẹ k'e gi ndụn itẹbitẹ kụ wẹ ụgwọ.

8Kanị, Osolobuẹ k'e gi iwe-lẹ-ọnụma a sọn ndị hụn a chọ nke-wẹ nke-wẹ, a jụ ezioku, e sọn eje-ihiẹn;

9afụnfụn lẹ nsọngbu k'a rịnị onyẹ ọwụlẹ e mẹ eje-ihiẹn, ndị Ju wụ ibuzọ, o sọn ndị wụlẹni ndị Ju.

10Kanị Osolobuẹ k'e we ọghọ lẹ ikpẹn lẹ udọn ye ndị ile e mẹ ihiẹn rị mma, ndị Ju wụ ibuzọ, o sọn ndị wụlẹni ndị Ju.

11Makẹni Osolobuẹ ara gbeyeni ịhịan.

12Wẹ k'e ye ndị gilẹni Iwu Mozizi afụnfụn njọ wẹ, ajụkọ wẹ wẹ ukwere Iwu Mozizi; wẹ k'e ye ndị gi Iwu Mozizi afụnfụn njọ wẹ, wẹ gigụ Iwu Mozizi kin wẹ ikpe.

13Makẹni ẹlẹ ndị a nụhụ ihiẹn Iwu ku kẹ Osolobuẹ e kuni ọhụnma kanị ndị e mẹ ihiẹn Iwu ku.

14Omẹni ndị wụlẹni ndị Ju e gi uche wẹ mẹ ihiẹn Iwu Mozizi chọ, ọsụọn'a nị enwọn wẹ Iwu Mozizi, ya wụ nị e nwọnghọ wẹ iwu ahụn imẹ obi wẹ;

15omumẹ wẹ hụ a ghọsị nị Osolobuẹ e degụ Iwu ahụn imẹ obi wẹ, ịhọrị wẹ hụ a shịanị wẹ ẹri: obi wẹ hụ a ma wẹ ikpe mọbụ e kuni wẹ ọhụnma.

16Ẹrịra k'o jẹnkọ d'a rị Ụhụọhịn ahụn Osolobuẹ k'e gi gi ihiẹn zueri obi ịhịan kin ịhịan ikpe ghahanị Jesu Kristi kẹ m dọn rị e ku imẹ oziọma m rị e zi.

17Kanị, ị sị nị ị wụ onyẹ Ju? Ị hụ e gi Iwu Mozizi e dọn ẹnya, e gi Osolobuẹ a nyan isi;

18a nyan isi nị y'a marịnghọ uche Osolobuẹ, marịn ihiẹn ka mma, makẹni e gigụọ wẹ Iwu Mozizi zụn ị?

19Y'e gigụọ a dọn nị ị wụ onyẹ e du ndị ishi, n'ị wụ ukpẹ ndị rị imẹ ishi,

20n'ị yụ a dụn ndị nzuzu ọdụn — a kuzi ụmụẹka, nị amamihiẹn lẹ ezioku zu oke e ruọlẹ i ẹka makẹni i gi Iwu Mozizi?

21Ịyụ hụn a kuzi ndị ọzọ, ị hụ nwan a kuzi enwẹn i? Ịyụ hụn a sị, “Ezunlẹ ohin.” Ị hụ e zun?

22Ịyụ hụn a sị, “Aghẹrẹlẹ.” Ị hụ a ghẹrẹ? Ịyụ hụn a sị, “Arụalẹ mmọn, nị eje-ihiẹn rọ.” Ị hụ e jẹn ụlọ-mmọn d'e zun ohin?

23Ịyụ hụn gi Iwu Osolobuẹ a nyan isi, ị hụ a dan Iwu ahụn a fa Osolobuẹ?

24Ẹkụkwọ-nsọ sị, “Ụnụ ndị Ju haịn alị ndị ọzọ gi e kuja oku Osolobuẹ.”

25Nị ịhịan kwa ugun a banghọ erere omẹni ị hụ e dọnmẹ Iwu Osolobuẹ. Kanị, omẹni y'e nupụ isi okpuru Iwu ẹ, ugun ị kwa ẹlẹzi ugun nke-esi.

26O mẹ nwan nị ndị kwalẹni ugun e mẹ ihiẹn Iwu ku, ewerikọ wẹ wẹ nọkẹ ndị kwa ugun?

27Ya wụ nị ndị kwalẹni ugun ẹhụ, bụ wẹ hụ e dọnmẹ Iwu hụ jẹnkọ d'a shịagbu ụnụ ẹri — makẹni ụnụ gi Iwu wẹ detu, ụnụ a kwagụọzị ugun bụ ụnụ hụzị a dan Iwu hụ.

28Makẹni, ẹlẹ ihiẹn ẹnya e legha kẹ ịhịan gi a wụ onyẹ Ju; ezigbo ugun ẹlẹ hụn wẹ kwahụ ẹhụ w'e legha ẹnya.

29Kama, ezigbo onyẹ Ju wụ ihiẹn imẹ obi; ezigbo ugun wụzị ihiẹn imẹ-mmọn, ẹlẹ oku mkpụrụ-oku wẹ detu. Onyẹ nọ ẹnịna a narịn ịja-mma ẹka Osolobuẹ, ẹlẹ ẹka ịhịan.

← Chapter 1 Jump to: Chapter 3 →