Romans 3

Ika 2018 Bible

← Chapter 2 Jump to: Chapter 4 →

1Kị ndị Ju gizi nwan ka ndị ọzọ mma? Elee erere kẹ ịkwa-ugun banzị nwan?

2O bukẹkwọ! Nke ibuzọ, ndị ju kẹ Osolobuẹ buche oku gha a ọnụ pụha ẹka.

3Omẹni ụfọdụ egin'ẹ dọn, ya kẹ ẹnyi e gi nwan sị nị Osolobuẹ ẹlẹ onyẹ wẹ e gi dọn ẹnya?

4Mba, kaka! Osolobuẹ ya wụrụ onyẹ ezioku, ọsụọn'a nị ịhịan ile wụ ndị-ntụ. Ọ nọhụ kẹ Ẹkụkwọ-nsọ dọn ku ẹ, sị, “Wẹ k'a hụn a nị ihiẹn i ku wụ ezioku; wẹ kin i ikpe, i k'e ri eṅẹn.”

5O mẹ nwan nị eje-omumẹ ẹnyi e mẹ wẹ a hụnchanrịn ezi-omumẹ Osolobuẹ, kị ẹnyi e ku nwan? Nị ẹnyi sị nwan nị Osolobuẹ mẹ njọ ebe ọ nọ ye ẹnyi afụnfụn? (M rị e ku ẹ kẹ ịhịan).

6Kaka! Omẹni Osolobuẹ te wụ onyẹ njọ, nanị o dọn nwan kin ụwa ikpe?

7Ẹghẹẹ, omẹkwọ ni ntụ m kẹ ezioku Osolobuẹ gi a pụhachanrịn ifọn, e wẹhẹn'ẹ ọghọ, kị w'a mazịnị m nwan ikpe nị m wụ onyẹ-njọ?

8Kị haịn ẹnyi gilẹni nwan sị, “Nị ẹnyi mẹsọnmẹ eje-ihiẹn kẹni ihiẹn rị mma gha imẹ ẹ pụha?” (Bụ ya kẹ ndị rị e kuja oku ẹnyi sị nị ya kẹ ẹnyi e ku. Wẹ furu w'a ma ikpe).

9Kị mẹzi? Ẹnyi ndị Ju kadẹ nwan ndị ọzọ mma ra? Kaka akpohu! Ẹnyi e kugụọl'a nị njọ rị a kị ịhịan ile, kẹ ndị Ju kẹ ndị wụlẹni ndị Ju.

10Ya kẹ Ẹkụkwọ-nsọ ku nị, “Onyẹ ezi-omumẹ arị, kaka akpụ-ohu;

11onwọnni onyẹ a ghọtanị, onwọnni onyẹ a chọ Osolobuẹ.

12Ịhịan ile a kpahugụọ; wẹ ile e wiwigụọ; onwọnni onyẹ e mẹ ihiẹn rị mma, onwọnni kaka akpụ onyẹ ohu.

13Ẹkpịrị wẹ gha e ku oku wụ ili rị oghe; ire wẹ gi e ku oku wụ ndufie-ndufie, oku rị wẹ ụgb'ọnụ wụ ẹdide agwọ.

14Ịkpọ-iyi lẹ eje-oku jun wẹ ọnụ.

15Ụkụ a kẹrẹka wẹ igbu-ọchụn.

16Ebe ọwụlẹ wẹ jẹn, ntikpọ-ntikpọ lẹ nsọngbu kẹ w'e buhẹ.

17Ama wẹ chọ udọn.

18Egun Osolobuẹ arịdẹ wẹ ẹnya.”

19Ẹnyi a marịnghọ nị ihiẹnni ile Iwu ku, nị ndị rị okpuru Iwu k'ọ rị a gwa, kẹni ịhịan ile kinbehi, ụwa ile a rịọma Osolobuẹ dodo.

20Makẹni, onwọnni onyẹ jẹnkọ d'e gi idọnmẹ Iwu Mozizi wụrụ onyẹ ezi-omumẹ ebe Osolobuẹ rị, makẹni Iwu Mozizi ke wẹ gidẹ a ghọsị ịhịan n'o mẹọlẹ njọ.

21Osolobuẹ a ghọsịgụọ ezi-omumẹ hụn wụ nke ẹ, bụ ẹlẹ oku Iwu Mozizi. Kanị Iwu Mozizi lẹ ihiẹn ndị-amụma de imẹ Ẹkụkwọ-nsọ hụ a shịa ẹri nị ya wụ ezi-omumẹ Osolobuẹ:

22ezi omumẹ Osolobuẹ hụn a bịa ghahanị ikwerini Jizọs Kraịstị rọ; o ru ndị ile kwerini ẹka, ara tu onyẹ ịhịan wụ,

23makẹni ịhịan ile e mẹgụọ njọ, tuhu ọghọ Osolobuẹ ye wẹ;

24wẹ rị nwan e ye wẹ ezi-omumẹ e ye makẹ ẹfọma Osolobuẹ, makẹni o tumẹgụọ ihiẹn wẹ gi a gbarị isi imẹ Kraịstị wụ Jizọsị.

25Makẹni, Osolobuẹ we Jesu ye, gi ẹ họnrin ẹjan wẹ e gi wepụ njọ jẹnni onyẹ hụn gi ẹdeke ẹ hụn wụ ọnwụn a dọn, kẹni o we ẹnya nị Osolobuẹ wụkwọ onyẹ ezi-omumẹ ghalẹni a kwadọn njọ ebe ọ nọ din ndidin fepụ ẹnya njọ ịhịan mẹ mbụ.

26Ya k'o gi mẹ ihiẹnni ogẹnni, gi ghọsị n'ọ wụ onyẹ ezioku, n'ọ wụ onyẹ ezi-omumẹ lẹ n'o furughọ n'ọ nabanhan onyẹ kwerini Jesu rịkẹ onyẹ ezi-omumẹ.

27Kị ịhịan k'e gizi nwan nyan isi? Onwọnzini. Kị haịn nwan? Makẹni ẹlẹzi ọrụn kẹ wẹ gi e mẹ ẹ kanị okukwe.

28Ya wụ, ẹnyi gi ẹ dọn nị okukwe ịhịan kẹ Osolobuẹ gi e kuni ịhịan ọhụnma, ẹlẹ idọnmẹ Iwu.

29Chuku wụdẹ Chuku ndị Ju sụọ ra? Ẹlẹzi ya ke ndị wụlẹni ndị Ju? Ẹghẹẹ, ịya wụzị Chuku hụn ke ndị wụlẹni ndị Ju,

30ebe o mẹ ni Osolobuẹ wụ ohu sụọ. Ya k'o gi mẹ ni o k'e gi okukwe ndị Ju kuni wẹ ọhụnma, gizi okukwe ndị wụlẹni ndị Ju kuni wẹ ọhụnma.

31Ẹnyi rịdẹ nwan e gi oku okukweni a kagbu Iwu Mozizi ra? Mba, kaka; ẹnyi rị e gi ẹ a kwadọn ẹ.

← Chapter 2 Jump to: Chapter 4 →