1 Samuel 11

Ilokano (Ti Biblia (1973))

← Chapter 10 Jump to: Chapter 12 →

1Idin ni Naas nga Ammonita simmang-at, ket nagpacarso a maibusor iti Jabes-galaad: ket amin a tattao ti Jabes kinunada ken Naas, Mangaramidca cadacami iti maysa a tulag, ket agservicamto kenca.

2Ket ni Naas nga Ammonita kinunana cadacuada, Iti castoy ti panangaramidco ti tulag cadacayo, nga amin dagiti matayo a makincanawan masuatda; ket isu isaadconto a maysa a pacaibabainan iti amin nga Israel.

3Ket dagiti lallacay ti Jabes kinunada kencuana, Iccannacami iti pito nga aldaw a paway-way, tapno mangibaoncami coma cadagiti babaonen agingga cadagiti amin a bedbeddeng ti Israel; ket iti casta, no awan ti mangisalacan cadacami, rumuarcamto kenca.

4Idin immay dagiti babaonen iti Gabaa ni Saul, ket insaoda dagitoy a sasao cadagiti laplapayag ti umili; ket amin nga umili inngatona ti timecna, ket nagsangitda.

5Ket, adtoy, ni Saul immay a sumarsaruno cadagiti vacvaca a naggapu iti away; ket ni Saul kinunana, Ania ti ut-uten ti umili nga agsangitda? Ket isuda imbagada kencuana dagiti sasao dagiti tattao ti Jabes.

6Ket ti Espiritu ti Dios immapay a sipipigsa iti rabaw ni Saul idi a nangngegna dagitoy a sasao, ket ti pungtotna simged a casta unay.

7Ket isu nangala iti sancaparis a vaca, ket rinangcayna, ket imbaonna ida cadagiti amin a bedbeddeng ti Israel iti ima dagiti naibaon, a kinunana, Uray siasinoman a di-umay sumurot cada Saul ken ni Samuel, castoy ti maaramidto cadagiti vacvacana. Ket ti panagbuteng ken Jehova nagtinnag iti umili, ket isuda rimmuarda a cas maymaysa a lalaki.

8Ket isu binilangna ida idiay Bezec; ket dagiti annac ti Israel tallo gasut a ribuda, ket dagiti lallaki ti Juda tallopulo a ribuda.

9Ket isuda kinunada cadagiti naibaon nga immay idi, Castoy ti saoenyonto cadagiti tattao ti Jabes-galaad, Intono bigat, iti horas ti ipupudot ti init, addaancayto iti pannacaisalacan. Ket dagiti naibaon immayda ket imbagada cadagiti tattao ti Jabes: ket isuda naragsacda.

10Gapuna a dagiti tattao ti Jabes kinunada, Intono bigat rumuarcaminto cadacayo, ket aramidenyonto cadacami ti isu-amin nga ipagarupyo a naimbag cadacayo.

11Ket iti casta iti bigat, a ni Saul incabilna dagiti tattao cadagiti nagcatlo cabuyotan; ket immayda iti tengnga ti pacarso iti panagbantay iti bigat, ket kinabilda dagiti Ammonitas agingga iti capudot ti aldaw: ket naaramid, a dagidiay a natda nawarawarada, iti casta nga awan idi ti dua cadacuada a nabaybay-an a nagtipon.

12Ket ti ili kinunana ken Samuel, Asino ti nagcuna, Ni Saul agarinto aya cadatayo? alaenyo dagiti tattao, tapno papatayenmi ida.

13Ket ni Saul kinunana, Awanto ti uray maysa a tao a mapapatay ita nga aldaw; ta ita nga aldaw ni Jehova nagaramid iti pannacaisalacan iti Israel.

14Idin kinuna ni Samuel iti umili, Umaycayo, ket intayo coma idiay Gilgal, ket pabaroentayo ti pagarian idiay.

15Ket amin nga umili napan idiay Gilgal; ket idiay isuda inaramidda ni Saul nga ari iti sango ni Jehova idiay Gilgal; ket idiay indatonda dagiti sacrificio dagiti daton ti cappia iti sango ni Jehova; ket idiay ni Saul ken amin a tattao nagragragsacda iti casta unay.

← Chapter 10 Jump to: Chapter 12 →