1 Samuel 5

Ilokano (Ti Biblia (1973))

← Chapter 4 Jump to: Chapter 6 →

1Ket dagiti Filisteos innalada ti lacasa ti Dios, ket isu inyegda manipud Eben-ezer agingga iti Asdod.

2Ket dagiti Filisteos innalada ti lacasa ti Dios, ket isu inyegda iti uneg ti balay ni Dagon, ket, isu insaadda iti denna ni Dagon.

3Ket idi a dagiti taga Asdod bimmangonda a nasapa iti bigat, adtoy, ni Dagon natnag idi a napacleb iti daga iti sango ti lacasa ni Jehova. Ket isuda innalada ni Dagon, ket isu insaadda manen idi lugarna.

4Ket idi nga isuda bimmangonda a nasapa iti sumaruno a bigat, adtoy, ni Dagon natnag a napacleb iti daga iti sango ti lacasa ni Jehova; ket ti olo ni Dagon ken dagiti dua a dacolap dagiti imana addada a naputed iti dapian ti ruangan; ti laeng cadaclan a bagi ni Dagon ti nabati kencuana.

5Gapuna a dagiti papadi ni Dagon, ken amin dagiti sumrec iti balay ni Dagon, dida baddeken ti dapian ti ruangan ni Dagon idiay Asdod agingga itoy nga aldaw.

6Ngem ti ima ni Jehova nadagsen idi cadacuada idiay Asdod ket dinadaelna ida, ket kinabilna ida cadagiti bosbosali, idiay Asdod met laeng ken cadagiti bedbeddengna.

7Ket idi a makita daytoy dagiti tattao ti Asdod ti casta, kinunada, Ti lacasa ti Dios ti Israel di makipagtaeng coma cadatayo: ta ti imana nadagsen cadatayo ken iti rabaw ni diostayo a Dagon.

8Ket nagbaonda ngarud ket inurnong ida met laeng dagiti amin nga appoen dagiti Filisteos, ket kinunada, Ania ti aramidentayo iti maipapan iti lacasa ti Dios ti Israel? Ket isuda simmungbatda: Mayallatiw coma ti lacasa ti Dios ti Israel idiay Gat. Ket inyallatiwda idiay ti lacasa ti Dios ti Israel.

9Ket idi a casta calpasan ti panangyallatiwda, ti ima ni Jehova maibuson iti ili iti dackel a pannacariribuc: a kinabilna dagiti tattao ti ili bassit man; ken dackel ket dagiti bosbosali rimmuar cadacuada.

10Iti casta imbaonda ti lacasa ti Dios idiay Ecron. Ket naaramid, idi a ti lacasa ti Dios immay idiay Ecron, a dagiti Ecronitas imkisda, a kinunada, Isuda inyegda ti lacasa ti Dios ti Israel cadatayo, tapno papatayendatayo ken ti ilitayo.

11Gapuna a nagbaonda, ket pinaornongda amin nga appoen dagiti Filisteos, ket kinunada, Ibaonyo ti lacasa ti Dios ti Israel, ket mapan coma man met laengen iti lugarna, tapno dinacami coma papatayen, ken ti ilimi. Ta adda idi macappatay a pannacariribuc iti isu-amin nga ili; ti ima ti Dios nadagsen unay idi idiay.

12Ket dagiti tattao idi a saan a natay nacabilda idi cadagiti bosbosali; ket ti ickis ti ili ngimmato idiay langit.

← Chapter 4 Jump to: Chapter 6 →