1 Samuel 25 — Ilokano (Ti Biblia (1973))

1Ket ni Samuel natay; ket amin nga Israel naguornongda, ket isu dinung-awanda, ket isu intabonda idi balayna idiay Rama. Ket ni David timmacder ket simmalog agingga iti let-ang ti Faran.

2Ket adda idi maysa a lalaki sadi Maon, a dagiti cucuana addada idi idiay Carmelo; ket ti lalaki nasanicua unay idi, ket addaan idi iti tallo ribu a carnero, ken sangaribu a calding: ket isu agpucpukis idi cadagiti carcarnerona idiay Carmelo.

3Ket ti nagan ti lalaki Nabal; ket ti nagan ti asawana Abigail; ket ti babai nasaririt unay, ken napintas ti langana: ngem di lalaki nasabrac ken managdacdakes cadagiti aramidna; ket capuonan ti balay ni Caleb.

4Ket ni David nangngegna idiay let-ang a ni Nabal agpucpukis idi cadagiti carnerona.

5Ket ni David nangibaon iti sangapulo a lallaki nga agtutubo, ket ni David kinunana cadagiti agtutubo a lallaki, Sumang-atcayo iti Carmelo, ket incayo ken Nabal, ket icablaawyo kencuana ti naganco:

6Ket castoy ti saoenyonto kencuana nga agbiag iti kinarang-ay, Talna ti adda coma kenca, ken talna ti adda coma iti balaymo, ken talna ti adda coma iti amin nga icutam.

7Ket ita nangngegco nga addaanca cadagiti pagpukisen: dagiti pastormo addada idi cadacami, ket dicami inaramid cadacuada ti ranggas, awan idi ti uray ania a panagcurang cadacuada iti amin bayat ti caaddada idi idiay Carmelo.

8Saludsudem cadagiti agtutubom a lallaki, ket ibagadanto kenca: gapuna a palubosam coma a dagiti agtutubo a lallaki macasaracda iti parabur cadagiti matam: ta umaycami iti maysa a nasayaat nga aldaw: agdawatac kenca, mangtedca, ti uray ania nga ipaimam cadagiti adipenmo ken ni anacmo a David.

9Ket idi a dagiti agtutubo a lallaki ni David dimtengda, imbagada ken Nabal ti mayannurot cadagiti isu-amin a sao iti nagan ni David, ket simmardengda.

10Ket ni Nabal simmungbat cadagiti adipen ni David, ket kinunana, Asino aya ni David? ket asino ti anac ni Isai? adu nga ad-adipen cadagitoy nga aldaw nga intalawanda tunggal maysa ti apona.

11Alaecto ngarud ti tinapayco ken ti danumco ken ti cucuac a lasag a pinartic, a maipaay cadagiti pagpukisec, ket itedco ida cadagiti lallaki isuda a diac ammo no taga anoda?

12Iti casta dagiti agtutubo a lallaki ni David nagbawingda iti dalanda, ket nagsublida, ket immayda ket imbagada kencuana ti mayannurot cadagitoy amin a sao.

13Ket ni David kinunana cadagiti lallakina, Ibarikesyo tunggal maysa a lalaki ti campilanna. Ket imbarikesda tunggal maysa ti campilanna; ken castamet ni David imbarikesna ti campilanna: ket simmang-atda a simmurot ken David ti aguppat a gasut a lallaki: Ket dua a gasut ti nagbantay iti gargaret.

14Ngem maysa nga agtutubo a lalaki imbagana ken Abigail nga asawa ni Nabal, a kinunana, Adtoy, ni David nangibaon cadagiti babaonen a naggapu iti let-ang a cumablaaw ken apomi; ket linaisna ida.

15Ngem dagiti lallaki naimbagda unay idi cadacami, ket dacami saancami idi a naranggasan, awan ti nagcurang cadacami nga uray aniaman, iti bayat ti ipapanmi icucuyog cadacuada, idi addacami cadagiti awaway:

16Isuda idi ti maysa a bacud cadacami nga agpadpada iti rabii ken iti aldaw, iti bayat amin a tiempo a caaddami idi cadacuada nga agay-aywan cadagiti carnero.

17Gapuna ita ammoem ken otobem no ania ti aramidemto; ta ti dakes naikeddengen a maibusor ken apomi, ken maibusor iti amin a balayna: ta isu maysa a casta unay a damsac a tao nga awan ti macabalin nga agsao kencuana.

18Idin ni Abigail nagdaras ket nangala iti dua gasut a tinapay, ken dua gasut a casupot a lalat nga arac, ken lima a carnero a naparti, ken lima casucat ti kinirog a bucbukel, ken sangagasut a caraay a pinakebbet nga uvas, ken dua gasut a catipkel nga higos, ket insaadna iti rabaw dagiti asno.

19Ket kinunana cadagiti agtutubona a lallaki, Incayo iti unac; adtoy, a sumurotacto cadacayo. Ngem isu dina imbaga ken asawana a Nabal.

20Ket idi a casta, idi a nacasacay iti asnona, ket simmalog a nalimed iti dalan ti bantay, nga, adtoy, ni David ken dagiti lallakina simmalogda nga agturong kencuana; ket sinabetna ida.

21Ni David kinunana idi, Pudno nga ubbaw ti panangaywanco idi iti amin nga icutan daytoy a tao idiay let-ang, tapno awan ti nagcurang ti amin a cucuana: ket isu insupapacna caniac ti dakes a gapu iti naimbag.

22Ti Dios aramidenna ti casta cadagiti cabusor ni David, ken nacarcaro pay met, no tiddaec ti anniaman iti amin a cucuana agingga iti aglawag ti bigat, nga uray no maysa nga ubing a lalaki.

23Ket idi a ni Abigail naimatanganna ni David, isu nagdaras, ket dimsaag iti asnona, ket incul-obna ti rupana iti daga iti sango ni David, ket nagrucob iti daga.

24Ket isu nagpacleb cadagiti sacana, ket kinunana, Caniac, apoc, caniac coma ti yan ti kinadangkes; ket dawatec kenca, palubosam coma ti babai nga adipenmo, nga agsao cadagita lapagaymo, ken denggem ti sao ti babai nga adipenmo.

25Dawatec kenca, nga apoc saanna coma, nga icancano daytoy dakes a tao, a ni Nabal met laeng; ta no casano ti naganna, casta met laeng ti kinaisuna; Nabal isu ti naganna, ket ti kinamaag adda kencuana: ngem siac a babai nga adipenmo diac naimatangan dagiti agtutubo a lallaki ti apoc, isuda nga imbaonmo.

26Gapuna ita, apoc, cas ni Jehova sibibiag, ken cas ta cararuam sibibiag, idinto a ni Jehova ti nangiparit kenca iti pannacabiddut iti dara, ken iti pannacaibalesmo iti imam met laeng, gapuna ita a bay-am dagiti cabusormo, ken dagidiay nga agsapul iti pagdacsan ti apoc, nga isuda dagiti cas ken Nabal.

27Ket ita daytoy sagut a ti adipenmo yegna iti apoc, isu ti maited coma cadagiti agtutubo a lallaki a sumurot iti apoc.

28Dawatec kenca, a pacawanem ti panaglabsing ti babai nga adipenmo: ta pudno unay a ni Jehova mangaramidto iti apoc iti maysa a natalged a balay, agsipud ta ti apoc makigubat cadagiti gubgubat ni Jehova; ket ti kinadakes dinto masaracan kenca cadagiti isu-amin nga aldawmo.

29Ket nupay no tumacder coma ti lalaki a cumamat kenca, ken agsapul ita cararuam, nupay casta ti cararua ni apoc masingdananto iti galut ti biag ken Jehova a Diosmo; ket dagiti cararua dagiti cabusormo ipallatibongnanto ida, a cas iti aggapu iti ambayon ti pallatibong.

30Ket maaramidto, intono ni Jehova aramidenna iti apoc ti mayalubog iti amin nga imbag nga insaona maipapan kenca, ket dutocannacanto a pangolo iti Israel,

31A daytoy saan a pagtibcolan kenca, wenno macadadael ti puso iti apoc, gapu ta imbucbocmo ti dara nga awan ti gapuna, wenno bimmales ti apoc babaen iti imana met laeng. Ket intono ni Jehova aramidennanto ti naimbag iti apoc, malagipmonton toy adipenmo a babai.

32Ket ni David kinunana ken Abigail, Bendito ni Jehova, a Dios ti Israel, a nangibaon kenca ita nga aldaw a sumabet caniac.

33Bendito coma ta kinasaluadmo, ken benditaca coma, a nangiliclic caniac ita nga aldaw iti pannacabiddut iti dara, ken iti pannacaibalesco babaen iti imac met laeng.

34Ta iti kinapudnona unay, cas ni Jehova, a Dios ti Israel sibibiag, a nangiparit caniac iti panangranggasco kenca, ta no dica coma nagdaras nga immay simmabet caniac, pudno nga idiay awan malabasan ken Nabal agingga iti aglawag ti bigat nga uray no maysa nga ubing a lalaki.

35Iti casta ni David inawatna iti ima ni Abigail daydi nga inyegna kencuana: ket ni David kinunana kencuana, Sumang-atca a sitatalna agingga iti balaymo; kitaem, impangagco ti timecmo, ket impategca.

36Ket ni Abigail immay ken Nabal; ket, adtoy, isu addaan idi iti rambac iti balayna, a cas la rambac ti maysa nga ari; ket ti puso ni Nabal naragsac unay iti unegna, ta nabartec unayen: gapuna a ni Abigail awan a pulos ti imbagana kencuana, bassit man wenno adu agingga iti aglawag ti bigat.

37Ket naaramid iti bigat, idi a ni Nabal naunawan iti arac, a ni asawana imbagana kencuana dagitoy a banag, ket ti pusona natay iti unegna, ket isu nagbalin a cas la bato.

38Ket naaramid iti agsangapulo nga aldaw iti calpasanna, a ni Jehova kinabilna ni Nabal, iti casta natay.

39Ket idi a ni David nangngegna a ni Nabal natay kinunana, Bendito ni Jehova a nangsalucob iti gapu ti pannacaumsic iti ima ni Nabal, ket linappedanna ti adipenna iti dakes: ket ti dakes nga aramid ni Nabal insupapac ni Jehova iti rabaw ti olona met laeng. Ket ni David nagbaon ket nagsao maipanggep ken Abigail, ti panangasawana kencuana.

40Ket idi a dagiti adipen ni David immayda ken Abigail idiay Carmelo, nagsaoda kencuana, a kinunada, Ni David imbaonnacami kenca, tapno alaendaca a maipaay kencuana nga asawa.

41Ket isu timmacder ket incul-obna di rupana iti daga, ket kinunana, Adtoy, ti babai nga adipenmo a mangbuggo cadagiti sacsaca dagiti adipen ni apoc.

42Ket ni Abigail nagdaras, ket timmacder, ket simmacay iti maysa nga asno, agraman cadagiti lima a babbalasangna a simmurot kencuana; ket simmurot idi cadagiti imbaon ni David, ket nagbalin nga asawana.

43Ni David innalana met ni Ahinoam ti Jezreel, ket isuda nagbalinda nga assawana nga agpadpada.

44Nupay casta ni Saul intedna ni Micol nga anacna, nga asawa ni David, ken ni Palti, nga anac a lalaki ni Lais, a taga Gallim.