1 Samuel 8

Ilokano (Ti Biblia (1973))

← Chapter 7 Jump to: Chapter 9 →

1Ket naaramid idi a ni Samuel lacayen, nga inaramidna dagiti annacna a lallaki nga oc-ocom iti Israel.

2Ket ti nagan ti inauna nga anacna Joel; ket ti nagan ti maicadua, Abia: isuda idi dagiti oc-ocom idiay Beer-seba.

3Ket dagiti annacna saanda idi a nagna cadagiti daldalanna, no di ket simmiasida a siaannurot iti kinaagum, ket nagalada cadagiti pannocsoc, ket kinilloda ti kinajusticia.

4Idin dagiti isu-amin a lallacay ti Israel naguornongda a nagtitipon, ket immayda ken Samuel idiay Rama;

5Ket isuda kinunada kencuana, Adtoy sica lacaycan, ket dagiti annacmo a lallaki dida magna cadagiti daldalanmo: ita mangaramidca cadacami ti maysa nga ari a mangocom cadacami a cas cadagiti amin a nasnacion.

6Ngem ti banag saan a nacaay-ayo ken Samuel, idi nga isuda kinunada, Iccannacami iti maysa nga ari a mangocom cadacami. Ket ni Samuel nagcararag ken Jehova.

7Ket ni Jehova kinunana ken Samuel, Ipangagmo ti timec ti ili iti amin a cunada kenca; ta isuda didaca inumsi, no di ket siac ti inumsida tapno saanac coma nga agari cadacuada.

8Cas mayannurot iti amin nga ar-aramid nga inaramidda nanipud iti aldaw a panangaonco cadacuada idiay Egipto agingga met laeng itoy nga aldaw, iti daydiay panangidianda caniac, ket nagservida cadagiti sabsabali a didios, castamet ti aramidenda kenca.

9Ita ngarud ipangagmo ti timecda: ngem sica isupiatmonto a sidadaeg unay cadacuada, ket ipalawagmonto cadacuada ti wagas ti ari nga agarinto cadacuada.

10Ket ni Samuel imbagana dagiti amin a sasao ni Jehova iti umili a nagdawat kencuana iti maysa nga ari.

11Ket isu kinunana, Daytoy isunto ti wagas ti ari nga agarinto cadacayo: isu alaennanto dagiti annacyo a lallaki, ket dutocannanto ida a maipaay kencuana, nga agaywan cadagiti lugluganna, ken tapno isuda dagiti tattaona nga agcabcabayo; ket isuda agtaraydanto iti sango dagiti lugluganna;

12Ket isu dutocannanto ida a maipaay kencuana, nga agservi a capcapitan dagiti rinibu, ken capcapitan dagiti linimapulo; ket isu isaadnanto ti dadduma nga agarado iti dagana ken agani iti panaganina, ket aramidenna nga ar-aruatenna iti gubat, ken ar-aruaten dagiti lugluganna.

13Ket isu alaennanto dagiti annacyo a babbai tapno isuda dagiti agararamid iti bangbanglo, ken tapno isuda dagiti aglutluto, ken tapno isuda dagiti agtintinapay.

14Ket isu alaennanto dagiti taltalonyo, ken dagiti uvasanyo, ken dagiti caolivaanyo, a dagiti met laeng casasayaatan unay cadacuada, ket itednanto ida cadagiti ad-adipenna.

15Ket isu alaennanto ti apagcapullo dagiti bucbukelyo, ken dagiti cauvasanyo, ket itednanto cadagiti pagturayenna, ken cadagiti adipenna.

16Ket isu alaennanto dagiti ad-adipenyo a lallaki ken dagiti ad-adipenyo a babbai, ken dagiti cataeran nga agtutuboyo a lallaki, ken dagiti as-asnoyo, ket icabilnanto ida iti trabajona.

17Isu alaennanto ti apagcapullo dagiti ar-arbanyo: ket dacayto dagiti ad-adipenna.

18Ket dacayo umkiscayto iti daydiay nga aldaw a gapu iti ariyo a piniliyo cadacayo; ket ni Jehova dinto sumungbat cadacayo iti daydiay nga aldaw.

19Ngem ti ili dina kinayat a impangag ti timec ni Samuel; ket kinunada, Saan; no di ket dacami cayatmi ti maysa nga ari nga agturay cadacami,

20Tapno dacami met agbalincami a cas cadagiti amin a nasnacion, ken tapno ti arimi ocomennacami coma, ken rumuar coma iti sangomi, ken makibacal cadagiti gubgubatmi.

21Ket ni Samuel dinengngegna amin dagiti sasao ti umili, ket inulitna ida cadagiti pagdengngeg ni Jehova.

22Ket ni Jehova kinunana ken Samuel, Ipangagmo ti timecda, ket yaramidam ida iti maysa nga ari. Ket ni Samuel kinunana cadagiti tattao ti Israel, Mapancayo tunggal tao iti ilina.

← Chapter 7 Jump to: Chapter 9 →