1 Samuel 3

Ilokano (Ti Biblia (1973))

← Chapter 2 Jump to: Chapter 4 →

1Ket ni ubing a Samuel nagannong idi ken Jehova iti sango ni Eli. Ket ti sao ni Jehova napated idi cadagidi nga al-aldaw; awan idi ti masansan a sirmata.

2Ket naaramid iti daydi a tiempo, idi a ni Eli adda a nagidda idi lugarna (ket dagiti matana nangrugida a cumudrep, iti casta a dina mabalin idi ti cumita).

3Ket ti pagsilawan ti Dios saan pay a naiddep, ket ni Samuel nagidda idi a maturog, idi templo ni Jehova, isu nga yan idi ti lacasa ti Dios;

4A ni Jehova inayabanna ni Samuel; ket isu simmungbat, Adtoyac.

5Ket isu timmaray agingga ken Eli, ket kinunana, Adtoyac; ta sica inayabannac. Ket isu kinunana, Diac immayab; agiddaca manen. Ket isu napan ket nagidda.

6Ket ni Jehova immayab pay manen, Samuel. Ket ni Samuel bimmangon ket napan ken Eli, ket kinunana, Adtoyac; ta sica inayabannac. Ket isu simmungbat, Diac immayab, anacco; agiddaca manen.

7Ngem ni Samuel dina pay laeng ammo idi ni Jehova, awan pay met laeng idi ti sao ni Jehova a naipaltiing kencuana.

8Ket ni Jehova inayabanna manen ni Samuel iti maicatlo a daras. Ket isu bimmangon ket napan ken Eli, ket kinunana, Adtoyac; ta sica inayabannac. Ket ni Eli naawatanna a ni Jehova ti nangayab idi ubing.

9Gapuna a ni Eli kinunana ken Samuel, Inca, agiddaca; ket no cas isu ayabannaca, a sica cunamto, Agsaoca, Jehova; ta ti adipenmo denggenna. Iti casta ni Samuel napan ket nagidda idi lugarna.

10Ket ni Jehova immay ket nagintec, ket immayab a cas cadagidi sabali a daras, Samuel, Samuel. Idin ni Samuel simmungbat, Agsaoca; ta ti adipenmo denggenna.

11Ket ni Jehova kinunana ken Samuel, Adtoy, siac mangaramidacto iti maysa a banag iti Israel, nga dagiti dua a lapayag ti uray siasinoman a macangeg agbibinegdanto.

12Iti daydiay nga aldaw aramidecto a maibusor ken Eli amin nga insaoc a maipapan iti balayna, manipud iti pangrugian agingga met laeng iti pagtungpalan.

13Ta imbagac kencuana nga ocomecto ti balayna a maipaay iti agnanayon, gapu iti kinadangkes nga naammoanna; agsipud ta dagiti annacna a lallaki inyegda ti maysa a lunod cadacuada met laeng, ket isu dina ida tinubngar.

14Ket iti casta insapatac iti balay ni Eli, a ti kinadangkes ti balay ni Eli saanto a maguroran iti sacrificio wenno daton iti agnanayon.

15Ket ni Samuel nagidda agingga iti bigat, ket linuctanna dagiti ruruangan ti balay ni Jehova. Ket ni Samuel nagbuteng a nangibatad ken Eli idi sirmata.

16Idin ni Eli inayabanna ni Samuel, ta kinunana, Samuel, anacco. Ket isu simmungbat, Adtoyac.

17Ket isu kinunana, Ania a banag daydiay a ni Jehova insaona kenca? Dawatec kenca a dica ilimed caniac: ti Dios aramidenna kenca ti casta, ken ad-adda pay met coma, no sica ilimedmo coma caniac ti uray aniaman cadagiti amin a banag nga insaona kenca.

18Ket ni Samuel imbagana kencuana a sinaggaysa, ket awan a pulos ti inlimedna kencuana. Ket isu kinunana, Isu ni Jehova: aramidenna coma ti inanamaenna a naimbag.

19Ket ni Samuel dimmackel, ket ni Jehova adda idi kencuana, ket dina impalubos a matnag iti daga ti uray no maysa cadagiti saona.

20Ket amin nga Israel manipud Dan agingga met laeng iti Beer-seba, binibigna a ni Samuel napasingkedan a mammadto ni Jehova.

21Ket ni Jehova nagparang manen kencuana idiay Silo: ta ni Jehova nagpalgac ken Samuel idiay Silo iti pannacaaramat ti sao ni Jehova.

← Chapter 2 Jump to: Chapter 4 →