Amos 1

Ilokano (Ti Biblia (1973))

Jump to: Chapter 2 →

1Dagiti sasao ni Amos, isu nga adda idi cadagiti agpaspastor idiay Tecua, isuda a naimatanganna a maipapan iti Israel cadagiti al-aldaw ni Uzias, ari ti Juda, ken cadagiti al-aldaw ni Jeroboam nga anac ni Joas, ari ti Israel, iti dua a tawen iti casangoanan ti gingined.

2Ket kinunana, Ni Jehova agungorto manipud idiay Sion, ket agtimec manipud idiay Jerusalem; ket dagiti pagpaaraban dagiti agpaspastor agpanesdanto, ket aglaylayto iti tapaw ti Carmelo.

3Castoy ti saoen ni Jehova: Maipuon iti tallo a salungasing ti Damasco, wen, maipuon iti uppat, diacto ibawing ti dusana; agsipud ta iniricda ti Galaad babaen cadagiti pagtaltag a landoc.

4Ngem ipawitconto ti apuy iti balay ni Hazael, ket ikisapnanto dagiti palacio ni Ben-hadad.

5Ket lasangecto ti balunet ti Damasco, ket dadaelecto ti agnaed iti lobong ti Aven, ken daydiay agiggem ti cetro iti balay ti Eden; ket iti ili ti Siria macayawanto idiay Kir, cuna ni Jehova.

6Castoy ti saoen ni Jehova: Maipuon iti tallo a salungasing ti Gasa, wen, maipuon iti uppat, diacto ibawing ti dusana; agsipud ta kinayawanda ti amin nga umili a yawat ida iti Edom.

7Ngem ipawitconto ti apuy iti bacud ti Gaza, ket ikisapnanto amin a palaciona.

8Ket dadaelecto ti agnaed idiay Asdod ken daydiay agiggem ti cetro idiay Ascalon; ket isublicto ti imac a maibusor iti Ecron, ket ti matda cadagiti Filisteos mapucawto, cuna ni Apo Jehova.

9Castoy ti saoen ni Jehova: Maipuon iti tallo a salungasing ti Tiro, wen, maipuon iti uppat, diacto ibawing ti dusana; gapu ta inyawatda ti amin nga umili iti Edom, ket dida linagipen ti naincabsatan a tulag.

10Ngem ipawitconto ti apuy iti bacud ti Tiro, ket ikisapnanto dagiti palaciona.

11Castoy ti saoen ni Jehova: Maipuon iti tallo a salungasing ti Edom, wen, maipuon iti uppat, diacto ibawing ti dusana; ta kinamatcamatna ti cabsatna iti campilan; ket indianna ti amin a caasi, ket ti ungetna nangpigis a cancanayon, ket tinaginayonna ti pungtotna.

12Ngem ipawitconto ti apuy iti Teman, ket ikisapnanto dagiti palacio ti Bosra.

13Castoy ti saoen ni Jehova: Maipuon iti tallo a salungasing dagiti annac ni Ammon, wen, maipuon iti uppat, diacto ibawing ti dusana; ta pinisangda dagiti babbai a masicog a taga Galaad, tapno lumawa ti sacupenda.

14Ngem mamasgedacto iti bacud ti Rabba, ket ikisapnanto dagiti palaciona a mapacuyogan cadagiti riririaw iti caaldawan ti gubat, agraman iti bagio iti aldaw ti alipugpog.

15Ket iti arida macayawanto isu ken dagup dagiti piprincipena, cuna ni Jehova.

Jump to: Chapter 2 →