Amos 4

Ilokano (Ti Biblia (1973))

← Chapter 3 Jump to: Chapter 5 →

1Denggenyo daytoy a sao, dacayo a vacvaca ti Basan, nga addacayo iti bantay ti Samaria, a parigatenyo ti napanglaw, a burakenyo ti macasapul, a cunada cadagiti appoda, Yegyo ta uminumtayo coma.

2Ni Apo Jehova sinapataanna babaen ti kinasantona, nga adtoy, dagiti al-aldaw dumtengdanto cadacayo, nga alaendacayto cadagiti callawit, ken dagiti matda cadacayo cadagiti baniit.

3Ket rumuarcayto cadagiti gutgutbaw, tunggal maysa sililinteg iti sangoananna; ket agtappuaccayto iti Harmona, cuna ni Jehova.

4Incayo idiay Beth-el, ket agsalungasingcayo; idiay Gilgal, ket paaduenyo ti panagsalungasing; ket ipanyo iti tunggal agsapa dagiti datonyo, ken dagiti apagcapuloyo tunggal tallo nga aldaw.

5Ket yawatyo ti daton ti panagyaman daydiay nalevaduraan, ket iwarragawagyo dagiti datdaton ti sibubulos a nakem, ket ipuccawyo ida, ta daytoy ti macaay-ayo cadacayo, O dacayo annac ti Israel, cuna ni Apo Jehova.

6Castamet a siac intedco cadacayo ti kinadalus dagiti ngipen cadagiti amin a il-iliyo, ken panagcurang ti tinapay cadagiti amin a dissoyo; nupay casta dicayo nagsubli caniac, cuna ni Jehova.

7Ket castamet a minedmedac ti tudo cadacayo, idi adda pay laeng tallo a bulan sacbay iti panagapit, ket pinagtudoc iti maysa nga ili, ket diac pinagtudo iti sabali nga ili: nagtudo iti maysa a disso, ket iti dina tinudoan, nagmaga.

8Iti casta dua wenno tallo nga il-ili nagal-laal-lada iti maysa nga ili nga uminum iti danum, ket saanda a napnec: cascasdi a dicayo nagsubli caniac, cuna ni Jehova.

9Kinabilcayo babaen ti eppes ken buut: dagiti adu a minuyunganyo ken dagiti cauvasanyo ken dagiti cahigosanyo ken dagiti caolivoanyo kinnan ida ti dudon: cascasdi a dicayo nagsubli caniac, cuna ni Jehova.

10Impawitco cadacayo ti panagangol a cas di casasaad ti Egipto: pinapatayco iti campilan dagiti agtutuboyo a lallaki, ket kinayawac dagiti cabayoyo; ket insacnapco ti buyoc iti pagpacarsoanyo inggana cadagiti agongyo, cascasdi a saancayo laeng a nagsubli caniac, cuna ni Jehova.

11Dinadaelco dagiti il-ili cadacayo, a cas idi ti Dios dinadaelna ti Sodoma ken Gomorra, ket cascayo la aluten a naiccat iti pagpuuran: cascasdi a dicayo nagsubli caniac, cuna ni Jehova.

12Iti casta castoy ti aramidecto kenca, O Israel; ket gapu ta aramidecto daytoy kenca, agsaganaca a sumabet iti Diosmo, O Israel.

13Ta adtoy, ti mangaramid cadagiti banbantay, ket parsuaenna ti angin, ket ipalawagna iti tao no ania ti panunutna; ti mamagsipnget iti bigat, ket ti agbaddec cadagiti nangato a disso ti daga-Jehova, Dios dagiti buybuyot; ti naganna.

← Chapter 3 Jump to: Chapter 5 →