Amos 9

Ilokano (Ti Biblia (1973))

← Chapter 8 Jump to:

1Nakitac ti Apo nga adda a sitatacder iti sidiran ti altar, ket kinunana, Cabilem dagiti paratoc dagiti adigi, tapno magungon dagiti dapian; ket burakem ida cadagiti oloda amin; ket dagitinto matda cadacuada patayecto iti campilan: awanto ti uray maysa cadacuada a macalisi, ken awanto ti uray maysa cadacuada a macatalaw.

2Uray umabutda pay iti Sheol, idiay ti imac alaennanto ida, ket uray pay cumalayatda sadi langit, manipud idiay ipababacto ida.

3Ket uray pay aglemmengdan idiay tapaw ti Carmelo, idiay birukecto ida ket alaec ida; ken uray pay no aglingedda iti imatangco iti tucoc ti baybay, idiay ibilinconto iti uleg, ket cumagatto cadacuada.

4Ket uray pay mapanda a pacayawan iti sango dagiti cabusorda, idiay ibilinconto iti campilan, ket isu patayennanto ida: ket imatmatconto cadacuada dagiti matac a maipaay a pagdacsan, a saan a paglaingan.

5Ta ti Apo, ni Jehova dagiti buybuyot, isu daydiay mangsagid iti daga, ket matunaw, ket agsangitto amin dagiti agtaeng kencuana; ket ngumatonto amin a cas maysa a Carayan, ket lumnedto manen a cas iti Carayan sadi Egipto.

6Isu daydiay Mangaramid cadagiti siledna cadagiti langlangit, ket binangonna ti nagtangatangan iti ngato ti daga; daydiay umawag cadagiti dandanum iti baybay, ket ibucbucna ida iti rabaw ti daga; Jehova ti naganna.

7Saancayo aya a cas cadagiti annac dagiti taga Etiopia caniac, O annac ti Israel? cuna ni Jehova. Saanco aya nga inaon ti Israel idiay daga ti Egipto, ket dagiti Filisteo idiay Caftor, ken dagiti Sirios idiay Kir.

8Adtoy, dagiti mata ni Apo Jehova addada iti managbasol a pagarian, ket siac dadaelecto iti rabaw ti daga; ngem diacto racraken a matalipupus ti balay ni Jacob, cuna ni Jehova.

9Ta adtoy, ibilinconto, ket ti balay ni Israel yacayakecto iti tenga dagiti amin a nacion, a cas iti pannacailasin dagiti bucbukel iti yacayacan, ngem saanto a matinnag ti uray battit a bukel iti daga.

10Amin dagiti managbasol iti ilic mataydanto iti campilan dagidiay agcuna, Ti dakes saannacamto a macamacam wenno masabat.

11Iti daydiay nga aldaw, siac ibangonconto ti tabernaculo ni David a natuang, ket sullatacto dagiti gutbawna; ket ipatacderconto dagiti nadadael, ket bangonecto a cas idi punganay.

12Tapno tagicuaenda coma ti matda iti Edom, ken amin a nacion a mainaganan iti naganco, cuna ni Jehova isu a mangaramid iti daytoy.

13Adtoy, dumteng dagiti al-aldaw, cuna ni Jehova, a ti agararado macamacamnanto ti agapit ket iti agpayatpayat cadagiti uv-uvas camacamenna ti agbunobon; ket dagiti banbantay itedteddanto ti nasam-it nga arac, ket amin dagiti turturod matunawdanto.

14Ket pagbaliwecto manen dagiti nacayawan ti ilic nga Israel, ket isuda bangonendanto dagiti il-ili a nadadael, ket pagyanandanto; ket agmuladanto cadagiti cauvasan, ket inumendanto ti arac a nagtaud cadacuada; agaramiddanto met cadagiti minuyongan, ket canendanto dagiti bungbungada.

15Ket imulacto ida cadagiti dagdagada, ket ni caanoman saandanto a maparut idiay dagada nga intedco cadacuada, cuna ni Jehova a Diosmo.

← Chapter 8 Jump to: