Amos 8

Ilokano (Ti Biblia (1973))

← Chapter 7 Jump to: Chapter 9 →

1Iti casta impakita caniac ni Jehova: ket adtoy, maysa nga alat ti bunga iti pannawen ti pudot.

2Ket kinunana, Ania ti makitam, Amos? Ket insungbatco, Maysa nga alat ti bunga iti pannawen ti pudot. Idin kinuna caniac ni Jehova, Napagtengen ti canibusanan ti ilic nga Israel; diacto labasanen ida.

3Ket dagiti cancanta iti templo dungawdanto iti dayta nga aldaw, cunana ni Apo Jehova: adunto dagiti bangcay; ibellengdanto ida a siuulimec iti amin a disso.

4Denggenyo daytoy, dacayo a mangalun-un coma cadagiti macasapul, ket ibusenyo dagiti napanglaw iti daga,

5A cunayo, Inton ano ti panagtapus ti lutuad, tapno ilacomi dagiti bucbukel? Ken ti aldaw a panaginana, tapno iparangmi ti trigo, a pabassitenmi ti efa, ket padagsenenmi ti siclo, ket agaramidcami a siuulbod babaen cadagiti pagtimbengan a naulbod;

6Tapno magatangmi dagiti napanglaw iti pirac, ket dagiti macasapul iti agparis a zapatos, ket ilacomi ti eppes a trigo.

7Ni Jehova sinapataanna babaen ti kinatan-oc ni Jacob, Di bumurong a diacto malipatan iti agnanayon ti aniaman nga aramidda.

8Saanto aya nga agkintayeg ti daga gapu iti daytoy, ket amin nga agnaed kencuana agsangit? wen, ket ngumatonto ti daga a cas maysa a Carayan; ket maparigatto ken maipalnedto a cas idiay Carayan ti Egipto.

9Ket maaramidto iti dayta nga aldaw, cuna ni Apo Jehova, a palnekecto ti init iti tengnga ti aldaw, ket pagsipngetecto ti daga iti aldaw a nalawag.

10Pagbalinecto dagiti rambacyo a dung-aw, ket dagiti cantayo, nga un-unoy; icabilconto cadagiti amin a lomoyo ti lupot a nakersang, ken calvo iti amin nga oloyo; ket aramidecto a cas pagleddaangan iti bugbugtong nga anac, ket iti gibusna cas maysa nga aldaw a napait.

11Adtoy, umay dagiti al-aldaw, cuna ni Apo Jehova, nga ipawitconto ti bisin ditoy daga, saan a bisin iti tinapay, wenno waw iti danum, no saan ket a panagdengngeg cadagiti sao ni Jehova.

12Agbariw-asdanto manipud baybay agingga iti sabali a baybay, ken manipud amianan agingga iti daya; agtaraydanto nga agal-laal-la nga agsapul iti sao ni Jehova, ngem saandanto a matumpungan.

13Daytanto nga aldaw dagiti naimnas a babbalasang ken dagiti agtutubo a lallaki matalimudawdanto iti waw.

14Dagidiay agsapata babaen ti basol ti Samaria, ket cunada, Cas sibibiag ti didiosmo, O Dan; ken Cas manayon ti dalan ti Beerseba: matuangdanto, ket ni caanoman didanto bumangonen.

← Chapter 7 Jump to: Chapter 9 →