Amos 7

Ilokano (Ti Biblia (1973))

← Chapter 6 Jump to: Chapter 8 →

1Iti casta ni Apo Jehova impakitana caniac: Ket adtoy, isu pinataudna dagiti dudon idi panangrugi ti itutubo ti sagibu; ket adtoy, isu ti panagsagibu a maud-udi calpasan ti panagapit ti ari.

2Ket naaramid nga idi inibusda a kinnan ti root ti daga, idin nagsaoac, O Apo Jehova, dawatec kenca pacawanennac: Casano ti panagtacderto ni Jacob? ta isu bassit.

3Imbabawi ni Jehova daytoy: Saanto a mapatuloy, cuna ni Jehova.

4Casta ti impakitana ni Apo Jehova caniac: ket adtoy, ni Apo Jehova immayab a mangdusa babaen ti apuy a manusa; ket inibusna ti dackel a yuyeng, ket pinanggepna a keskesan ti daga.

5Idin kinunac, O Apo Jehova, dawatec kenca nga agsardengca: casano ti panagtacderto ni Jacob? ta isu bassit.

6Imbabawi ni Jehova daytoy: Uray daytoy saanto a casta, cuna ni Apo Jehova.

7Casta ti impakitana caniac; ket adtoy, ti Apo nagtacder iti denna ti maysa a bacud a naaramid babaen ti tinnag, ket siiigem iti tinnag.

8Ket ni Jehova kinunana caniac, Ania ti makitam, Amos? Ket kinunac, Maysa a tinnag. Idin kinuna ti Apo, Adtoy, mangicabilacto iti maysa a tinnag iti tengnga ti ilic nga Israel; diacto labasanen ida;

9Ket dagiti nangato a disso ni Isaac maracracdanto, ket dagiti santuario ni Israel marbadanto, ket tumacderacto a sicacampilan iti maibusor ti balay ni Jeroboam.

10Idin ni Amasias a padi idiay Bet-el, pinayammona ken ni Jeroboam nga ari ti Israel, a kinunana, Ni Amos immalsa iti maibusor kenca iti tengnga ti balay ni Israel, ti daga saanna a maibturanen amin dagiti sasaona.

11Ta castoy ti saoen ni Amos, Ni Jeroboam matayto iti campilan, ket ti Israel di bumurong a macayawan a maparuarto iti ilina.

12Ni Amasias kinunana met ken ni Amos, O sica mannacakita, agtalawca a mapan idiay daga ti Juda, ket canem idiay ti tinapay, ken agipadtoca idiay:

13Ngem saanca nga agipadto manen idiay Bet-el; ta isu ti yan ti santuario ti ari, ken isu ti balay a naarian.

14Idin simmungbat ni Amos, ket kinunana ken ni Amasias, Siac saanac idi a mammadto, ket saanac met nga anac ti mammadto, no di ket siac maysaac nga agpaspastor, ken agtartaraken cadagiti caycayo a sicomoro.

15Ket ni Jehova insinanac iti panangsurot iti pangen, ket ni Jehova kinunana caniac, Inca, agipadto iti ilic nga Israel.

16Ala ngarud, denggem ti sao ni Jehova; Cunaem, Dica agipadto iti maicaniwas iti Israel, ken dica met agsao iti maibusor iti balay ni Isaac;

17Iti casta castoy ti saoen ni Jehova: Ti asawam isunto ti maysa a balangcantis iti ili, ket dagiti annacmo a lallaki ken annacmo a babbai, mapasagdanto iti campilan, ket iti dagam pagbibingayandanto a babaen ti tali, ket sica met laeng mataycanto iti daga a di-nadalus, ket ti Israel di-bumurong a mapagtalawto a nacayawan idiay ilina.

← Chapter 6 Jump to: Chapter 8 →