Amos 3

Ilokano (Ti Biblia (1973))

← Chapter 2 Jump to: Chapter 4 →

1Dumngegcayo iti daytoy a sao nga insao ni Jehova a maibusor cadacayo, O annac ti Israel, cacaniwas ti amin a sangcacabagian nga inaonco iti daga ti Egipto, a cunana,

2Dacayo laeng ti binigbigco cadagiti amin a famfamilia ditoy daga: gapuna sucnalacto cadacayo ti amin a kinadakesyo.

3Magnanto aya ti dua nga aggiddan, no dida nagtunos?

4Aguganto aya ti leon iti bakir no awan ti matiliwna? Agungorto aya ti urbon ti leon idiay rukibna, no awan ti nakemmegna?

5Masiloan aya ti tumatayab iti rabaw ti daga idiay awan ti silo a naisagana kencuana? Maingato aya iti daga ti silo no awan ti masiloan?

6Mapuyotto aya ti tangguyob iti ili ket dinto agbuteng ti ili? Addanto aya pacarigatan iti ili a di inaramid ni Jehova?

7Kinapudnona awanto ti aramiden ni Apo Jehova a dinto maipalgac ti palimedna cadagiti adipenna, dagiti mammadto.

8Naguga ti leon; siasinonto ti di agbuteng? ni Apo Jehova nagsao; siasinonto ti di mangipadto?

9Iwarragawagyo cadagiti palacio idiay Asdod, ken cadagiti palacio iti daga ti Egipto, ket cunayo, Aguurnongcayo cadagiti banbantay ti Samaria, ket kitaenyo dagiti nagdackel a gulogulo nga adda sadiay, ken amin a pannacaparigat iti nagtengngaanda.

10Ta dida ammo ti agaramid iti nalinteg, cuna ni Jehova, dagidiay agipenpenda iti panangranggas ken panagtacaw cadagiti palacioda.

11Gapuna ni Apo Jehova castoy ti cunana; Addanto, cabusor nga aglicmut met laeng iti daga; ket parucmaennacanto, ket dagiti palaciom masamsamdanto.

12Castoy ti saoen ni Jehova: Cas ti pastor maagawna iti ngiwat ti leon, dagiti dua a saca, wenno mordong ti maysa a lapayag, castanto ti pannacaispal dagiti annac ti Israel a situtugaw idiay Samaria, iti nagsulian ti maysa nga idda, ken cadagiti seda a cudson iti pagiddaan.

13Dumngegcayo, ket sacsianyo ti maibusor iti balay ni Jacob, cuna ni Apo Jehova, ti Dios dagiti buybuyot.

14Ta intono caaldawan a sucnalac dagiti salungasing ti Israel, sucnalacto met dagiti altar ti Beth-el; ket dagiti sara ti altar maputeddanto, ket matnagdanto iti daga.

15Ket cabilecto ti balay a pagnaedanda iti pannawen ti lamec agraman balay a pagnaedanda iti pannawen ti pudot; ken dagiti balbalay a marfil mapucawdanto, ken dagiti dadackel a balbalay madadaeldanto, cuna ni Jehova.

← Chapter 2 Jump to: Chapter 4 →