Galatians 1

Ilokano (Ti Biblia (1973))

Jump to: Chapter 2 →

1Ni Pablo, maysa nga apostol (saan nga iti biang dagiti tattao ket saan met a gapu iti tao, no di ket gapu ken Jesu-Cristo ken ti Dios Ama, a namagungar kencuana cadagiti natay).

2Ken dagiti isu-amin a cacabsat a cacuyugac, isuratmi cadagiti Iglesia ti Galacia:

3Parabur cadacayo ken talna ti Dios Ama ken ni Apotayo a Jesu-Cristo.

4Isu nga intedna ti bagina gapu cadagiti basbasoltayo, tapno isalacannatayo itoy agdama a lubong a dakes, cas mayannurot iti nakem ti Dios ken Amatayo:

5Isu a madaydayaw coma iti agnanayon. Amen.

6Siac masmasdaawac iti lacayo a pumanaw iti nangawis cadacayo iti parabur ni Cristo, tapno sumurotcayo iti sabali nga evangelio;

7Isu a saan a sabali, no di laeng adda dadduma a mangriribuc cadacayo, ket cayatda coma a dadaelen ti evangelio ni Cristo.

8Ngem uray dacam met laeng, wenno maysa nga angel a naggapu idiay langit, icascasabana coma cadacayo ti maysa nga evangelio a maiduma iti daydiay incascasabami cadacayo, mailunod coma.

9Cas iti insaomin, casta ti isaoc manen: No adda mangascasaba cadacayo ti maysa nga evangelio a maisupadi iti inawatyo, mailunod coma.

10Ta gungunodec aya ti parabur dagiti tattao wenno ti Dios? wenno, ag-agawaac aya nga ay-ayoen dagiti tao? No coma no agawaac pay nga ay-ayoen dagiti tao, saanac coma nga adipen ni Cristo.

11Ta ipacaammoc cadacayo, cacabsat, iti maipapan iti evangelio nga incascasabac, nga saan a mayannurot iti tao.

12Ta saanco nga inawat iti tao, ket di met naisuro caniac; no di ket gapu iti paltiing ni Jesu-Cristo.

13Ta nadamagyo no casano ti panagbiagco idi iti pammati dagiti Judio, no casano ti nalabes unay a panangidadanesco idi iti Iglesia ti Dios ken ti panangdadaelco kencuana:

14Ket nangnangronaac idi iti pammati dagiti Judio ngem cadagiti adu cadagiti casadarco, idiay ilic, ket naregtaac pay unay cadagiti ugugali ti pammati dagidi ammac.

15Ngem idi kinayat ti Dios (isu a nangilasin caniac a nanipud iti tian ni inac, ket inayabannac gapu iti paraburna),

16Nga ipaltiing ti Anacna caniac, tapno isu icascasabac cadagiti Gentil, sigud a diac nagyuman iti lasag ken dara:

17Ket diac met simmang-at idiay Jerusalem a nakisao cadagidi immun-una nga apostol ngem siac; no di ket napanac idiay Arabia; ket nagsubliac manen idiay Damasco.

18Ket calpasan ti tal-lo a tawen, simmang-atac idiay Jerusalem tapno maam-ammoac ni Cefas, ket nakipagnaedac kencuana iti sangapulo ket lima nga aldaw.

19Ngem saanac a nacakita iti uray siasino a sabali cadagidi apostol, no di laeng ni Santiago, daydi cabsat ti Apo.

20Ket no maipapan iti isuratco cadacayo, adtoy, iti imatang ti Dios, a diac agulbod.

21Idin napanac cadagiti dagdaga ti Siria ken Cilicia.

22Ket didac pay nakitkita dagiti Iglesia ni Cristo iti Judea:

23Isuna laeng a nadamdamagda nga: Daydi nangidadanes cadatay idi, ita icascasabana ti pammati a dinaddadaelna idi;

24Ket dinaydayawda ti Dios gapu caniac.

Jump to: Chapter 2 →