Galatians 4

Ilokano (Ti Biblia (1973))

← Chapter 3 Jump to: Chapter 5 →

1Ngem cunac, bayat ti kinaubing ti agtawid awan ti pacaidumaanna iti maysa nga adipen, uray pay isu ti apo ti isu-amin;

2No di ket adda iti babaen dagiti agaywan ken dagiti agtaraken, agingga iti aldaw a tinudingan ni amana.

3Casta met cadatayo idi ububbingtayo, addatayo iti babaen ti pannacaadipen, iti babaen dagiti pagsursuroan a nailubungan ti linteg:

4Ngem idi nadanunan ti aldaw, ti Dios imbaonna ti Anacna, a nayanac iti babai, nayanac iti babaen ti linteg,

5Tapno subbutenna dagiti adda iti babaen ti linteg, tapno awatentayo coma ti pannacaibilang nga annac.

6Ket agsipud ta dacay dagiti annac, imbaon ti Dios ti Espiritu ni Anacna cadagiti puspusoyo, nga impuccawna: Abba, Ama.

7Iti casta saanca nga adipenen, no di ket anac; ket no anac, agtawid ngarud iti Dios gapu ken Cristo.

8Ngem idi, saanyo pay nga ammo ti Dios, addacay iti pannacaadipen cadagiti saan a nadiosan ti nagtaudanda:

9Ngem ita a naammoanyo ti Dios, wenno nasaysayaat a pannao dacay ti ammoen ti Dios, apayapay nga agsublicayo cadagidiay nacapuy ken nanomo a pagsursuroan a tarigagayanyo manen a pacaadipenan?

10Ngilinenyo dagiti al-aldaw, ken bulbulan, ken dagiti tiempo, ken tawtaw-en.

11Maamacac ti maipapan cadacayo, di la ket ta nagbannogac gapu cadacayo nga awan pagmamaayanna.

12Dawatec cadacayo cacabsat, nga agbalincayo coma a cas caniac; ta siac ti cas cadacayo, Awan ti ranggas nga inaramidyo caniac:

13No diket, ammoyo a gapu iti kinacapuy ti bagi, incascasabac cadacayo ti evangelio idi damo:

14Ket dicay inum-umsi ken dicay naglicudan daydi pacasuutanyo idi iti lasagco; no diket inawatdac a cas maysa nga angel ti Dios, a cas ken Cristo Jesus.

15Adino ngarud ita ti yan daydi pammadayawyo idi? ta iccancayo ti pangpanecnec, a no mabalin coma, sinuatyo dagiti matayo, ket intedyo coma ida caniac.

16Nagbalinac aya a cabusaryo, gapu iti panangibagac cadacayo ti pudno?

17Isuda essemandacayo, ngem saan a nasayaat; no di ket cayatdacay cama nga isina cadacami, tapno essemanyo ida.

18Cancanayon a nasayaat ti maesseman no mayalubog iti naimbag, a saan laeng a no addaac a sisasango cadacayo.

19O dongdongoec a maladagac, pasicalencayo manen, agingga iti mabukel ni Cristo cadacayo.

20Cayatco coma ti adda a sisasango cadacayo, ken baliwan ti timecco; ta agduaduaac iti maipapan cadacayo,

21Ibagayo caniac, dacay nga agtarigagay nga agbiag iti babaen ti linteg, saanyo nga ipangag ti linteg?

22Ta adda a naisurat a ni Abraham adda idi dua nga annacna a lallaki, maysa iti tagabu ket maysa iti babai a siwawaya.

23Ngem daydi anac ti tagabu nayanac cas iti lasag, ngem daydi anac ti babai a siwayawaya nayanac gapu iti cari.

24Dagitoy a banbanag pangngarigda; ta dagitoy dua isuda dagiti dua a tulag; ti maysa naggapu idiay bantay Sinai a mangipasngay cadagiti annac a maipaay iti pannacatagabu ket isu ni Agar.

25Ta daytoy Agar isu ti bantay Sinai, idiay Arabia, ket cayarigan ti Jerusalem ita; ta adda iti pannacatagabu agraman dagiti isu-amin nga annacna.

26Ngem ti Jerusalem sadi ngato agwayawaya; isu nga inatayo.

27Ta adda a naisurat; agragsacca O lupes, Sica a di-naganac; agrag-oca ket agpuccawca, sica a di-nagpasical. Ta ad-adu dagiti annac ti babai a nabaybay-an, ngem iti addaan asawa.

28Ket datayo, cacabsat, cas ken Isaac idi annactayo ti cari.

29Ngem cas idi a ti nayanac cas iti lasag indadanesna daydi nayanac cas iti Espiritu, casta met ita.

30Ngem, ania ti cuna ti Surat? Pagtalawem ti tagabu ken ti anacna; ta dinto makipagtawid ti anac ti tagabu iti anac ti babai a siwawaya.

31Gapuna, cacabsat, datayo saantay nga annac ti tagabu, no di ket ti babai a siwawaya.

← Chapter 3 Jump to: Chapter 5 →