Galatians 6

Ilokano (Ti Biblia (1973))

← Chapter 5 Jump to:

1Cacabsat, no ti maysa a tao masucalan iti uray ania a panangsalungasing, dacayo a naespirituan bagbagaanyo dayta babaen ti espiritu ti kinatacneng, a kitaem ti bagim: di la ket ta masulisogca met.

2Agtitinnulongcayo iti pacadagsenan ti maysa ken maysa, ket iti casta tungpalenyo ti linteg ni Cristo.

3Ta no ti maysa a tao panunutenna nga isu adda pategna a bassit, idinto nga awa, al-lilawenna ti bagina.

4Ngem suuten ti tunggal maysa ti aramidna met laeng, ket iti casta addanto ragsacna iti maipoon met la kencuana, ket saan a maipoon iti sabali.

5Ta tunggal maysa awitennanto ti awitna met laeng.

6Ti maisuro iti sao ti Dios, makiraman coma cadagiti amin a naimbag a banag iti manursuro kencuana.

7Dicay coma maal-lilaw; ti Dios saan a marabrabac: ta ti aniaman nga imulanto ti maysa a tao, apitennanto met.

8Ta ti agmula a maipaay iti lasagna, iti lasag apitennanto ti panagrupsa; ngem dayta agmula a maipaay iti Espiritu, iti Espiritu apitennanto ti biag nga agnanayon.

9Ditay ngarud mabannog iti panagaramid iti naimbag; ta inton tiempona agapittayto, no ditay maupay.

10Iti casta ngarud, no maaddaantayo ti gundaway, aramidentayo ti naimbag cadagiti amin a tattao, ket nangnangrona cadagiti cabbalay iti pammati.

11Kitaenyo no casano nagdadackel a letletra ti panagsuratco cadacayo, iti pannacaaramat ti imac met laeng.

12Isu-amin dagiti agcalicagum a mangiparangarang iti nasayaat a langa iti lasag, pilitendacayo a macugit; tapno dida maidadanes gapu iti cruz ni Cristo.

13Ta uray dagiti met laeng addaan pannacacugit, saanda a tungpalen ti linteg, ngem cayatdacayo a pacugit tapno agpasindayagda iti lasagyo.

14Ngem di coma maaramid nga agpasindayawac, no saan nga iti cruz ni Apotayo a Jesu-Cristo; a gapu kencuana ti lubong nailanza iti cruz no maipapan caniac, ket siac, iti lubong.

15Ta ti pannacacugit awan capapay-anna ket uray met ti saan a pannacacugit, no diket ti baro a parsua ti adda capapay-anna.

16Ket cadagiti isu-amin nga agbiagto cas itoy a pagalagadan; talna ken caasi coma cadacuada ken castamet iti Israel ti Dios.

17Manipud ita ken iti masangoanan awan coma ti mangriribuc caniac, ta adda iti bagic dagiti marca ni Jesus.

18Cacabsat, ti parabur ni Apotayo a Jesu-Cristo adda coma iti espirituyo. Amen.

← Chapter 5 Jump to: