Galatians 3

Ilokano (Ti Biblia (1973))

← Chapter 2 Jump to: Chapter 4 →

1O taga Galacia nga awanan pannacaawat, asino ti nangcayaw cadacayo, idinto a naipakita iti nalawagen cadacayo a ni Jesu-Cristo nailansa iti cruz?

2Daytoy laeng ti cayatco coma a damagen cadacayo: Inawatyo ti Espiritu gapu cadagiti ar-aramid ti linteg wenno gapu iti panangdengngeg iti pammati?

3Nanengnengcayo unay aya? idinto a nangrugicayo iti Espiritu, ita maan-anaycayo iti lasag?

4Nagsagabacayo aya cadagiti casta unay a caadu a banbanag nga awan capapay-anna, no pudno nga awan capapay-anna?

5Ti mangmangted ngarud cadacayo iti Espiritu, ket agar-aramid cadagiti datdatlag cadacayo, agtaud aya cadagiti ar-aramid ti linteg wenno agtaud iti panagdengngeg iti pammati?

6Cas la ken Abraham namati iti Dios ket daytoy a pammati naibilang kencuana a kinalinteg.

7Ammoenyo ngarud a dagiti mammati, isuda dagiti annac ni Abraham.

8Ket ti Surat, sigud nga ipacpakitana a ti Dios palintegennanto dagiti Gentil gapu iti pammati, impacpacauna ti evangelio ken Abraham, a cunana: Mabendicionanto, kenca dagiti amin a nacion.

9Gapuna dagiti mammati mabendicionanda a mairaman ken ni mammati nga Abraham.

10Ta dagup dagiti isu-amin a sumurot cadagiti ar-aramid ti linteg, addada babaen ti pannacailunod; ta adda a naisurat: Mailunod ti isu-amin a di agtalinaed iti amin nga adda a naisurat iti Libro ti Linteg, tapno aramidenna.

11Ngem nalawag nga awan ti mapalinteg iti imatang ti Dios gapu iti linteg; ta, Ti nalinteg agbiagto gapu iti pammati;

12Ket ti linteg saan nga agtaud iti pammati, no di ket cunana: Ti agaramidto cadagiti cacasta a banbanag, agbiagto cadacuada.

13Ngem ni Cristo sinubbotnatayo iti pannacailunod ti linteg, idi naaramid a lunod gapu cadatayo; ta adda a naisurat: Mailunod ti isu-amin a maibitin iti cayo;

14Tapno ti bendicion ni Abraham umay cadagiti Gentil, gapu ken Jesu-Cristo tapno awatentayo ti cari ti Espiritu gapu iti pammati.

15Cacabsat, agsaoac cas iti ugali dagiti tattao: Uray no tulag laeng ti tao, no mapatalgedanen, uray siasino saanna a mabalin a dadaelen, wenno nayonan.

16Naited ngarud dagiti car-cari ken Abraham ken iti caputotanna. Saanna a kinuna: Cadagiti caputotan; a cas la agsao cadagiti adu, no di maymaysa ta cunana: Iti caputotam; nga isu ni Cristo.

17Daytoy ngarud ti cunac: Ti tulag a pinatalgedan nga immun-una ti Dios saan a mabalin a madadael, tapno maucas ti cari gapu iti linteg a naaramid a naladladaw iti uppat a gasut ket tallo pulo a tawen.

18Ta no ti tawid maigapu iti linteg, saanen a maigapu iti cari; ngem ti Dios pinaraburanna ni Abraham babaen ti cari.

19Ania ngarud ti linteg? Isu nainayon gapu cadagiti pannacasalungasing, agingga iti iyaay ti caputotan, isu a nacaipaayan ti cari, ket napatalgedan gapu cadagiti angel iti ima ti maysa a mangibabaet.

20Ket ti mangibabaet saan a gapu iti maymaysa; ngem ti Dios maymaysa.

21Ti linteg ngarud adda a maisalungasing cadagiti cari ti Dios? Ni caanoman: ta no naited coma ti maysa a linteg, a macabalin a mangted ti biag, pudno a ti pannacapalinteg magun-odan coma gapu iti linteg.

22Ngem ti Surat impupocna ti amin a banag iti babaen ti basol, tapno ti cari a maigapu iti pammati ken Jesu-Cristo, maited coma cadagiti mammati.

23Ngem idi saan pay nga immay ti pammati, addatay idi a maaywanan iti babaen ti linteg, a naipupoc a maipaay iti pammati, a maipaltiingto idi.

24Idi casta ti Linteg, nagbalin a mangaywan cadatayo, tapno iturongnatayo ken Cristo, tapno mapalintegtayo a maipoon iti pammati.

25Ngem ita ta immayen ti pammati, awantayon iti babaen ti mangaywan.

26Ta annacnatay amin ti Dios gapu iti pammati ken Cristo Jesus.

27Ta dagupyo a nabautizaran ken Cristo, incawesyo ni Cristo.

28Kencuana awan ti Judio ken Griego, awan ti adipen wenno agwayawaya, awan lalaki wenno babai; ta dacayo amin maymaysacayo ken Cristo Jesus.

29Ket no taonacayo ni Cristo, dacay ngarud ti caputotan ni Abraham, ken agtawid cas iti cari.

← Chapter 2 Jump to: Chapter 4 →