John 16

Ilokano (Ti Biblia (1973))

← Chapter 15 Jump to: Chapter 17 →

1Dagitoy sinaoc cadacayo, tapno dicay coma maitibcol.

2Paruarendacayto cadagiti sinagoga: Ngem umay pay ti horas a siasinoman a mamapatayto cadacayo, panunutennanto a mangidaton ti pagservina iti Dios.

3Ket dagitoy aramidendanto, ta dida amammo ni Ama uray siac.

4Ngem sinaoc cadacayo dagitoy, tapno inton umay ti horasda, malagipyo ida, nga insaoc cadacayo. Ngem dagitoy saanco nga insao cadacayo idi damo, ta addaac pay idi cadacayo.

5Ngem ita innacon iti nangibaon caniac, ket awan cadacayo ti mangintuud caniac: Adino ti papanam?

6Ngem, agsipud ta sinaoc cadacayo dagitoy, ti ladingit pinunnona ti pusoyo.

7Nupay casta ibagac cadacayo ti pudno: Maipaay cadacayo a mapanac: ta no diac mapan, ti Manangliuliwa dinto umay cadacayo; ngem no mapanac, ibaonconto cadacayo.

8Ket isu, inton umay, babalawennanto ti lubong ti maipapan iti basol, ken ti kinalinteg ken ti panangocom:

9Ti maipapan iti basol, gapu ta dida namati caniac;

10Ti maipapan iti kinalinteg, ta innac ken Ama ket dacayo didacto makitan;

11Ken ti maipapan iti panangocom, gapu ta ti principe daytoy a lubong naocomen.

12Adda pay adu nga ibagac cadacayo, ngem dicay mabalin nga awiten ita.

13Ngem inton umay daydiay, ti Espiritu ti kinapudno, idalannacayto iti amin a kinapudno: ta saanto nga agsao nga isisu, no di ket saoennanto ti aniaman a mangngegnanto, ket ipacaammonanto cadacayo dagiti banbanag a mapasamacto.

14Isu idaydayawnacto, ta mangalanto iti cucuac, ket ipacaammonanto cadacayo.

15Isu-amin dagiti adda ken Ama, cucuac ida gapuna kinunac a mangalanto iti cucuac, ket ipacaammonanto cadacayo.

16Iti apagbassit pay, ket didac makitan: ken iti apagbassit manen, ket makitadacto.

17Ngarud dadduma cadagiti adalanna nagsasaoda iti maysa ken maysa: Ania daytoy a cunana cadatayo; Iti apagbassit pay, ket didac makitan: ken iti apagbassit manen, ket makitadacto; ken daytoy: Gapu ta mapanac ken Ama?

18Kinunada ngarud: Ania daytoy a cunana: Apagbassit? Saanmi a maawat ti saoenna.

19Ket ni Jesus naawatanna nga cayatda idi a pagintuudan, ket kinunana cadacuada: Agiinnintuudcayo iti maipapan itoy sinaoc: Iti apagbassit pay, ket didac makitan, ken iti apagbassit manen, ket makitadacto?

20Pudno, pudno, cunac cadacayo nga agsangitcayto ket agsainneccayto; ngem ti lubong agragsacto: Naladingitcayto, ngem ti ladingityo agbalinto a rag-o.

21Ti babai, no aganac, adda ladingitna, ta dimteng ti horasna; ngem inton naipasngayna ti ubing, saanna a malagipen ti rigat, gapu iti rag-o, ta nayanac ti maysa a tao itoy lubong.

22Ket dacay ngarud ita adda ladingityo: ngem makitacayto manen ket agragsacto ti pusoyo, ket awanto ti macaiccat cadacayo ti ragsacyo.

23Ket iti dayta nga aldaw awanto ti intuudenyo caniac. Pudno, pudno, cunac cadacayo: Nga amin a dawatenyonto ken Ama iti naganco itdennanto cadacayo,

24Agingga ita awan pay ti dinawatyo iti naganco: dumawatcayo ket umawatcayo, tapno maananay ti ragsacyo.

25Dagitoy insaoc idi cadacayo cadagiti pangngarig: umay ti horas a diacto agsaon cadacayo cadagiti pangngarig; no di ket ipacaammocto a silalawag cadacayo ti maipapan ken Ama.

26Iti dayta nga aldaw dumawatcayto iti naganco; ket diac cuna cadacayo nga icacaasicayto ken Ama:

27Ta ni met laeng Ama ayatennacayo, gapu ta dacayo inayatdac ket pinatiyo a naggapuac iti Dios.

28Naggapuac ken Ama, ket immayac ditoy lubong: panawac manen ti lubong, ket mapanac ken Ama.

29Dagiti adalanna cunada kencuana: Adtoy, ita agsaoca a silalawag, ket awan ti pangngarig a saoem.

30Ita maawatanmi nga ammom dagiti isu-amin, ket di masapul ti siasinoman ti agintuud kenca: daytoy ti pamatianmi a naggapuca iti Dios.

31Ni Jesus simmungbat cadacuada: Mamaticay ita?

32Adtoy, umay ti horas, ket dimtengen a maiwarawaracayto ket tunggal maysa mapanto iti dissona, ket baybayandacto a maymaysa: ngem saanac nga agmaymaysa, ta ni Ama adda caniac.

33Dagitoy insaoc idi cadacayo, tapno adda coma talnayo caniac: ditoy lubong addanto rigatyo: ngem manginanamacayo, siac pinarmecco ti lubong.

← Chapter 15 Jump to: Chapter 17 →