John 21

Ilokano (Ti Biblia (1973))

← Chapter 20 Jump to:

1Idi nalabes dagitoy, nagparang manen ni Jesus cadagiti adalanna iti igid ti baybay ti Tiberias: ket castoy ti pinagparangna.

2Addada idi a nagtitipon da Simon Pedro ken ni Tomas, a managan ti Didimo, ken ni Natanael a taga Cana ti Galilea, ken dagiti annac ni Zebedeo ken dua a sabali cadagiti adalanna.

3Cuna ni Simon Pedro cadacuada. Innac agdaclis. Cunada kencuana: Umaycami met sumurot kenca. Napanda ket limmuganda iti barangay, ket daydi a rabii awan ti naalada.

4Ngem idi bumigaten, ni Jesus nagtacder iti iigid: ngem dagiti adalan saanda a nailasin nga ni Jesus.

5Ni Jesus ngarud cunana cadacuada; Annacco, adda cadacayo ti aniaman a macan? simmungbatda kencuana: Awan.

6Ket cunana cadacuada: Iwayatyo ti iket iti bacrang a macanawan ti barangay ket macaalacayto. Inwayatda ngarud, ket saanda a mabalinen idi nga guyuden a maipoon iti caadu dagiti ican.

7Daydi adalan ngarud a dinungdungngo ni Jesus cunana ken Pedro: Isu ti Apo. Ni Simon Pedro, idi mangngegna nga isu ti Apo, imbarikesna ti pagan-anayna, (ta adda idi a lamolamo), ket timmapuac iti baybay.

8Ngem dagiti dadduma nga adalan immayda iti bilog (ta saan nga adayu iti daga, no di agdua gasut a casico) a guyguyudenda ti iket a napno iti ic-ican.

9Idi simmang-atda ngarud iti daga, makitada a naisagana dagiti dumardarang a beggang ken maysa nga ican a naiparabaw, ken tinapay.

10Cuna ni Jesus cadacuada: Mangyegcayo cadagiti ican a naalayo ita.

11Limmugan ngarud ni Simon Pedro, ket ginuyodna iti daga di iket, a napno cadagiti dadackel nga ic-ican, sangagasut lima pulo ket tallo: ket uray aduda, di iket saan a nabsang.

12Cuna cadacuada ni Jesus: Umaycayo, mamigatcayo. Ket awan cadagiti adalan ti macaitured idi a mangintuud kencuana: Siasinoca? idinto nga ammoda nga isu ti Apo.

13Umay ni Jesus, ket idi innalana ti tinapay iniccanna ida: ken casta met idi ican.

14Daytoyen ti maicatlo a panagparang ni Jesus cadagiti adalanna, idi nalpas a nagungar cadagiti natay.

15Idi ngarud nacapamigatda, ni Jesus cunana ken Simon Pedro: Simon, anac ni Juan, adadda ti panagayatmo caniac ngem dagitoy? Cunana kencuana: Wen, Apo: sica ammom nga ayatenca. Cunana kencuana: Pacanem dagiti corderoc.

16Cunana kencuana iti maicadua: Simon, nga anac ni Juan, ayatennac? Simmungbat kencuana: Wen, Apo, sica ammom nga ayatenca Cunana kencuana; Ipaarabmo dagiti carneroc.

17Cunana kencuana iti maicatlo: Simon, anac ni Juan, ayatennac? Nagladingit ni Pedro gapu ta kinunana kencuana a namitlo: Ayatennac? ket kinunana kencuana: Apo, sica ammon dagiti isu-amin: sica ammom nga ayatenca. Cuna kencuana ni Jesus: Pacanem dagiti carneroc.

18Pudno, pudno, cunac kenca, idi ubingca agbarikesca ket magmagnaca idi iti cayatmo; ngem inton lacaycan, unnatemto dagiti imimam ket baricsannacanto ti sabali, ket ipannacanto iti dica cayat.

19Ket kinunana daytoy nga impaawatna no anianto nga ipapatay ti pangidaydayawnanto iti Dios. Ket idi naisaona daytoy, cunana kencuana: Surutennac.

20Idi a timmaliw ni Pedro, makitana a sumursurot daydi adalan a dinungdungngo ni Jesus, daydi nagsadag met iti barucongna idi pinangrabii ken nagcuna iti Apo, asino ti mangyawatto kenca?

21Idi a makita ngarud ni Pedro daytoy, cunana ken Jesus: Apo, ket daytoy ngay?

22Cuna kencuana ni Jesus: No cayatco nga agbati nga agingga iti umayac, ania dayta kenca? Surutennac.

23Nagwara ngarud daytoy a sao cadagiti agcacabsat, a daydi nga adalan saanto a matay. Ngem ni Jesus saanna a sinao kencuana a saanto a matay, no di ket: No cayatco nga agbati nga agingga iti umayac, ania dayta kenca?

24Daytoy isu daydi adalan a mangpanecnec cadagitoy; ket insuratna dagitoy: ket ammomi a ti pangpanecnecna pudno.

25Ket adda pay adu a sabsabali nga inaramid ni Jesus, a no maisuratda coma a masaggaysa, pagarupec nga uray daytoy lubong saanna a malaon dagiti libro a pacaisuratanda coma.

← Chapter 20 Jump to: