John 19

Ilokano (Ti Biblia (1973))

← Chapter 18 Jump to: Chapter 20 →

1Iti casta, ni Pilato innalana ngarud ni Jesus ket sinaplitna.

2Ket dagiti soldado nanglagada ti sisiit, ket imbalangatda kencuana ket kinagayanda ti maysa a capa a purpura.

3Ket immayda kencuana ket kinunada; Salun-at, Ari dagiti Judio! Ket tinungtungpada.

4Ket ni Pilato rimmuar manen ketcunana cadacuada: Adtoy, iruarco cadacayo, tapno maammoanyo nga awan ti babac a masaracac kencuana.

5Rimmuar agarud ni Jesus a nacabalangat ti sisiit ken capa a purpura. Ket cuna cadacuada ni Pilato: Adtoy ti tao!

6Idi ngarud nakita dagiti panguloen dagiti papadi ken dagiti oficial, nagariwawada, a kinunada: Ilansam iti cruz, ilansam iti cruz! Cuna cadacuada ni Pilato: Isu alaenyo ket ilansayo iti cruz; ta diac macasarac kencuana ti panggapuan.

7Simmungbat kencuana dagiti Judio: Adda maysa a lintegmi, ket gapu iti dayta a linteg rebbengna ti matay, ta inaramidna ti bagina nga Anac ti Dios.

8Idi ngarud nangngeg ni Pilato daytoy a sao, adadda manen ti butengna;

9Ket simrec manen iti Pretorio ket cunana ken Jesus: Taga anoca aya? Ngem ni Jesus saanna nga sinungbatan.

10Cuna kencuana ni Pilato: Saannac a casao? dica ammo nga adda pannacabalinco a mangibbet kenca; ken pannacabalinco a mangilansa kenca iti cruz?

11Simmungbat kencuana ni Jesus: Awan coma ti aniaman a pannacabalinmo caniac, no di coma naited kenca nanipud ngato: gapuna ti nangyawat caniac kenca dacdackel ti basolna.

12Maipoon itoy ni Pilato ipamuspusanna ti panangibbetna; ngem dagiti Judio agarariwawada a cuncunada: No ibbatam daytoy saannaca a gayyem ni Cesar: ta ti tunggal maysa a mangaramid iti bagina nga Ari, sumalungasing ken Cesar.

13Ni Pilato ngarud idi nangngegna dagitoy a sao, impanna iti ruar ni Jesus, ket nagtugaw idiay pangocoman iti disso a Nabaldosaan ti marmol, ket iti Hebreo, Gabbatha.

14Ket Pannacaisagana idi ti pascua: cas la horas a maicanem idi: ket cunana cadagiti Judio: Adtoy ti Ariyo!

15Isuda ngarud nagariwawada: Iccatem, iccatem, ilansam iti cruz. Cuna ni Pilato cadacuada: Ti Ariyo ilansacto iti cruz? Simmungbat dagiti cangatoan a papadi: Awan ti sabali nga arimi no saan a ni Cesar.

16Ngarud idin inyawatna cadacuada tapno mailansa iti cruz.

17Innalada ngarud ni Jesus. Ket rimmuar a sibabaclay ti cruzna agingga iti disso a managan ti Bangabanga, ket iti Hebreo Golgota;

18Ket idiay ti nangilansaanda kencuana iti cruz ket naigiddan kencuana ti dua a sabsabali, maysa iti tunggal sikigan, ket ni Jesus iti tengnga.

19Ket insurat met ni Pilato ti maysa a galad, ket incabilna iti oloan ti cruz: ket ti naisurat castoy: NI JESUS A NAZARENO, ARI DAGITI JUDIO.

20Daytoy ngarud a galad; nabasa dagiti adu cadagiti Judio; ta daydi disso a nacailansaan ni Jesus iti cruz adda idi iti asideg ti ciudad: ket adda a naisurat iti Hebreo, iti Latin ken iti Griego.

21Ket dagiti cangatoan a papadi dagiti Judio kinunada ngarud ken Pilato: Dica isurat: Ti ari dagiti Judio; no di ket, isu kinunana: Ariac dagiti Judio.

22Simmungbat ni Pilato: Ti insuratco, insuratcon.

23Dagiti soldado ngarud idi nailansada ni Jesus iti cruz, innalada dagiti pagananayna, ket pinagcapatda: iti tunggal soldado, maysa a bingay: ket daydi pay tunica: ngem daydi tunica awan ti nagdaitanna, naabel amin nanipud iti ngato.

24Kinunada ngarud iti maysa ken maysa: Saantayo a pigisen, no di ket paggiginnasatantayo no asinonto ti akincua; tapno matungpal idi ti Surat, a cunana: Biningayda dagiti pagananayco cadacuada ket naggiginnasatanda ti cawesco.

25Dagitoy ngarud inaramid dagiti soldado. Ngem agtatacderda idi iti dinna ti cruz ni Jesus da inana, ken ti cabsat a babai ni inana, ni Maria nga asawa ni Cleofas, ken ni Maria Magdalena.

26Ni Jesus ngarud idi nakitana ni inana ken ti adalan a dinungdungngona, nga adda idi dina, cunana ken inana: Babai, addayta ti anacmo!

27Sana cuna idi adalan: Addayta ti inam. Ket nanipud idi nga horas ti adalan innalana iti balayna.

28Idi nalpas daytoy, agsipud ta ammo ni Jesus a natungpalen dagiti amin a banbanag, tapno matungpal idi ti Surat, cunana: Mawawac.

29Adda idiay idi ti maysa a burnay a napno ti suca: Ket impasagepsepda ti maysa nga esponja ti suca ket incabilda iti murdong ti maysa nga sucdal ket ingaw-atda iti ngiwatna.

30Idi ngarud nainumen ni Jesus di suca, kinunana: Natungpalen. Ket idi nga indumogna di olona, inyawatna di cararuana.

31Dagiti Judio ngarud agsipud ta Panangisagana idi ti pascua, tapno dagiti bagi saanda a mabati idi cruz iti aldaw a panaginana (ta daydi nga aldaw dackel nga aldaw a panaginana) dinawatda ken Pilato a matuccol coma dagiti sacsacada, sada coma maiccat.

32Immay ngarud dagiti soldado ket tinuccolda dagiti sacsaca ti immuna, ken ti sabali a nailansa iti cruz a naigiddan kencuana.

33Ngem idi dimtengda ken Jesus, agsipud ta nakitada a natayen, saanda a tinuccol dagiti sacsacana:

34Nupay casta maysa cadagiti soldado dinuyocna ti bacrangna iti maysa a pica ket dagus a rimmuar ti dara ken danum.

35Ket ti nacakita, pinanecnecanna, ket ti pangpanecnecna napudno; ket isu ammona a saoenna ti pudno, tapno patienyo met coma.

36Ta dagitoy naaramidda, tapno matungpal idi ti Surat: Uray maysa a tulangna saanto a matuccol.

37Ket sabali pay a surat cunana: Kitaendanto ti sinalputda.

38Idi nalpas dagitoy, ni Jose a taga Arimatea, nga adalan ni Jesus idi, ngem nalimed gapu iti butengna cadagiti Judio, dinawatna ken Pilato nga ipalubosna coma kencuana nga iccatenna ti bagi ni Jesus: ket impalubos ni Pilato. Napan ngarud, ket iniccatna ti bagi ni Jesus.

39Ket ni Nicodemo, daydi napan idi damo ken Jesus iti rabii, immay met a nangicuyog ti maysa a napaglaoc nga agsangagasut a libra ti mirra ken aloes.

40Innalada ngarud ti bagi ni Jesus, ket binangbangloanda ket binungonda cadagiti luplupot a cas ugali a panangitabon dagiti Judio.

41Ket idiay disso a nacailansaanna iti cruz, adda maysa a minuyungan, ket idiay minuyungan adda maysa a tanem a baro, nga awan pay ti naitanem.

42Idiay ngarud, gapu ta Panangisagana ti pascua dagiti Judio, ket daydi tanem adda iti asideg, incabilda ni Jesus.

← Chapter 18 Jump to: Chapter 20 →