John 17

Ilokano (Ti Biblia (1973))

← Chapter 16 Jump to: Chapter 18 →

1Ni Jesus sinaona dagitoy, ket idi intangadna dagiti matana sadi langit, kinunana: Ama, ti horas dimtengen; padayawam ti Anacmo, tapno ti Anacmo padayawannaca coma:

2Cas iti pannangtedmo kencuana ti pannacabalin iti amin a lasag, tapno dagiti amin nga intedmo kencuana iccana coma ida ti biag nga agnanayon.

3Ket daytoy ti biag nga agnanayon: a maammoandaca coma a maymaysa a pudno a Dios, ken ni Jesu-Cristo nga imbaonmo.

4Siac indaydayawca ditoy daga: naturposco ti aramid nga intedmo nga aramidec.

5Ket ita, Ama, padayawannac kenca met laeng iti dayag nga adda caniac idi, iti dinnam, idi awan pay ti lubong.

6Impalawagco ti naganmo cadagiti tao nga intedmo caniac, itoy lubong: cucuam ida idi ket intedmo ida caniac, ket sinalimetmetanda ti saom.

7Ita ammodan nga amin dagiti intedmo caniac, naggapuda kenca:

8Ta dagiti sao nga intedmo caniac, intedco cadacuada; ket inawatda, ket naammoanda a pudno a naggapuac kenca ket pinatida a sica imbaonnac.

9Idawatac ida: diac idawatan ti lubong, no di ket dagiti intedmo caniac, ta cucuam ida.

10Ket isu-amin dagiti cucuac cucuam ida, ket dagiti cucuam, cucuac: ket maidaydayawac cadacuada.

11Ket awanacon iti lubong; ket dagitoy addada iti lubong, ket umayac kenca. Ama a Nasantoan! aywanam iti naganmo dagiti intedmo caniac, tapno agmaymaysada, a cas cadata.

12Bayat ti caaddac idi cadacuada, inaywanac ida iti naganmo, dagiti intedmo caniac, ingagac ida ket awan cadacuada ti napucaw, no di ket daydi anac ti pacadadaelan; tapno ti Surat matungpal.

13Ngem ita umayac kenca: ket saoec dagitoy ditoy lubong tapno adda cadacuada met laeng ti rag-oc a naananay.

14Intedco cadacuada ti saom; ket ti lubong ginurana ida, ta saanda a taga lubong, a cas caniac a saanac a taga lubong.

15Diac dawaten nga iccatem ida ditoy lubong, no di ket igagam coma ida iti dakes.

16Saanda a taga lubong, a cas caniac a saanac a taga lubong.

17Pagsantoem ida iti kinapudno: ti saom isu ti pudno.

18Cas imbaonnac ditoy lubong, imbaonco met ida itoy lubong.

19Ket gapu cadacuada pagsantoec ti bagic, tapno mapagsantoda coma met iti kinapudno.

20Ket saan laeng a dagitoy ti idawdawatac, no di ket dagiti pay mamati caniac gapu iti saoda:

21Tapno isuda amin agmaymaysada coma: a cas met sica, Ama, caniac, ket siac kenca, tapno addada met coma cadata; tapno ti lubong patienna coma a sica imbaonnac.

22Ket ti dayag nga intedmo caniac, intedco cadacuada; tapno agmaymaysada coma; a cas met coma cadata nga agmaymaysa;

23Siac cadacuada, ket sica caniac, tapno agmaymaysada nga awan pagcuranganna coma; ket ti lubong maammoanna coma a sica imbaonnac, ket inayatmo ida a cas met iti panangayatmo caniac.

24Ama, ti intedmo caniac cayatco a no adino ti yanco, addada met coma a maicuyog caniac; tapno makitada ti dayagco nga intedmo caniac: ta inayatnacon idi saan pay a nabangon ti lubong.

25O Ama a nalinteg, ti lubong, saannaca a naammoan, ngem siac naammoanca, ket dagitoy naammoanda a sica imbaonnac;

26Ket impacaammoc cadacuada ti naganmo ket ipacaammocto; tapno ti ayat a panangayatmo caniac, adda coma cadacuada, ken siac cadacuada.

← Chapter 16 Jump to: Chapter 18 →