Joshua 14

Ilokano (Ti Biblia (1973))

← Chapter 13 Jump to: Chapter 15 →

1Ket dagitoy isuda dagiti tawtawid nga innala dagiti annac ti Israel idiay daga ti Canaan, isuda a ni Eleazar a padi ken ni Josue nga anac ni Nun, ken dagiti panguloen dagiti balbalay dagiti amma dagiti caputotan dagiti annac ti Israel, inwarasda cadacuada,

2Babaen iti gasatda a ti tawid, cas ni Jehova imbilinna a naaramat ni Moises, a maipaay iti siam a caputotan, ken maipaay iti caguddua ti caputotan.

3Ta ni Moises intedna ti tawid dagiti dua a caputotan ken iti caguddua ti caputotan idiay ballasiw ti Jordan: ngem cadagiti Levitas saanna nga iniccan ida ti tawidda iti tengngada.

4Ta dagiti annac ni Jose nagcadduada a caputotan, ni Manases ken ni Efraim: ket isuda saanda a nangted iti bingay cadagiti Levitas idiay a daga, no saan laeng a dagiti il-ili a pagnaedanda, agraman palpalasotda nga agpaay cadagiti an-animalda ken agpaay iti pagtaraonda.

5Cas ni Jehova imbilinna ken Moises, casta ti inaramid dagiti annac ti Israel; ket biningayda ti daga.

6Idin dagiti annac ni Juda dimmanonda ken Josue idiay Gilgal; ket ni Caleb nga anac a lalaki ni Jefone a Cenezeo kinunana kencuana, Sica ammom ti panggep a ni Jehova sinaona ken Moises a tao ti Dios a maipapan caniac ken maipanggep kenca idiay Cades-barnea.

7Uppat a pulo dagiti tawenco idi a ni Moises nga adipen ni Jehova imbaonnac nanipud sadi Cades-barnea tapno siimec ti daga; ket inyegco manen kencuana ti sao cas adda idi iti pusoc.

8Nupay casta dagiti cacabsatco a nakipagsang-at caniac pinagrunawda ti puso dagiti tattao; ngem siac sinurotco a naimbag ni Jehova a Diosco.

9Ket ni Moises nagsapata iti daydi nga aldaw, a cunana, Pudno unay nga iti daga a nabaddecan ta sacam agnanayonto a tawidmo ken cadagiti annacmo, agsipud ta sinurotmo a naimbag ni Jehova a Diosmo.

10Ket ita, adtoy, kitaem, ni Jehova inaywanannac a sibibiag, a cas sinaona, dagitoy uppat a pulo ket lima a tawen, nanipud idi tiempo a ni Jehova insaona daytoy a sao ken Moises, iti bayat a pinagpagpagna ti Israel iti let-ang, ket ita, adtoy, daytoy nga aldaw walopuloda ket lima dagiti tawenco.

11Nupay casta napigsaac pay laeng ita nga aldaw a cas iti capigsac idi aldaw a ni Moises imbaonnac: no casano ti pigsac idi casta met laeng ti pigsac ita, agpaay iti gubat man, ken iti iruruar man ken iti iseserrec man.

12Ita ngarud itedmo caniac daytoy a caturodan, isu a ni Jehova insaona iti daydi nga aldaw; ta sica nangegmo iti daydi nga aldaw no casano ti caadda dagidi Anaceos idiay, ken dagiti il-ili a dadackel ken nasarikedkedan: mabalin a ni Jehova addanto caniac, ket pagtalaoecto ida, a cas imbaga ni Jehova.

13Ket ni Josue binendicionanna ni Caleb, anac a lalaki ni Jefone; ket intedna a tawidenna ti Hebron.

14Gapuna a ti Hebron nagbalin a tawid ni Caleb nga anac a lalaki ni Jefone a Cenezeo inggana ita nga aldaw; agsipud ta isu sinurotna a naimbag ni Jehova a Dios ti Israel.

15Ti nagan ti Hebron idi casacbayan daytoy a tiempo isu idi ti Kiryat-arba; ni Arba nga isu idi ti catan-ocan a tao cadagiti Enaceos. Ket ti daga naginana iti gubat.

← Chapter 13 Jump to: Chapter 15 →