Joshua 2

Ilokano (Ti Biblia (1973))

← Chapter 1 Jump to: Chapter 3 →

1Ket ni Josue nga anac ni Nun imbaonna manipud Settim dagiti dua nga agsiim iti nalimed unay, a kinunana cadacuada, Incayo, imatanganyo ti daga, ken ti Jerico. Isuda napanda, ket simrecda iti balay ti maysa a babai a balangcantis a managan Raab, ket nagdagusda sadiay.

2Ket naidamag idi iti ari ti Jerico, a nacuna, Adtoy, ita a rabii dagiti tattao cadagiti annac ti Israel immayda ditoy a mangsiim iti daga.

3Ket idin ti ari ti Jerico nagbaon ken ni Raab, a kinunana, Iruarmo dagiti tattao nga immay kenca, ket simrecda iti balaymo; ta immayda a mangsiim iti isu-amin a daga.

4Ngem di babai innalana dagidi dua a tattao, ket inlemmengna ida; ket kinunana, Wen, dagiti tattao immayda caniac: ngem saanco a naammoan no taga anoda.

5Ket naaramid a idi umadani ti pannacairikep ti ruangan, idi nasipngeten, dagidi a tattao rimmuarda; ket diac ammo no sadino ti napananda; surutenyo ida iti madaras, ta abutenyo ida.

6Ngem isu pinaulina ida iti pangatepan, ket inlemmengna ida cadagiti puon ti lino nga inurnosna iti rabaw ti pangatepan.

7Ket dagiti tattao kinamatda ida iti dalan nga agturong iti Jordan agingga cadagiti pagballasiwan: ket apaman a dagidiay nagcamat cadacuada nacaruarda, rinpcanda di ruangan.

8Ket idi dida pay nagidda, isu immuli a napan cadacuada iti rabaw ti pangatepan;

9Ket kinunana cadagiti tattao, siac ammoc a ni Jehova intedna cadacayo daytoy a daga, ket dacami mabutengcami a gapu cadacayo: ket dagiti amin nga agnaed iti daga agrunawda iti sangoyo.

10Ta nangngegmi a ni Jehova pinagmagana dagiti danum ti Baybay a Nalabaga iti sangoananyo, idi a rimmuarcayo sadi Egipto; ken daydi inaramidyo cadagiti dua nga ar-ari dagiti Amorreos, a nagyanda idi iti ballasiw ti Jordan, da Seon ken Og, isuda a pinapatayyo a tinalipupus.

11Idinto a nangegmi daydi nagrunaw ti pusomi, awanen ti natda nga ingel iti uray maysa, a gapu cadacaya. Ta ni Jehova a Diosyo, isu ti Dios idiay ngato sadi langit, ken iti baba ditoy daga.

12Agdawatac ngarud cadacayo itatta, a pagsapataandac gapu ken ni Jehova, nga cas iti panangngaasic cadacayo, casta met ti aramidenyo iti balay ni amac, ket iccandac iti napudno a tanda;

13Ket biagenyonto ni amac ken ni inac, ken dagiti cacabsatco a lallaki ken babbai, ken amin daydiay a cucuada, ket ispalenyonto dagiti bibiagmi iti patay.

14Ket dagiti tattao kinunada kencuana, Ti biagmi maipaay iti biagmo, no dicay ipalgac coma daytoy a panggepmi; ket isunto, nga intono ni Jehova itedna cadacami daytoy a daga, agaramidcaminto kenca a sicacaasi ken sipupudno.

15Idin isu pinaulogna ida iti maysa a tali iti tawa: ta ti balayna adda idi iti rabaw ti bacud; ket isu nagtaeng idi iti rabaw ti bacud.

16Ket kinunana cadacuada, Incayo iti bantay: di la ket ta dagiti cumamat, matumpungandacayo: ket agyancayo idiay a silelemmeng iti tallo nga al-aldaw, inggana a dagidiay nga agcamat cadacayo, agawidda, ket iti calpasanna incayo iti dalanyo.

17Ket dagiti lallaki kinunada kencuana, Dacami dicamto mapabasol iti daytoy a sapatam isu a pinaisapatam cadacami.

18Kitaem ta intono sumreccami iti daga, sica igalutmonto daytoy a tali a nalabaga iti tawa isu a nangyulogam cadacami, ket sica ummongemto iti balaymo ni amam ken ni inam, dagiti cacabsatmo ken amin a cabbalay ni amam.

19Ket isunto, a siasinoman a rumuar cadagiti ruruangan ti balaymo a mapan iti calzada, ti darana addanto iti rabaw ti olona, ket awanto ti basolmi: ket uray siasinoman a makinaedto kenca iti balaymo, ti darana adda iti rabaw ti olomi no adda ima a mangsagid kencuana.

20Ngem no sica ipalgacmonto daytoy a panggepmi, dacami ngarud dicamto mapabasol iti daytoy a sapatam isu a pinaisapatam cadacami.

21Isu simmungbat, Cas ti kinunayo, castan coma. Ket imbaonna ida, ket pimmanawda; ket ingalutna di tali a nalabaga iti tawa.

22Ket rimmuarda, ket nacagtengda iti bantay ket nagyanda idiay iti tallo nga aldaw, agingga iti nacaawiden dagiti nagcamat cadacuada; ket dagidi nagcamat, nagbirucda cadacuada cadagiti amin a daldalan, ngem dida nasaracan ida.

23Idin dagidi dua a tattao nagawidda, ket simmalogda iti bantay, ket bimmallasiwda, ket immayda ken ni Josue nga anac ni Nun; ket sinaritada amin dagiti napasamacda.

24Ket kinunada ken ni Josue, Pudno a ni Jehova inyawatna amin a daga cadagiti imatayo; ket maysa pay, amin dagiti agnaed iti daga agrunawda iti sangotayo.

← Chapter 1 Jump to: Chapter 3 →