Joshua 7

Ilokano (Ti Biblia (1973))

← Chapter 6 Jump to: Chapter 8 →

1Ngem dagiti annac ti Israel nacaaramidda iti panaglabsing iti banag a naipaay; ta ni Acan, nga anac a lalaki ni Carmi, nga anac a lalaki ni Zabdi, nga anac a lalaki ni Zera, ti caputotan ni Juda, nangala iti banag a naipaay: ket ti pungtot ni Jehova simged a maibusor cadagiti anac ti Israel.

2Ket ni Josue nangibaon cadagiti tattao nanipud Jerico agingga iti Ai, a caabay ti Beth-aven, iti bangir a daya ti Beth-el, ket nagsao cadacuada, a kinunana, Sumang-atcayo ket siimenyo ti daga. Ket dagiti tattao simmang-atda ket siniimda ti Ai.

3Ket nagsublida ken Josue, ket kinunada kencuana, Dica coma pasang-aten amin dagiti tattao; no saan laeng a dua wenno tallo a ribu a tattao ti sumang-at ken mangcabil iti Ai; dica pagbannogen amin a tattao idiay; ta bassitda unay.

4Iti casta simmang-atda idiay dagiti tattao nga agtallo a ribu: ket nagtarayda nanipud iti sangoanan dagiti tattao a taga Ai.

5Ket dagiti tattao a taga Ai nangpatayda cadacuada iti agtallopulo ket innem a tattao; ket kinamatda ida nanipud sangoanan ti ruangan inggana iti Sebarim, ket kinabilda ida iti salugan: ket dagiti puspuso dagiti tattao nagrunaw, ket nagbalin a cas danum.

6Ket ni Josue pinigisna dagiti pagan-anayna, ket nagpacleb iti daga iti sangoanan ti lacasa ni Jehova inggana iti malem, isu ken dagiti lallacay ti Israel; ket tinapocanda dagiti ol-oloda.

7Ket ni Josue kinunana, Ay, O Apo Jehova, ania ti gapuna a inyegmo dagiti isu-amin a tattao iti ballasiw ti Jordan, tapno yawatnacami iti ima dagiti Amorreo, tapno papatayendacami? napneccami ken nagbaticami la coman iti ballasiw ti Jordan!

8O, Apo, ania ti saoecto, iti calpasan a ti Israel timmallicud iti sangoanan dagiti cabusorna!

9Ta dagiti Cananeo ken isu-amin nga agnaed iti daga isu ti madamagdanto, ket alicubcubendacamto, ket iccatendanto ti naganmi iti daga: ket ania ti aramidemto a maipaay iti naindaclan a naganmo?

10Ket ni Jehova kinunana ken Josue, Bumangonca; ania ti gapuna aya a nagpaclebca?

11Ti Israel nagbasol, wen, isuda sinalungasingda ti tulagco nga imbilinco cadacuada: wen, isuda nangalada iti banag a naipaay, ket nagtacawda met, ken nagulbodda met; ken isu ti indulinda iti tengnga dagiti al-alicamenda met laeng.

12Gapuna a dagiti annac ti Israel dida mabalin ti agtacder iti sango dagiti cabusorda; timmallicudda iti sangoanan dagiti cabusorda, agsipud ta nagbalinda a nailunod: uray caanoman awanacton cadacayo, malacsid no dadaelenyo ti naipaay a banag nga adda iti tengngayo.

13Tumacderca, Santificarem dagiti tattao, ket cunam, Agsantificarcayo cadacayo met laeng inggana iti bigat: ta castoy ti cuna ni Jehova, a Dios ti Israel, Adda banag a naipaay iti tengngam, O Israel; dica mabalin ti agtacder iti sangoanan dagiti cabusormo, inggana iti dica ibelleng ti banag a naipaay manipud iti tengngayo.

14Intono bigat ngarud mayasidegcayto cadagiti capcaputotanyo: ket maaramidto, a ti caputotan nga alaen ni Jehova umasidegto cadagiti finamfamilia; ket ti familia a ni Jehova alaennanto umasidegto cadagiti cabbalay; ket ti cabbalay a ni Jehova alaennanto umasidegto a masaggaysa ti tao.

15Ket maaramidto, a daydiay a naala agraman ti banag a naipaay mapuuranto iti apuy, isu ken isu-amin nga adda kencuana; agsipud ta sinalungasingna ti tulag ni Jehova, ken agsipud ta nangaramid iti kinamauyong iti Israel.

16Iti casta ni Josue bimmangon a nasapa iti bigat, ket inyasidegna ti Israel cadagiti pinutonputot: ket ti caputotan ni Juda naala:

17Ket isu inyasidegna iti familia ni Juda: ket innalana ti familia dagiti Zeratas: ket inyasidegna ti familia dagiti Zeratas a sinaggaysa, ken naala ni Zabdi:

18Ket inyasidegna ti cabbalay a sinaggaysa: ket ni Acan, nga anac a lalaki ni Carmi, nga anac a lalaki ni Zabdi, nga anac a lalaki ni Zera, ti caputotan ni Juda, naala.

19Ket ni Josue kinunana ken ni Acan, Anacco, Agdawatac kenca, itedmo ti pammadayaw ken Jehova, a Dios ti Israel, ket agpudnoca kencuana: ket palawagem caniac itatta no ania ti inaramidmo; dica ilibac caniac.

20Ket ni Acan simmungbat ken Josue, ket kinunana, Iti kinapudnona nacabasolac iti maicaniwas ken Jehova, a Dios ti Israel, ket castoy ti inaramidco:

21Idi nakitac iti tengnga ti samsam ti nasayaat a dalungdong a taga Babilonia, ken dua a gasut a siclo a pirac, ken maysa a bengngal a balitoc a limapulo a siclo ti gantingna, idin inagumac ida, ket innalac ida: ket adtoy, a nailemmengda iti daga iti tengnga ti toldac, ket ti pirac iti babana.

22Iti casta ni Josue nagbaon cadagiti babaonen, ket nagtarayda a napan iti tolda; ket, adtoy, a nailemmeng iti toldana, ket ti pirac iti babana.

23Ket innalada idi nanipud iti tengnga ti tolda, ket inyegda ida ken Josue, ken cadagiti isu-amin nga annac ti Israel: ket indissoda ida iti sangoanan ni Jehova.

24Ket ni Josue, ken isu-amin nga Israel a kimmuyog kencuana, innalada ni Acan nga anac a lalaki ni Zera ken ti pirac, ken ti dalungdong ken ti bengngal a balitoc, ken dagiti annacna a lallaki, ken annacna a babbai, dagiti vacana, ken dagiti asnona, ken dagiti carnerona, ken ti toldana, ken isu-amin nga adda kencuana: ket inyegda ida iti lobong ti Acor.

25Ket ni Josue kinunana, Apayapay aya a riniribucnacami? ni Jehova riribukennaca ita nga aldaw. Ket isu-amin a Israelitas isu inuburda cadagiti batbato; ket pinuuranda ida, ket inuburda ida cadagiti batbato.

26Ket namatacderda iti rabawna iti dackel a gabsuon ti bato iti daydi nga aldaw; ket ni Jehova nagbaw-ing nanipud iti kinarungsot ti pungtotna. Gapuna a ti nagan daydiay a lugar nanaganan, Ti lobong ti Acor inggana ita nga aldaw.

← Chapter 6 Jump to: Chapter 8 →