Joshua 23

Ilokano (Ti Biblia (1973))

← Chapter 22 Jump to: Chapter 24 →

1Ket naaramid idi calpasan dagiti adu nga al-aldaw, idi a ni Jehova intedna ti inana iti Israel iti isu-amin a cabcabusorna iti aglicmut, ket ni Josue lacayen ken napacapuy cadagiti tawtawen;

2A ni Josue inayabanna amin nga Israel, dagiti lallacay ken dagiti pangpangoloenda, ken dagiti oc-ocomda ken amin dagiti agturturayda, ket kinunana cadacuada, Siac lacayacon, napacapuyac cadagiti tawtawen:

3Ket dacayo nakitayo idi amin daydi a ni Jehova a Diosyo inaramidna cadagitoy a pagpagarian gapu cadacayo; ta ni Jehova a Diosyo nakibacal idi a gapu cadacayo.

4Adtoy, siac biningbingayco cadacayo dagitoy a pagpagarian a matda, tapno isu ti tawid nga agpaay cadagiti capcaputotanyo, manipud iti Jordan, agraman cadagiti isu-amin a pagpagarian a dinupracco, agingga met laeng iti dackel a taaw nga agturong iti lelennecan ti init.

5Ket ni Jehova a Diosyo pagtalaoennanto ida iti sangoananyo, ket idoronnanto ida manipud iti imatangyo; ket dacayo tagicuaenyonto dagiti dagdagada, cas sinao idi ni Jehova cadacayo.

6Gapuna nga umingelcayo unay a mangaywan ken mangaramid iti amin nga adda a naisurat iti libro ti linteg ni Moises, a dicayo sumiasi kencuana uray iti macanawan wenno iti macatigid;

7A dicay umasideg cadagitoy a nasnacion, dagitoy a natda cadacayo; dicayo coma sarsaritaen ti nagan dagiti didiosda, dicayo coma agpasapata a gapu cadacuada, dicayo coma pagservian ida, dicayo coma agrucnoy cadacuada;

8No di ket cumpetcayo ken Jehova a Diosyo, a cas inaramidyo agingga ita nga aldaw.

9Ta ni Jehova pinagtalaona idi iti saclangyo dagiti dadackel ken napigsa a pagpagarian: ta cas la cadacayo awan ti tao nga agtacder iti sangoyo agingga ita nga aldaw.

10Maysa a lalaki cadacayo, camatennanto ti sangaribu; ta ni Jehova a Diosyo, isu ti makibacal a gapu cadacayo, a cas isu sinaona idi cadacayo.

11Gapuna a kitaenyonto a nalaing ti maipapan cadacayo met laeng, tapno ay-ayatenyo coma ni Jehova a Diosyo.

12Ta no tumalicudcayto iti uray apagbassit, ket cumpetcayo iti natda cadagitoy a pagpagarian, uray cadagitoy a natda iti nagtengngaanyo, ken no mangasawacayo cadacuada, ket sumreccayo cadacuada, ket isuda cadacayo;

13Ammoenyo a pudno unay a ni Jehova a Diosyo uray caano dinanto pagtalaoenen dagitoy a pagpagarian iti sangoananyo; no di ket isudanto ti silo ken pacaitibcolan cadacayo ken pagbaut nga agpaay cadagita bacrangyo, ken sisiit nga agpaay cadagita matayo, agingga iti mapucawcayo iti daytoy nasayaat a daga a ni Jehova a Diosyo intedna cadacayo.

14Ket, adtoy, ita nga aldaw magmagnaacon iti dalan ti isu-amin a daga: ket ammoenyo iti amin a pusoyo ken amin a cararuayo, nga awan ti uray maysa a nagcurang cadagiti amin a naimbag a ni Jehova a Diosyo insaona a maipanggep cadacayo; isuda amin natungpalda cadacayo, awan ti nagcurang cadacuada nga uray maysa.

15Ket maaramidto a cas iyaayna cadacayo ti isu-amin a banbanag a naimbag a ni Jehova a Diosyo sinaona idi cadacayo, casta met ti panangyegto ni Jehova cadacayo ti isu-amin a banbanag a dakes, inggana iti madadaelnacayo iti rabaw ti daga a nasayaat a ni Jehova a Diosyo intedna cadacayo.

16Intono aglabsingcayo iti tulag ni Jehova a Diosyo, nga imbilinna idi cadacayo, ket incayto ken agservicayto cadagiti didios a sabsabali, ket agrucnoycayto cadacuada; isu ti iseseggedton ti pungtot ni Jehova a maibusor cadacayo, ket mapucawcayto a madaras unay iti daytoy nasayaat a daga nga isu intedna idi cadacayo.

← Chapter 22 Jump to: Chapter 24 →