Joshua 24

Ilokano (Ti Biblia (1973))

← Chapter 23 Jump to:

1Ket ni Josue inummongna amin dagiti capcaputotan ti Israel idiay Siquem ket inayabanna dagiti lallacay ti Israel, ken dagiti pangpangoloenda, ken dagiti oc-ocomda, ken dagiti agturturayda; ket nagparangda iti saclang ti Dios.

2Ket ni Josue kinunana iti amin nga ili, Castoy ti cuna ni Jehova, a Dios ti Israel, Dagidi ammayo nagnaedda idi ugma iti ballasiw ti Carayan, ni met laeng Tare nga ama ni Abraham, ken ama ni Nacor: ket nagservida idi cadagiti sabsabali a didios.

3Ket siac innalac idi ni amayo nga Abraham nanipud iti ballasiw ti Carayan, ket isu inyegco idi iti amin a daga ti Canaan, ket pinaaduc idi dagiti putputotna, ket intedco kencuana ni Isaac.

4Ket intedco ken Isaac da Jacob, ken ni Esau: ket intedco ken Esau ti bantay Seir, tapno tagicuaenna; ket ni Jacob ken dagiti annacna simmalogda idi sadi Egipto.

5Ket imbaonco ni Moises, ken ni Aaron, ket dinidigrac idi ti Egipto, cas mayannurot iti daydi nga inaramidco iti tengngana: ket iti calpasanna inaoncayo.

6Ket inaonco dagiti ammayo sadi Egipto: ket immaycayo iti baybay; ket dagiti taga Egipto kinamatda dagiti ammayo agingga iti Baybay a Nalabaga agraman luglugan ken nagsasacay cadagiti cabcabayo.

7Ket idi nga immasugda ken Jehova, isu incabilna ti maysa a sipnget iti nagbaetan dacayo ken cadagiti taga Egipto, ket inyegna iti rabawda ti baybay isu a nanglapunos cadacuada; ket dagiti matayo nakitada daydi nga inaramidco sadi Egipto: ket nagyancayo idi iti adu nga al-aldaw idiay let-ang.

8Ket inserreccayo iti daga dagiti Amorreos, a nagnaed ballasiw ti Jordan: ket isuda nakibacalda cadacayo; ket inyawatco ida iti imayo; ket tinagicuayo ti dagada; ket dinadaelco ida manipud iti sangoananyo.

9Idin ni Balac nga anac a lalaki ni Sefor, nga ari dagiti Moabitas timmacder ket nakibacal idi iti Israel: ket nagbaon ket inayabanna ni Balaam nga anac a lalaki ni Beor, tapno ilunodnacayo coma idi;

10Ngem siac diac kinayat a dinengngeg ni Balaam; ngarud binendicionannacayo pay ketdi: iti casta inispalcayo iti imana.

11Ket dacayo bimmallasiwcayo iti Jordan, ket immaycayo iti Jerico: ket dagiti tattao a taga Jerico nakibacalda idi cadacayo, dagiti Amorreos, ken dagiti Perezeos, ken Cananeos, ken Heteos, ken Gergeseos, dagiti Heveos, ken Jebuseos; ket siac inyawatco ida ita imayo.

12Ket imbaonco idi dagiti alimboboyog iti sangoananyo, a nangpatalao cadacuada manipud iti sangoananyo, cadagiti met laeng dua nga ar-ari dagiti Amorreos; saan nga iti campilanmo, saan a iti ba-im.

13Ket intedco cadacayo ti daga isu a dica nagbanbannogan, ken dagiti il-ili, a dicayo binangon, ket agnaedcayo kencuana; ken dagiti cauv-uvasan ken caol-olivaan a dicayo minulaan, isuda a pagcaananyo.

14Ita ngarud agbutengcayo ken Jehova, ket agservicayo kencuana iti kinadalus ken kinapudno; ket iccatenyo dagiti didios isuda a dagidi ammayo nagservianda iti ballasiw ti Carayan, ken sadi Egipto; ket agservicayo ken Jehova.

15Ket no dakes ti panangipagarupyo iti panagservi ken Jehova, agpilicayo ita nga aldaw no siasino ti pagservianyonto: no ketdi dagiti didios a nagservian idi dagiti ammayo idi addada dita ballasiw ti Carayan, wenno cadagiti didios dagiti Amorreos, a ti dagada pagtaenganyo: ngem siac ken ti balayco agservicamto ken Jehova.

16Ket ti ili simmungbat, ket kinunana, Adayu cadacami nga idianmi coma ni Jehova, tapno agservicami cadagiti sabsabali a didios;

17Ta ni Jehova a Diostayo, isu ti nangaon cadatayo ken cadagiti ammatayo nanipud daga ti Egipto, nanipud iti balay ti pannacaadipen, isu nga iti imatangmi nangaramid cadagiti dadackel a pagilasinan, ken nangsalacnib cadacami iti amin a dalan isu a nagnaanmi; ken cadagiti il-ili isuda a linasatmi;

18Ket ni Jehova pinagtalaona idi iti sangoananmi dagiti isu-amin nga il-ili, iti met laeng Amorreo nga agnaed idi iti daga: gapuna a dacami met agservicamto ken Jehova: ta isu ti Diostayo.

19Ket ni Josue kinunana iti ili, Dicayo mabalin ti agservi ken Jehova: ta isu ti Dios a nasantoan, isu ti Dios a naimun; dinanto pacawanen dagiti panaglabsingyo uray dagiti basbasolyo.

20No idianyo ni Jehova, ket agservicayonto cadagiti sabsabali a didios, isu ti panagbaw-ingnanton ket agaramidto cadacayo iti dakes, ket runawennacayto iti calpasan daydi panagaramidna iti imbag cadacayo.

21Ket ti ili kinunana ken Josue, Saan; no di ket agservicaminto ken Jehova.

22Ket ni Josue kinunana iti ili, Dacayo dagiti macasacsi a maibusor cadacayo met laeng a dacayo piniliyo cadacayo ni Jehova, nga isu ti pagservianyo. Ket isuda kinunada, Dacami dagiti macasacsi.

23Iccatenyo ngarud ita, isu kinunana, dagiti sabsabali a didios nga addada iti tengngayo ket irucnoyyo ta pusoyo ken Jehova a Dios ti Israel.

24Ket ti ili kinunana ken Josue, Agservicaminto ken Jehova a Diosmi; ken ipangagminto ti timecna.

25Iti casta ni Josue nagaramid ti tulag iti ili iti daydi nga aldaw, ket nangicabil cadacuada cadagiti al-alagaden ken linlinteg idiay Siquem.

26Ket ni Josue insuratna dagitoy a sasao iti libro ti linteg ti Dios: ket nangala iti maysa a dackel a bato ket isu impatacderna iti siroc ti maysa a cayo a lugo nga adda idi iti denna ti santuario ni Jehova.

27Ket ni Josue kinunana iti amin nga ili, Adtoy, daytoy a bato isunto macasacsi a maibusor cadatayo; ta nangngegna amin dagiti sasao ni Jehova nga insaona idi cadatayo: gapuna a isunto ti macasacsi a maibusor cadacayo, di la ket ta ilibacyo ti Diosyo.

28Iti casta ni Josue imbaonna ti umili, tunggal maysa a tao iti tawidna.

29Ket naaramid iti calpasan dagitoy a banag, a ni Josue nga anac ni Nun nga adipen ni Jehova, natay, idinto nga agtawen iti sangagasut ket sangapulo a tawen.

30Ket isu imponponda idiay sacup ti cucuana idiay Timnat-sera, nga adda idiay caturodan ti Efraim iti amianan ti bantay Gaas.

31Ket ti Israel nagservi idi ken Jehova iti isu-amin nga al-aldaw ni Josue, ken amin nga al-aldaw dagiti lallacay a nagbiag idi calpasan ni Josue, ken nacaammo cadagiti isu-amin nga aramid ni Jehova, nga inaramidna idi nga agpaay iti Israel.

32Ket dagiti tultulang ni Jose, isuda a dagiti annac ti Israel innalada a ingapu sadi Egipto, imponponda idiay Siquem idiay paset ti daga a ni Jacob ginatangna idi cadagiti annac ni Hemor nga ama ni Siquem iti sangagasut a capisi a pirac: ket isuda nagbalinda a tawid cadagiti annac ni Jose.

33Ket ni Eleazar nga anac ni Aaron natay; ket isu imponponda idiay turod ni Finees nga anacna, isu a naited idi kencuana idiay caturodan ti Efraim.

← Chapter 23 Jump to: