Romans 1

Ilokano (Ti Biblia (1973))

Jump to: Chapter 2 →

1Ni Pablo, maysa nga adipen ni Jesu-Cristo, naayaban nga agapostol, nailasin a maipaay iti evangelio ti Dios,

2Nga incarina idi babaen cadagiti mammadtona cadagiti nasantoan a Sursurat,

3A maipapan iti Anacna, a nayanac iti capoonan ni David, a mayannurot iti lasag,

4Isu naipakita nga Anac ti Dios, gapu iti pannacabalinna, a mayannurot iti espiritu ti kinasanto, gapu iti panagungarna cadagiti natay; ni Jesu-Cristo nga Apotayo.

5Gapu kencuana inawatmi, ti parabur ken ti kina-apostol, a maipaay iti pannacapatulnog iti pammati cadagiti amin nga il-ili, a maipaay iti naganna;

6Cadacuada nairamancayo met a maawis ken Jesu-Cristo;

7Cadacayo amin nga adda dita Roma, ay-ayaten ti Dios, ken naawis nga agsanto; Parabur ken talna cadacayo nga aggapu iti Dios nga Amatayo ken ni Apo Jesu-Cristo.

8Umuna unay, agyamanac iti Diosco gapu ken Jesu-Cristo, maipoon cadacayo amin, agsipud ta ti pammatiyo naipaduyacyaken iti amin a lubong.

9Ta sacsic ti Dios a pagserviac iti espirituc iti evangelio ti Anacna, no casano ti di-agressat a pannacalagipco cadacayo a cancanayon cadagiti carcararagco.

10Nga agdaodawatac a no mabalin coma babaen ti pananganamong ti Dios addanton gundawayco nga umay cadacayo.

11Ta tarigagayancayo a makita tapno ipaayancayo ti sagut a naespirituan, tapno mapapigsacayo;

12Cayatna a saoen, nga aglilinniwanliwatayo iti pammati ti tunggal maysa, dacayo ken siac.

13Ket diac cayat a dicayo maammoan, cacabsat, a naminadu a pinanggepco ti umay cadacayo (ket agpapan ita nalappedanac), tapno macagunodac met coma ti bunga cadacayo, a cas met cadagiti dadduma a Gentiles.

14Siac, macautangac nga agpadpada cadagiti Griegos ken cadagiti gangannaet, cadagiti mamasirib ken cadagiti nanengneng.

15Gapuna no maipapan caniac sisasaganaac a mangicasaba ti evangelio cadacayo met dita Roma.

16Ta diac ibain ti evangelio; ta isu ti pannacabalin ti Dios a maipaay iti pannacaisalacan ti tunggal maysa a mamati; umuna iti Judio, ken iti met Griego.

17Ta iti daytoy maipacaammo ti kinalinteg ti Dios, manipud iti pammati agingga iti pammati: kas iti adda a naisurat; Ti nalinteg agbiagto gapu iti pammati.

18Ta ti pungtot ti Dios maiparangarang manipud langit, a maibusor iti amin a kinadangcuc ken kinakil-lo dagiti tattao, a lappedanda ti kinapudno gapu iti kinadakes.

19Ta ti panangammo iti Dios nalawag cadacuada met; ta ti Dios imparangarangna cadacuada.

20Ta dagiti banbanagna a di makita, nga isuda ti agnanayon a pannacabalin ken ti kinadiosna maipacaammoda a nalawag, ta maipakitada gapu cadagiti inaramidna nanipud idi pannacaparsua ti lubong, tapno awan ti pagpambarda:

21Ta idinto a naammoanda ti Dios, saanda a dinaydayaw a cas Dios, dida met nagyaman, no di ket nagtangsitda cadagiti panagipalpalawagda, ket nagsipnget ti nanengneng a pusoda.

22A cuncunada nga mamasiribda nagbalinda a nanengneng,

23Ket sinuctanda ti dayag ti Dios a di agrupsa iti caasping ti ladawan ti tao nga agrupsa, ken dagiti tumatayab, ken dagiti an-animal a nagsaka iti uppat ken dagiti ul-uleg.

24Gapuna, ti Dios binaybay-anna ida cadagiti derderrep dagiti puspusoda nga agturong iti kinarugit, tapno maibabain coma dagiti bagbagida cadacuada met laeng:

25Ta sinuctanda ti kinapudno ti Dios iti ulbod, ket nagdaydayawda ken nagserservida iti parsua a di ket iti Namarsua; isu a madaydayaw nga agnanayon. Amen.

26Gapu iti daytoy ti Dios binaybay-anna ida cadagiti derderrep a nacababain; ta uray dagiti babbai nga adda cadacuada sinuctanda ti nacaparsuaan a pannacaaramatda iti maisalungasing iti nacaparsuaan:

27Ket casta met dagiti lallaki, binaybay-anda ti nacaparsuaan dagiti babbai, simgedda iti derrep iti maysa ken maysa cadacuada, nga inaramidda ti nacarugrugit a pamay-an a lallaki ken lallaki, ket inawatda cadagiti bagbagida met laeng ti maicari a gonggona ti pannacaal-lilawda.

28Ket agsipud ta dida kinayat nga inammo ti Dios, ti Dios binaybay-anna ida iti maysa a nakem a dakes, tapno aramidenda dagiti banbanag a di maipaay;

29A napnoda iti amin a kinakil-lo, kinadakes, agum, dakes a nakem; napnoda iti apal, panagpapatay, ringgor, ulbod, kinadangcuc; managuy-uyaw.

30Managdadaelda, managgurada iti Dios, nacuspag, napalangguad, napasindayag, managparnuay cadagiti dakes a banbanag, nasukir cadagiti dadackelda.

31Awan isipda, saanda a matalec cadagiti tultulag, awan ti ayatda a nacaparsuaan, awan asida;

32Nga idinto nga ammoda dagiti pagal-alagadan ti Dios, a dagiti agaramid cadagiti cacasta a banbanag, maicarida ken patay, saan laeng nga aramidenda ida, no di ket umabuloyda pay cadagiti agaramid cadacuada.

Jump to: Chapter 2 →