Romans 12

Ilokano (Ti Biblia (1973))

← Chapter 11 Jump to: Chapter 13 →

1Dawatec ngarud cadacayo, cacabsat, gapu cadagiti caasi ti Dios nga ipaayyo dagiti bagbagiyo, cas daton a sibibiag, nasantoan ken macaay-ayo iti Dios; isu a panagdayawyo a naespirituan.

2Ket dicay umabuloy itoy lubong, no di ket agbalbaliwcayo, gapu iti pannacapabaro ti isipyo; tapno mapanecnecanyo no ania ti nasayaat, macaay-ayo ken naananay a pagayatan ti Dios.

3Ta gapu iti parabur a naited caniac, cunac iti tunggal maysa cadacayo a dina coma ipappapan ti bagina a nangatngato unay ngem iti rebbengna a panangipapan, no di ket agpanunot a sipapacumbaba, cas iti rucod ti pammati nga inted ti Dios iti tunggal maysa.

4Ta cas ti caadda iti maymaysa a bagitayo dagiti adu a camcameng ket dagiti camcameng saan nga agpapada ti pacaaramatanda:

5Castatayo, met nga idinto nga adutayo, maymaysatayo a bagi ken Cristo, ket makipagcamcameng iti maysa ken maysa cadatayo.

6Ket idinto nga addaantayo cadagiti taltalugading nga agduduma cas iti parabur a naited cadatayo, no talugading ti pammadto, agipadtotayo coma cas iti rucod ti pammatitayo:

7No kinamistro, ipaaytayo dagiti bagbagitayo nga agministro, no manangisuro, manursuro coma;

8No manamagbaga, mamagbaga coma: ti mangted, aramidenna coma iti naparabur a nakem: ti agturay, mangituray coma a sireregta; ti mangngaasi aramidenna coma a sirarag-o.

9Ti ayat awan coma ti ulbodna: guraenyo ti dakes, salimetmetanyo ti naimbag.

10No maipapan iti ayat nga incacabsatan, agdidinnongngocayo; no maipapan iti panagpipinnadayaw ipangpangronayo ti sabali;

11Saan coma a mapucaw ti regtayo, nasgedcayo iti espiritu nga agservi iti Apo;

12Naragsac iti pananginanama, managitured iti rigat, managtalinaed iti panagcararag;

13Makitulong cadagiti pacasapsapulan dagiti sasanto; naayat iti panagpadagus.

14Agsaocayo iti naimbag cadagiti mangidadanes cadacayo; agsaocayo iti naimbag ket dicay agilunod.

15Makipagrag-ocayo cadagiti agrag-o; makipagsangitcayo cadagiti agsangit.

16Agmaymaysa coma ti nakem ti maysa ken maysa cadacayo. Dicay agpanunot cadagiti napasindayag a banbanag, no di ket umabuloycayo cadagiti banbanag a napacumbaba. Saancayo coma a mamasirib iti imatangyo met laeng.

17Saanyo nga ibales iti uray siasino ti dakes iti dakes. Panunutenyo dagiti banbanag a nadayaw iti imatang, dagiti amin a tattao.

18No mabalin, ken cas iti cabaelanyo agbiagcayo a makicappia cadagiti isu-amin a tattao.

19Saancayo a bumalbales, ayayatec, no di ket bay-anyo laeng iti pungtot ti Dios; ta adda a naisurat: cuac ti pammales: Siac supapacacto, cuna ti Apo.

20Ngem, no ti cabusormo, mabisin taraonam; no mawaw, painumen ta itinto panangaramidmo iti casta agurnongcanto cadagiti begbeggang ti apuy iti rabaw ti ulona.

21Saanca coma a paabac iti dakes, no di ket abakem ti dakes gapu iti naimbag,

← Chapter 11 Jump to: Chapter 13 →