Romans 16

Ilokano (Ti Biblia (1973))

← Chapter 15 Jump to:

1Italecco cadacayo ni Febe, cabsattayo a babai, isu a diaconisa iti Iglesia idiay Cencreas:

2Tapno isu awatenyo iti Apo, cas maicari cadacayo a sasanto, ket isu tulunganyo iti uray ania a banag a pacasapulanna cadacayo; ta isu timmultulong met cadagiti adu ken castamet caniac.

3Cablaawanyo ni Priscila ken ni Aquila, dagiti catultulungac ken Cristo Jesus,

4Isuda a nangipeggad cadagiti tengngedda gapu itoy biagco: ket saan laeng a siac ti agyaman cadacuada, no di ket isu-amin pay dagiti Iglesias cadagiti Gentil:

5Ket cablaawanyo ti Iglesia nga adda iti balayda. Cablaawanyo ni Epeneto a dungdungngoec, nga isu ti umuna a bunga ti Asia a maipaay ken Cristo.

6Cablaawanyo ni Maria, isu a nagbannog gapu cadacayo.

7Cablaawanyo ni Andronico ken ni Junia, dagiti cacabagiac ken cadcaduac a balud nga isuda ti naidamdamag cadagiti apostol, ket nagcristianoda nga immun-una ngem siac.

8Cablaawanyo ni Amplias, a dungdungngoec iti Apo.

9Cablaawanyo ni Urbano a catulongtayo ken Cristo ken ni Stachis nga ay-ayatec.

10Cablaawanyo ni Apeles, a naanamungan ken Cristo. Cablaawanyo dagiti cabbalay ni Aristobulo.

11Cablaawanyo ni Herodion, a cabagiac. Cablaawanyo dagiti cabbalay ni Narciso, dagiti adda iti Apo.

12Cablaawanyo da Trifena ken Trifosa, isuda nga agbanbannog gapu iti Apo. Cablaawanyo ni Persida, nga ay-ayaten, a nagbannog ti adu iti Apo.

13Cablaawanyo ni Rufo, a napili iti Apo, ken ni inana, nga isu met ti inac.

14Cablaawanyo ni Asincrito ken ni Flegonte, ken Hermas, ken ni Patrobas ken ni Hermes, ken dagiti cacabsat nga addada a naicuyog cadacuada.

15Cablaawanyo ni Filologo ken ni Julia, ken ni Nereo ken ni cabsatna a babai, ken ni Olimpas, ken dagiti isu-amin a sasanto nga addada a naicuyog cadacuada.

16Agkikinnablaawcayo iti maysa ken maysa iti nasantoan nga agep. Cablaawandacayo dagiti isu-amin nga Iglesias ni Cristo.

17Ngem dawatec cadacayo, cacabsat, a kitaenyo dagiti adda a mangpataud cadagiti panagsisina ken pacaitibcolan, a maisalungasingda iti Sursuro nga inadalyo, ket umadayucayo coma cadacuada.

18Ta dagita saanda nga agservi ken Apotayo a Jesu-Cristo, no di ket cadagiti titianda met laeng ket gapu cadagiti nalinis ken nasayaat a palpalawag al-lilawenda dagiti puspuso dagiti nanengneng.

19Ta ti kinatulocyo nadamagen dagiti isu-amin. Agay-ayatac ngarud gapu cadacayo; ngem tarigagayac a mamasiribcayo coma a maipapan iti naimbag ket nanengneng a maipapan iti dakes.

20Ket ti Dios ti cappia dunorennanto iti mabiit ni Satanas iti babaen dagiti sacsacayo. Ti parabur ni Apotayo a Jesu-Cristo adda coma cadacayo.

21Cablaawannacayo ni Timoteo a catultulongco, ken ni Lucio ken ni Jason ken ni Sosipater a cacabagiac,

22Siac ni Tercio, nga agsurat itoy a surat, cablaawancayo iti Apo.

23Cablaawannacayo ni Gayo a nagdagusac, ken nagdagusan ti amin nga Iglesia. Cablaawannacayo ni Erasto, a Tesorero ti ili, ken ni cabsat a Cuarto.

24Ket iti dayta macabalin a mangaramid cadacayo a mamagtalinaed, cas iti evangelio ken ti pannacaicascasaba ni Jesu-Cristo, cas mayannurot iti pannacayammo ti palimed a nailemmeng iti kinaulimec agpapan cadagiti panawen, nga agnanayon.

25Ngem ita maipacdaar; ket gapu cadagiti sursurat dagiti mammadto, cas iti panagbilin ti Dios nga agnanayon, isu ti maipacaammo cadagiti isu-amin a nasnacion, tapno agtulnogda iti pammati:

26Iti maymaysa a masirib a Dios maited coma ti dayaw, gapu ken Jesu-Cristo, iti agnanayon nga awan ingana. Amen.

← Chapter 15 Jump to: