Romans 3

Ilokano (Ti Biblia (1973))

← Chapter 2 Jump to: Chapter 4 →

1Ania ngarud ti pacaigundawayan dagiti Judio? wenno ania ti magungguna iti pannacacugit?

2Adu dagiti pacaipaayanna: umuna, gapu ta naitalec cadacuada dagiti pacdaar ti Dios.

3Ta ania ngarud no dagiti dadduma cadacuada nagbanagda nga awan pammatida? ti kinaawan pammatida iccatennanto aya ti kinamatalec ti Dios?

4Ni caanoman: mapapati coma ti Dios uray pay naulbodda coma amin dagiti tattao, cas ti naisurat: Tapno mapalintegca cadagiti saom. Ket agbal-ligica intono umayca iti pangokoman.

5Ngem no ti kinakil-lotayo ilatacna ti kinalinteg ti Dios, ania ti saoentayonto? nakil-lo aya ti Dios a mangipatay ti dusa? (agsaoac a cas iti cadawyan dagiti tattao).

6Ni caanoman: ta casano ngarud ti panangocomto ti Dios iti lubong?

7Ngem no ti kinapudno ti Dios, gapu iti ulbodco, nagbalin a pacaidayawanna, apayapay a mapabasolac pay laeng a cas managbasol?

8Ket apayapay a saan a sao-en (cas iti pannacapabasoltayo, ken cas panecnecan dagiti dadduma a cuncunatayo cano): Aramidentayo coma ti dakes tapno umay ti naimbag? Ti pannacadusa dagitoy, maiparbeng.

9Ania ngarud? Naim-imbagtayo aya ngem isuda? Saan, nicaanoman, ta pinabaclayanmi nga agpadpada dagiti Judios ken dagiti Griegos, nga addada amin iti babaen ti basol;

10Cas adda a naisurat: Awan ti nalinteg, uray maysa;

11Awan ti macaawat, Awan ti agsapul iti Dios;

12Simminada amin, nagmaymaysada a nagbalin nga awan kapapay-anda; Awan ti agaramid ti naimbag, awan, uray la coman maymaysa:

13Tanem a silulucat ti carabucobda: Cadagiti dildilada nagaramidda ti ulbod: Gita dagiti ul-uleg ti adda iti baba dagiti bibbibigda;

14Ti ngiwatda adda a napno iti lunod ken iti pait:

15Dagiti sacsacada naparagsitda a mangibuyat ti dara;

16Pannacadadael ken kinadacsangasat ti adda cadagiti daldalanda;

17Ket ti dalan ti talna dida naammoan:

18Awan ti buteng iti Dios iti sangoanan dagiti matmatada.

19Ammotayon a dagup ti sao-en ti linteg, cunaenna cadagiti adda iti babaen ti linteg, tapno amin a ngiwat agumel coma, ket amin a lubong paiturayan coma iti pangngeddeng ti Dios:

20Agsipud ta, awanto ti lasag a maibilang a nalinteg iti sango ti Dios gapu cadagiti ar-aramid ti linteg: ta gapu iti linteg maipacaammo ti basol.

21Ngem ita, naiparangarang ti maysa a kinalinteg ti Dios, iti ruar ti linteg, a mapanecnecan ti Linteg ken dagiti Mammadto;

22Nadiosan a kinalinteg, a magun-odan gapu iti pammati ken Jesu-Cristo, a maipaay cadagiti amin a mamati, ta awan ti pagdudumaan:

23Ta isuda amin nagbasolda ket agcurangda iti dayag ti Dios;

24Idinto a maibilangda a nalinteg nga awan ti baybayadna gapu iti paraburna, a maaramat ti pannacasubbot nga adda ken Cristo Jesus:

25Isu nga impaay ti Dios a daton ti pannakicappia, gapu iti pammati iti darana, tapno maiparangarang ti kinalintegna, ta gapu iti kinaanus ti Dios pinalabasna dagiti basbasol a naaramid idi;

26Tapno ti kinalintegna maiparangarang iti agdama a tiempo; tapno maipakita a nalinteg, ken mangpalinteg iti adda pammatina ken Jesus.

27Adino ngarud ti yan ti panagpasindayaw? Naiccaten. Gapu iti ania a linteg? ti linteg dagiti aramid? saan, no di ket gapu iti linteg ti pammati.

28Panungpalenmi ngarud a ti tao maibilang a nalinteg gapu iti pammati, uray awan dagiti ar-aramid ti linteg.

29Isu Dios laeng aya dagiti Judio? saan aya a Dios met dagiti Gentiles? Wen, Dios met dagiti Gentiles.

30Ta maymaysa met laeng ti Dios, isu a mangpalintegto iti pannacacugit gapu iti pammati, ken iti saan a pannacacugit gapu iti pammati.

31Pucawentayo ngarud aya ti linteg gapu iti pammati? Nicaanoman, no di ket pagtaginayonentayo ti linteg.

← Chapter 2 Jump to: Chapter 4 →