Romans 13

Ilokano (Ti Biblia (1973))

← Chapter 12 Jump to: Chapter 14 →

1Paiturayan coma ti amin a tao cadagiti turturay a nangatngato; ta awan ti turay a saan nga agtaud iti Dios, ket dagiti pagturayan, binangon ida ti Dios.

2Ti sumukir ngarud iti uray, sumukir iti linteg ti Dios, ket dagiti sumukir, awatendanto ti pannacadusa.

3Ta dagiti agturay saan a pagbutngan ti aramid a naimbag, no saan ket a ti dakes. Cayatmo ngarud nga awan ti ibutengmo iti uray? aramidem ti naimbag, ket addanto pacaidayawam kencuana:

4Ta isu ti ministro ti Dios a maipaay iti pagimbagam. Ngem no aramidem ti dakes, agbutengca; ta saan a barengbareng ti panagtagicampilanna: ta isu ti ministro ti Dios, a mangibales ti pungtot a maipaay iti agaramid iti dakes.

5Gapuna masapul a paiturayancayo, saan laeng a gapu iti pungtot, no di ket gapu pay iti naimbag a nakem.

6Ta gapu itoy bayadanyo met dagiti buis; ta isuda dagiti ministro nga agservi iti Dios, a canayon a sangoenda daytoy met laeng.

7Agbayadcayo ngarud cadagiti isu-amin a rebbengyo: buis, iti pacautangan ti buis; impuesto, iti impuesto; buteng, iti buteng, dayaw, iti dayaw.

8Awan coma ti mautangyo iti uray siasino, no di laeng ti panagayan-ayat ti maysa ken maysa: ta ti agayat iti padana a tao, natungpalna ti linteg.

9Ta daytoy: Dica makicamalala; Dica mamapatay; Dica agtacaw; Dica agagum; ken uray no adda sabali a bilin, mapucpuc itoy a sao: Ayatem ti padam a tao a cas ti bagim met laeng.

10Ti ayat saan nga agaramid ti dakes iti pada a tao: ngarud ti ayat isu ti pacatungpalan ti linteg.

11Ket daytoy, idinto nga ammotayo ti pannawen nga isu ti horas a panagriingtayon iti turog: ta ita, ti pannacaisalacantayo as-asidegen ngem idi damo a namatitayo.

12Ti rabii lumabasen, ket umasideg ti bigat: iwagsactayo ngarud dagiti ar-aramid ti sipnget, ket icapettayo ti igam ti lawag.

13Magnatayo a sidadayaw, a cas iti aldaw; saan a cadagiti ragragsac a nalabes ken barbartec, saan nga iti kinaderrep ken cadagiti kinadakes, saan a cadagiti ringringgor ken apal:

14No di ket, icauwesyo ni Apo Jesu-Cristo ket dicayo agsagana a maipaay iti linalasag tapno matungpal ti derrepna.

← Chapter 12 Jump to: Chapter 14 →