Song of Solomon 1

Ilokano (Ti Biblia (1973))

Jump to: Chapter 2 →

1Ti canta dagiti cancanta, nga inaramid ni Salomon.

2Agcannac coma cadagiti ag-agec ti ngiwatna, ta ti ayatmo naimimbag ngem iti arac.

3Dagiti lanam addaanda iti naimbag a sayamusom; ti naganmo cas lana a naibucbuc; gapuna a dagiti virgen ayatendaca.

4Guyuguyennac, agtaraycaminto a sumurot kenca: ti ari inyunegnac cadagiti siledna; agragsac ken agrag-ocamto kenca; saritaenminto dayta ayatmo nga ad-adda ngem iti arac: isuda ayatendaca a cas maiparbeng.

5Pugotac ngem naimnasac, O dacayo annac a babbai ti Jerusalem, cas cadagiti toltolda ti Cedar, cas cadagiti bengbeng ni Salomon.

6Dicayo cumita caniac, agsipud ta cayumanggiac, agsipud ta ti init kinessetnac. Dagiti annac a lallaki ni inac nagpungtotda a maibusor caniac; insaaddac nga agaywan cadagiti uvasan; ngem ti bucodco a cauvasan diac inaywanan.

7Ibagam caniac, O sica nga ayatem ti cararuac, sadino ti nangipaarabam iti arbanmo, sadino ti namaginanaam kencuana iti matoon: ta apay a caslaac coma iti maysa a naabungotan iti denna dagiti pangpangen dagiti caduam?

8No dica ammo, O caimnasan cadagiti babbai, rumuarca iti dalanmo cadagiti tugtugot ti pangen, ket ipaarabmo dagiti caldingmo iti denna dagiti tolda dagiti paspastor.

9Inyarigca idi, O ayatco, iti maysa a cabayo cadagiti luglugan ni Faraon.

10Dagiti pingpingmo naimnasda cadagiti sinallapid a buoc, ta tengngedmo cadagita uccor nga auaten.

11Dacami yaramidandacanto cadagiti sallapid a balitoc agraman botones a pirac.

12Bayat ti panagtugaw ti ari iti lamesaanna, ti nardoc imbuyatna ti banglona.

13Ni ayayatec isu caniac ti cas maysa a reppet ti mirra, nga agidda iti tengnga ti barucongco.

14Ni ayayatec isu caniac ti cas sangcaraay dagiti sabsabong ti candaroma cadagiti cauvuvasan ti Engadi.

15Adtoy, sica naimnasca, ayatco: adtoy, sica naimnasca; dagiti matam cacasda la cadagiti pagaw.

16Adtoy, sica naimnasca, ayayatec, wen, macaay-ayoca: casta met nalasbang ti iddata.

17Dagiti busoran ti balayta cantingenda, ket dagiti pasanggirta parwada.

Jump to: Chapter 2 →