Song of Solomon 5

Ilokano (Ti Biblia (1973))

← Chapter 4 Jump to: Chapter 6 →

1Immayac iti minuyongac, cabsatco a babai, a noviac: inurnongco ti mirrac agraman recadoc; kinnanco ti rarac agraman diroc; ininumco ti aracco agraman gatasco. Mangancayo, O gagayyemco; uminumcayo, wen, uminumcayo a nawadwad unay, O ayayatec.

2Nacaturogac, ngem nacari-ing ti pusoc; isu ti timec ni ayayatec a mangtugtug, nga agcuna, ilucatannac, cabsatco a babai, ayatco, calapatic, a di natulawan; ta napno ti oloc iti linnaaw, dagiti colotco cadagiti tedted ti rabii.

3Inucsobcon ti cawesco; casano ti panangicawesconto kencuana? Binuggoacon dagiti sacsacac; casano ti panangrugitconto cadacuada?

4Ni ayayatec incautna ti imana iti abut ti ruangan, ket natignay ti pusoc gapu kencuana.

5Timmacderac tapno lucatac a maipaay ken ayayatec; ket nagitedted dagiti imimac iti mirra, ket dagiti ramramayco iti nanawnaw a mirra, iti rabaw dagiti pacaigganan ti balunet.

6Linuctac a maipaay ken ayayatec; ngem pimmanaw ni ayayatec, ket napan. Ti cararuac nagawan caniac sidi isu nagsao: isu ti sinapulco, ngem diac nasarac; pimmucawac, ngem dinac sinungbatan.

7Dagiti agbantay a tattao a mangsursur iti ili nasaracandac, kinabildac, sinugatdac; dagiti agaywan cadagiti bacud iniccatda caniac ti abungotco.

8Pagsapataencayo, O annac a babbai ti Jerusalem, no masaracanyo ni ayayatec, nga ibagayo kencuana, a masakitac iti ayat.

9Ania ti ayayatem a nangnangrona ngem iti sabali nga ayayaten, O sica caimnasan cadagiti babbai? Ania ti ayayatem a nangnangrona ngem iti sabali nga ayayaten, a pagsapataennacami iti casta?

10Ni ayayatec napudaw ken nalabaga, ti cangronaan a pangolo iti linacsa.

11Ti olona isu ti cas iti casudian a balitoc, dagiti cotolna napuscolda, ken nangisitda a cas wac.

12Dagiti matana umasping cadagiti calapati iti denna dagiti waig, a nadigusda iti gatas, ken naornos ti pannacaisaadda.

13Dagiti pingpingna cacasda sangcaraay dagiti recrecado, casda gabsuon a nasam-it a roroot: dagiti bibigna casda la lirio nga agtedted iti nanawnaw a mirra.

14Dagiti i-imana cas la cadagiti singsing a balitoc a natampocan iti berilo: ti bagina cas la aramid a marfil a nacalupcupan cadagiti zafiros.

15Dagiti luppona cas la cadagiti adigi a marmol, a naisaad iti rabaw dagiti batay a balitoc a nasudi: ti langana umasping iti Libano, a nadayag a cas cadagiti cantingen.

16Ti ngiwatna nasam-it laeng; wen, isu ti macaayayo. Daytoy isu ti ayayatec, ken daytoy isu ti gayyemco, O annac a babbai ti Jerusalem.

← Chapter 4 Jump to: Chapter 6 →