Song of Solomon 7

Ilokano (Ti Biblia (1973))

← Chapter 6 Jump to: Chapter 8 →

1Anian a nagimnas dagita sacsacam cadagiti palloca, O anac a babai ti principe! Dagiti nagtimbukel a loppom umaspingda cadagiti alhajas, ti aramid dagiti im-ima ti maysa a nalaing nga agaramid.

2Ta bagim umasping iti maysa a nagbukel a copa a kencuana di agcurang ti nagampor nga arac: ta siketmo umasping iti sangcareppet a trigo a nalawlaw cadagiti lirio.

3Dagita dua a susom umaspingda iti dua a kigaw a singin ti maysa a lodlodan.

4Ta tengngedmo umasping iti torre a marfil; dagita matam casla cadagiti libtong idiay Hesbon, iti denna ti ruangan ti Bat-rabbim; ta agongmo umasping iti torre ti Libano a tuman-ao iti Damasco.

5Ta olom a naisaad kenca umasping iti Carmelo, ket ti buoc ta olom umasping iti purpura; ti ari nacayawan cadagiti sallapidna.

6Anian a nagimnas ken nacaay-ayoca, O ayayatec, a macaparag-o!

7Daytoy a catayagmo umasping iti maysa a cayo a palma, ket dagiti susom cadagiti raayna.

8Kinunac, cumalay-atacto iti cayo a palma, cumpetacto cadagiti sangana: dagiti susom umaspingda coma cadagiti raay ti uvas, ken ti banglo ti angesmo casla cadagiti manzanas,

9Ket ta ngiwatmo umasping iti caimbagan unay nga arac, nga agpababa a silalamuyot a maipaay ken ayayatec, nga agayus cadagiti bibig dagiti matmaturog.

10Siac cucuanac ni ayayatec; ket ti calicagumna agturong caniac.

11Umayca, ayayatec, a umawayta; inta agdagus cadagiti purpuroc.

12Inta sumang-at a masapa cadagiti cauvuvasan; inta kitaen no nagrusingen ti uvas, ken nagucraden dagiti sabongna, ken agsabongen dagiti granada: idiay ti ayatco itdecto kenca.

13Dagiti mandragoras mangtedda iti ayamuom, ken cadagiti ruangan ta adda dagiti amin a kita dagiti napateg a bungbunga, a babbaro man ken baac, nga indulinco a maipaay kenca, O ayayatec.

← Chapter 6 Jump to: Chapter 8 →