Song of Solomon 4

Ilokano (Ti Biblia (1973))

← Chapter 3 Jump to: Chapter 5 →

1Adtoy, sica naimnasca, ayayatec; adtoy, sica naimnasca; dagiti matam cacasda cadagiti calapati iti licudan ti abungotmo. Ta buocmo cas maysa a pangendagiti calding, a siidda iti bacrang ti bantay Galaad.

2Dagiti ngipenmo umaspingda iti maysa nga arban dagiti carnero a cappucpukis, nga agsangatda nga aggapu iti pagbuggoan, isu a tunggal maysa addaan singin, ket awan ti natayan cadacuada.

3Dagiti bibigmo umaspingda iti sangcalabag nga escarlata, ket naimnas ta ngiwatmo. Dagita pingpingmo umaspingda iti sangcapisi a granada iti licudan ta abungotmo.

4Ta tengngedmo umasping iti torre ni David a nabangon a maipaay a pagigaman, kencuana maibitin ti sangaribu a sarapa, amin dagiti calasag dagiti mannacabalin a lallaki.

5Dagita dua a susom umaspingda iti dua a kigaw a singin ti maysa a lodlodan, nga agar-arab iti baet dagiti lirio.

6Agingga iti lumamiis ti aldaw, ket mapucawen dagiti aniniwan, innacto idiay bantay ti mirra, ken idiay turod ti incienso.

7Sica naimnasca, ayatco; ket awan ti pamilawan kenca.

8Umayca cumoyog caniac manipud Libano, noviac, cumoyogca caniac manipud Libano: tumannawagca manipud tapaw ti Amana, manipud tapaw ti Senir ken Hermon, manipud cadagiti apon dagiti leon, manipud cadagiti bantay dagiti leopardo.

9Sica kinayawam ti pusoc, cabsatco a babai, a noviac; sica kinayawam ti pusoc ita maysa a paludip dagiti matam, iti maysa a calangcang ti tengngedmo.

10Amangan a nagimnas ta ayatmo, cabsatco a babai, a noviac! anian ti kinaimimbag ta ayatmo ngem iti arac! Ken ti kinaayamuom dagiti lanam ngem iti amin a kita dagiti recrecado!

11Dagita bibigmo, O noviac, agtedtedda a cas rara: diro ken gatas addada iti baba ta dilam; ket ti banglo dagita pagan-anaymo umasping ti banglo ti Libano.

12Maysa a naticuban a minuyongan ni cabsatco a babai, a noviac; maysa a burayoc a nasullatan, maysa nga ubbog a naselloan.

13Dagita saringitmo maysa a cagranadaan, agraman bungbunga a napateg, alcamfor agraman mulmula a nardo,

14Nardo ken azafran, calamus ken canela, agraman amin a caycayo ti incienso; mirra ken aloes, agraman cadagiti amin a cangronaan a recrecado.

15Sica ti maysa nga ubbog dagiti minuyongan, maysa a bubon dagiti danum a nabiag, ken barbaresbes nga aggapu iti Libano.

16Agriingca, O amian; ket umayca, sica abagat; pul-oyanyo ti minuyongac, tapno dagiti recrecadona agsacnapda coma. Umay coma ni ayayatec idiay minuyonganna, ket canenna dagiti napateg a bungbungana.

← Chapter 3 Jump to: Chapter 5 →