Zechariah 10

Ilokano (Ti Biblia (1973))

← Chapter 9 Jump to: Chapter 11 →

1Dumawatcayo ken Jehova iti tudo iti pannawen ti maud-udi a tudo, ken ni Jehova met laeng a mangaramid cadagiti kimat; ket isu itdennanto cadacuada dagiti nadegga a tudo, ken root idiay away iti tumunggal maysa.

2Ta dagiti terafin nagsaoda iti kinaubbaw, ket dagiti mammadles nacakitada iti ulbod; ket nagibagada cadagiti saan a pudno a tagtagainep, nangliwliwada a barengbareng: gapuna mapanda iti dalanda a cas la cadagiti carcarnero, maparigatda, ta awan ti pastor.

3Ti pungtotco mapasged a maibusor cadagiti papastor, ket dusaecto dagiti calcalding a lallaki; ta ni Jehova dagiti buybuyot sinarungcaranna ti pangenna, iti balay ti Juda, ket pagbalinennanto ida a cas natataraki a cabcabayo a pakigubat.

4Aggapu kencuana umayto ti bato a pasuli aggapu kencuana ti lanza, aggapu kencuana ti ba-i a pakigubat, aggapu kencuana ti anim nga agturay a sangcatimpuyog.

5Ket isuda casdanto cadagiti mamaingel a tattao, a payatenda dagiti cabusorda iti pitac dagiti calcalsada idiay paggugubatan; ket makigubatdanto, ta ni Jehova adda cadacuada; ket dagiti agsacay cadagiti cabayo mariribucdanto.

6Ket siac papigsaecto ti balay ti Juda, ken isalacanconto ti balay ni Jose, ket isublicto ida; ta addaanac caasi cadacuada; ket isudanto ti casla diac ida impurruac: ta siac ni Jehova a Diosda, ket ipangagconto ida.

7Ket dagiti taga Efraim casdanto la iti maingel a lalaki, ket ti pusoda agragsacto a cas babaen ti arac; wen, dagiti annacda isu makitadanto, ket agragsacdanto; ti pusoda agragsacdanto ken Jehova.

8Sultipacto ida, ken urnongecto ida; ta siac sinubbotco ida; ket isuda umadudanto a cas la yaaduda idi.

9Ket imulacto ida iti tengnga dagiti il-ili; ket lagipendacto cadagiti adayu a dagdaga; ket isuda makipagbiagdanto cadagiti annacda, ket sumublidanto.

10Siac met yaonconto ida manen iti daga ti Egipto, ket urnongecto ida manipud iti daga ti Asiria; ket yegconto ida iti daga ti Galaad ken Libano; ket awanto ti masaracan a disso nga agpaay cadacuada.

11Ket isu aglasatto iti tengnga ti taaw ti ladingit, ket cabilennanto dagiti palong ti taaw, ket amin dagiti caadalman ti Nilo agmagadanto; ket ti kinatangsit ti Asiria maipababanto, ket ti cetro ti Egipto pumanawto.

12Ket papigsaecto ida ken Jehova; ket babaen ti naganna agsursurdanto, cuna ni Jehova.

← Chapter 9 Jump to: Chapter 11 →