Zechariah 12

Ilokano (Ti Biblia (1973))

← Chapter 11 Jump to: Chapter 13 →

1Ti awit a sao ni Jehova a maipapan iti Israel. Castoy ti cuna ni Jehova, a mangyucrad cadagiti langlangit, ken mangicabil iti pamuon ti daga, ken mangbukel iti espiritu ti tao iti unegna:

2Adtoy, aramidecto ti Jerusalem a tagayan nga agibar-ibar cadagiti amin nga il-ili iti aglicmut, ken maibusorto met iti Juda iti pannacalacub a maibusor iti Jerusalem.

3Ket maaramidto iti daydiay nga aldaw, a siac aramidecto ti Jerusalem a bato a nadagsen a maipaay cadagiti amin nga il-ili; amin dagiti mangawit kencuana masugatanto iti nasaem unay; ket amin dagiti nasnacion ti daga maurnongdanto nga agtitimpuyog a maibusor kencuana.

4Iti daydiay nga aldaw, cuna ni Jehova, pagkigtotecto ti tunggal cabayo, ket iti agsacay kencuana iti kinamauyong; ket ikitacto dagiti matac iti balay ti Juda, ket pagbulsekecto ti tunggal cabayo dagiti il-ili.

5Ket dagiti pangulo ti Juda cunadanto iti pusoda, Dagiti agnaed ti Jerusalem isuda dagiti pigsac ken Jehova dagiti buybuyot a Diosda.

6Iti daydiay nga aldaw pagbalinecto dagiti pangulo ti Juda a casda la pagiccan ti apuy iti tengnga ti sungrod, ken casda aluten a sidadarang iti tengnga dagiti pinungo; ket ibusendanto amin dagiti tattao iti aglicmut, iti macanawan ken iti macatigid; ket dagiti taga Jerusalem agnaeddanto manen cadagiti dissoda met laeng, idiay met laeng Jerusalem,

7Ni Jehova isalacannanto met nga umuna dagiti toltolda ti Juda, tapno ti dayag ti balay ni David ken ti dayag dagiti agnaed ti Jerusalem didanto atiwen ni Juda.

8Iti daydiay nga aldaw ni Jehova ispalennanto dagiti agnaed ti Jerusalem; ket daydiay nacapuy cadacuada caslanto ken David iti daydiay nga aldaw; ket ti balay ni David caslanto iti Dios, cas iti angel ni Jehova iti sangoda.

9Ket maaramidto iti daydiay nga aldaw, nga agawaacto a racraken dagiti amin a nasnacion nga umayda a maibusor iti Jerusalem.

10Ket mangibuyatacto iti balay ni David, ken cadagiti agnaed iti Jerusalem, iti espiritu ti parabur ken ti cararag: ket cumitadanto caniac a dinuyucda; ket agdung-awdanto a gapu kencuana, a cas iti agdung-aw a gapu iti bugbugtong nga anacna a lalaki, ket addanto kinapait a gapu kencuana, a cas iti addaan iti kinaladingit a gapu iti inauna nga anacna.

11Iti daydiay nga aldaw addanto dackel a dung-aw idiay Jerusalem, a cas iti panagdung-aw ni Adadrimon idiay lobong ti Megiddo.

12Ket ti daga agdung-awto, tumunggal familia a nalasinlasin; ti familia ti balay ni David sangcalasin, ken dagiti assawada a babbai sangcalasin; ti familia ti balay ni Natan sangcalasin, ken dagiti assawada a babbai sangcalasin;

13Ti familia ti balay ni Levi sangcalasin, ken dagiti assawada a babbai sangcalasin; ti familia dagiti Semeitas sangcalasin, ken dagiti assawada a babbai sangcalasin;

14Amin dagiti familia a matda, tunggal familia sangcalasin, ken dagiti assawada a babbai sangcalasin.

← Chapter 11 Jump to: Chapter 13 →