Zechariah 7

Ilokano (Ti Biblia (1973))

← Chapter 6 Jump to: Chapter 8 →

1Ket naaramid idi maicapat a tawen ni ari Dario, a ti sao ni Jehova immay ken Zacarias iti maicapat nga aldaw ti maicasiam a bulan, ti met laeng Kisleu.

2Idin dagiti taga Bet-el imbaonda da Saraser ken Regem-melech, ken dagiti lallakida, tapno makicaasida iti parabur ni Jehova,

3Ken tapno isaoda iti padi ti balay ni Jehova dagiti buybuyot, ken cadagiti mammadto, a cunada, Annongec aya ti agsangit iti maicalima a bulan, nga aglasinac, a cas inaramidco cadagitoy adu a tawen?

4Idin ti sao ni Jehova dagiti buybuyot immay caniac, a kinunana,

5Agsaoca cadagiti amin a tattao ti daga, ken cadagiti papadi, a cunaem, Idi a nagayunarcayo ken nagunnoycayo iti maicalima ken maicapito a bulan, bayat ti pitopulo met laeng a tawen, dacayo inaramidyo aya ti aniaman a panagayunar caniac, caniac met laeng?

6Ket no mangancayo ken ni uminumcayo, saancayo aya a mangan nga agpaay cadacayo met laeng, ken uminum nga agpaay cadacayo met laeng?

7Dicayo denggen coma aya dagiti sasao a ni Jehova impuccawna babaen dagidi immun-una a mammadto, idi a ti Jerusalem adda a nanaedan ken iti kinarang-ay, ken dagiti il-ili iti aglawlaw kencuana, ken ti Abagatan ken ti daga a nasagneb isuda idi dagiti nanaedan?

8Ket ti sao ni Jehova immay ken Zacarias a kinunana,

9Castoy ti sinao ni Jehova dagiti buybuyot, a kinunana, Mangocomcayo a sipupudno, ket iparangyo ti kinaimbag ken caasi tumunggal lalaki iti cabsatna;

10Ket dicayo parigaten ti balo a babai, uray dagiti ulila, ti gangannaet, uray ti napanglaw; ket awan coma cadacayo ti mangisicat iti pusona iti dakes a maibusor ken cabsatna.

11Ngem isuda dida kinayat nga impangag, ket imbawingda ti abagada, ken sinullatanda dagiti lapayagda, tapno dida coma dumngeg.

12Wen, inaramidda ti pusoda a cas la bato a pamulinawen, tapno saanda a mangeg ti linteg, ken dagiti sasao a ni Jehova dagiti buybuyot imbaonna babaen ti Espirituna a naaramat dagidi immununa a mammadto: gapuna immay ti dackel a pungtot a naggapu ken Jehova dagiti buybuyot.

13Ket napasamac nga isu nagpuccaw, ket dida kinayat nga impangag, iti casta agpuccawdanto, ket diacto ipangag, cuna ni Jehova dagiti buybuyot;

14Ngem iwaracto ida babaen ti alawig iti tengnga dagiti amin a nasnacion nga isuda dida naammoan. Iti casta ti daga langalang idi iti licudanda, ngarud awan ti tao a limmasat wenno nagsubli: agsipud ta ti nacaay-ayo a daga pinagbalinda a langalang.

← Chapter 6 Jump to: Chapter 8 →